KWESTIN FROM READER

Waswe, hem fitim for dadi and mami sidaon witim pikinini bilong tufala wea disfellowship long olketa meeting?

Long Kingdom Hall no eni rul stap for wea nao olketa wea disfellowship savve sidaon. Staka taem Wastaoa magasin hem encouragem olketa dadi and mami for givim spiritual help long pikinini wea disfellowship wea stap yet long haos. Olketa dadi and mami savve studyim Bible witim teenage pikinini bilong tufala wea disfellowship and wea stap yet long haos, olsem Wastaoa October 1, 2001, page 16 go kasem18 hem talem. Maet datwan bae helpem pikinini for kam bak long Jehovah.

Long taem bilong olketa meeting, teenage pikinini wea disfellowship savve sidaon kwaet witim dadi and mami bilong hem. From no eni rul stap for olketa wea disfellowship for mas sidaon long bihaen, pikinini wea disfellowship savve sidaon witim dadi and mami nomata wea nao olketa sidaon long Kingdom Hall. Dadi and mami laek for mek sure pikinini bilong tufala lisin gud mekem hem kasem gud samting from olketa meeting. For pikinini duim datwan, hem gud for hem sidaon witim dadi and mami winim wei for hem sidaon seleva.

Bat hao sapos pikinini wea disfellowship no stap long sem haos witim dadi and mami? Waswe, diswan minim hem no savve sidaon witim tufala? Olketa pablikeson bilong iumi hem storyim klia stretfala samting wea olketa Christian shud duim for no associate witim olketa relative wea disfellowship wea no stap long sem haos.a For man wea disfellowship sidaon witim olketa famili member long taem bilong meeting hem no semsem olsem wei for olketa famili member lukaotem eni excuse for associate witim hem. Sapos olketa famili member wea faithful garem stretfala tingting abaotem famili member wea disfellowship and olketa traem best for followim kaonsel long Bible for no associate witim hem, hem no samting for olketa narawan wari abaotem.—1 Cor. 5:11, 13; 2 John 11.

So iumi shud no wari sapos samwan wea disfellowship hem sidaon kwaet nomoa witim famili member or saed long eni narawan long kongregeson. For mekem rul abaotem hu nao samwan savve sidaon witim savve mekem samfala problem kamap. Olketa famili member wea faithful and evriwan wea kam long meeting mas traem best for followim olketa Bible principle abaotem samwan wea disfellowship and no duim eni samting wea bae mekem olketa nara brata and sista for stambol. Sapos evriwan followim olketa Bible principle, iumi shud no wari abaotem hu nao narawan sidaon witim long taem bilong meeting.b