Elisha Lukim Olketa Chariot wea Laet Olsem Fire​—Waswe, Iu Tu Lukim?

King bilong Syria hem aftarem Elisha, profet bilong God. Datfala king savve Elisha stap long Dothan, wanfala taon wea stap antap long hill and wea garem wall raonem. Long naet, King sendem olketa soldia, witim olketa horse, and olketa war chariot go long Dothan. Taem hem gogo for morning, olketa kasem datfala taon nao.—2 Ki. 6:13, 14.

Taem wakaman bilong Elisha wekap and go aotsaed, hem lukim datfala army wea kam for kasholem Elisha. Hem barava wari and askem Elisha wanem tufala bae duim. Elisha sei: “Iu no fraet, iumi staka winim olketa ia.” Then Elisha prea olsem: “Plis Jehovah, iu openem eye bilong hem mekem hem savve lukim evri samting.” Bible sei: “Semtaem nomoa Jehovah openem eye bilong datfala wakaman, and hem lukim long olketa maunten staka horse and olketa war chariot wea laet olsem fire, olketa stap raonem Elisha.” (2 Ki. 6:15-17) Wanem nao iumi lanem from diswan, and olketa nara samting wea kasem Elisha?

Elisha nating fraetem datfala army bilong Syria bikos hem trust long Jehovah and hem lukim wanem God duim for protectim hem. Iumi no expectim God for duim mirakol for iumi distaem, bat iumi luksavve Jehovah hem gohed protectim pipol bilong hem olsem wanfala grup. Hem olsem iumi tu lukim olketa horse and chariot wea laet olsem fire stap raonem iumi. Sapos iumi garem strongfala faith and iumi evritaem trust long God, bae hem protectim and blessim iumi. (Ps. 4:8) Distaem bae iumi storyim wanem iumi savve lanem from olketa nara samting wea kasem Elisha.

ELISHA KAMAP WAKAMAN BILONG ELIJAH

Long wanfala taem wea Elisha houm garden, profet Elijah kam and putim long Elisha kaleko bilong profet wea Elijah savve werem. Elisha savve wanem nao datwan minim. Hem wakem feast, hem sekhand witim dadi and mami bilong hem, and lusim hom for kamap wakaman bilong Elijah. (1 Ki. 19:16, 19-21) From Elisha hem willing for duim eni samting wea hem fit for duim long waka bilong God, Jehovah iusim hem and gogo hem kamap profet wea changem Elijah.

Maet Elisha hem wakaman bilong Elijah for sixfala year. Long datfala taem, Bible sei Elisha nao ‘man wea pourim wata for Elijah wasim hand bilong hem.’ (2 Ki. 3:11) Long bifor, pipol no iusim spoon for kaikai bat olketa iusim hand bilong olketa. Bihaen boss kaikai, wakaman bilong hem savve pourim wata for boss wasim hand bilong hem. So samfala waka wea Elisha duim hem waka wea maet olketa narawan ting daonem. Nomata olsem, long tingting bilong Elisha, hem wanfala privilege for hem wakaman bilong Elijah.

Distaem tu, staka Christian duim full-taem service. Olketa duim diswan bikos olketa garem faith and olketa laek for iusim full strong bilong olketa for worshipim Jehovah. Maet olketa waka long Bethel, construction, or duim olketa nara assignment. Samfala taem olketa mas lusim hom bilong olketa and duim olketa waka wea maet nara pipol ting daonem. Olketa Christian shud no tingse olketa assignment hia no important bikos Jehovah barava tinghae long datfala waka.—Heb. 6:10.

ELISHA FAITHFUL LONG ASSIGNMENT

Bible sei God ‘iusim wanfala big wind for tekem Elijah go ap long skae.’ Bifor datwan happen, God talem hem for lusim Gilgal and go long Bethel. Elijah talem Elisha for no go witim hem, bat Elisha sei: “Bae mi no lusim iu.” Taem tufala gogo, tufala taem moa Elijah talem Elisha for no go witim hem, bat Elisha sei bae hem no go bak. (2 Ki. 2:1-6) Olsem Ruth hem no lusim Naomi, Elisha hem no laek for lusim Elijah tu. (Ruth 1:8, 16, 17) Why nao olsem? Bikos Elisha tinghae long privilege wea God givim long hem for waka for Elijah.

Elisha showimaot gudfala example for iumi. Taem iumi kasem samfala privilege insaed organization bilong God, bae iumi tinghae long datwan sapos iumi no forget iumi duim for Jehovah. Hem nambawan privilege for waka for Jehovah.—Ps. 65:4; 84:10.

“WANEM NAO IU LAEKEM MI FOR DUIM FOR IU?”

Taem tufala gogo for Bethel, Elijah askem Elisha olsem: “Bifor God tekem mi, wanem nao iu laekem mi for duim for iu?” Elisha tingim spiritual samting, olsem King Solomon tu taem God askem hem wanem nao hem laekem. Elisha askem Elijah for givim hem ‘tufala part long paoa bilong God wea stap long hem.’ (1 Ki. 3:5, 9; 2 Ki. 2:9) Long Israel, firstborn son long famili nao savve kasem tufala part long evri samting wea dadi ownim bihaen dadi dae. (Deut. 21:15-17) So hem olsem Elisha ask for kasem waka bilong Elijah. And tu, Elisha laek for olsem Elijah wea no fraet and hem evritaem strong for duim wanem Jehovah laekem.—1 Ki. 19:13, 14.

Wanem nao Elijah talem long Elisha? Hem sei: “Hard samting nao iu askem. Sapos iu lukim mi taem God tekem mi, bae iu kasem datwan, bat sapos nomoa, bae iu no kasem.” (2 Ki. 2:10) Tufala point nao insaed long ansa bilong Elijah. First point, God nomoa savve givim wanem Elisha askem. Mek-tu point, sapos Elisha laek for kasem wanem hem askem, hem mas gohed for stap witim Elijah nomata wanem samting happen.

WANEM ELISHA LUKIM

Wanem nao tingting bilong God abaotem samting wea Elisha askem? Bible sei: “Taem tufala wakabaot and story tugeta, wanfala war chariot wea laet olsem fire and olketa horse wea laet olsem fire tekem Elijah from Elisha, and wanfala big wind tekem Elijah go ap long skae. Elisha lukim evri samting hia.”a Datwan nao ansa bilong Jehovah for samting wea Elisha askem. Elisha lukim taem God tekem Elijah, hem kasem tufala part long paoa bilong God wea stap long Elijah, and hem kamap profet for changem Elijah.—2 Ki. 2:11-14.

Elisha pikim kaleko bilong profet wea foldaon from Elijah, then hem werem. Datwan showimaot Elisha hem kamap profet bilong God nao. Nara samting wea showimaot God markem hem for kamap profet, hem taem wea hem duim mirakol for divaedem Jordan River.

Elisha hard for forgetim datfala war chariot and olketa horse wea laet olsem fire, and datfala big wind wea tekem Elijah go ap long skae. Olketa samting hia showimaot Jehovah givim wanem Elisha askem. Taem God ansarem prea bilong iumi, hem no duim mirakol olsem taem hem givim wanem Elisha askem. Bat iumi luksavve God hem iusim bigfala paoa bilong hem for mekem plan bilong hem kamap tru. And taem iumi lukim Jehovah hem blessim organization bilong hem long earth, hem olsem iumi lukim chariot bilong Jehovah long heven hem gohed for muv.—Ezek. 10:9-13.

Staka samting happen long laef bilong Elisha wea mekem hem luksavve Jehovah garem bigfala paoa. Olsem example, holy spirit bilong God helpem hem for duim 16-fala mirakol. Bible sei Elijah duim 8-fala mirakol.b Mek-tu taem wea Elisha lukim olketa horse and olketa war chariot wea laet olsem fire, hem long Dothan wea iumi storyim finis long start bilong disfala article.

ELISHA TRUSTIM JEHOVAH

Nomata olketa enemy stap raonem Elisha long Dothan, hem nating wari nomoa. Why nao olsem? Bikos hem garem strongfala faith long Jehovah. Iumi tu mas garem strongfala faith. So iumi shud askem God for holy spirit mekem iumi garem faith and olketa nara gudfala wei.—Luke 11:13; Gal. 5:22, 23.

Samting wea happen long Dothan hem strongim wei wea Elisha trustim Jehovah and olketa angel for protectim hem. Elisha luksavve God nao sendem kam olketa angel wea hem lukim. God duim mirakol for sevem Elisha and wakaman bilong hem taem hem mekem army bilong King for kamap blind. (2 Ki. 6:17-23) Long datfala hard taem and long olketa nara taem tu, Elisha showimaot hem garem faith and hem barava trustim Jehovah.

Iumi tu mas trustim Jehovah God olsem Elisha. (Prov. 3:5, 6) Sapos iumi duim olsem, God bae hapi long iumi and blessim iumi. (Ps. 67:1) Hem tru, olketa horse and chariot wea laet olsem fire no stap raonem iumi, bat Jehovah protectim pipol bilong hem distaem. And long taem bilong “datfala big trabol,” Jehovah bae protectim pipol bilong hem. (Matt. 24:21; Rev. 7:9, 14) Go kasem datfala taem, iumi mas evritaem tingim “God hem wanfala sef ples bilong iumi.”—Ps. 62:8.