Barava Hapi Long Olketa Reminder Bilong Jehovah

1. (a) Wanem difren tingting nao pipol savve garem taem olketa kasem kaonsel, and why nao olsem? (b) Taem man wea praod kasem kaonsel, hao nao hem ting long datwan?

PIPOL savve garem difren tingting abaotem reminder or kaonsel wea olketa kasem. Olsem example, maet samfala acceptim kaonsel from man wea garem paoa, bat no acceptim datwan from man wea sem age or wea no garem paoa ovarem olketa. Taem samfala kasem kaonsel maet olketa feel sorre or shame. Bat maet olketa narawan laek for duim samting followim datfala kaonsel. Why nao pipol garem olketa difren tingting olsem? Maet wanfala reason why man no laek for acceptim kaonsel hem bikos hem praod. Hem tingse datfala kaonsel no fitim hem, so hem les for followim datwan and hem no kasem eni gudfala samting.—Prov. 16:18.

2. Why nao olketa tru Christian tinghae long advaes wea kam from Bible?

² Bat olketa tru Christian no olsem. Iumi tinghae long gudfala advaes, especially sapos hem kam from Bible. Olketa reminder bilong Jehovah helpem iumi for luksavve long olketa danger samting. Olsem example, olketa helpem iumi for stap klia long olketa samting wea savve spoelem iumi, olsem wei for laekem tumas olketa material samting, wei for durong, and for iusim drug or drink tumas. (Prov. 20:1; 2 Cor. 7:1; 1 Thess. 4:3-5; 1 Tim. 6:6-11) And tu, taem iumi obeyim olketa reminder bilong God, datwan mekem iumi “garem gudfala heart.”—Isa. 65:14.

3. Wanem nao tingting bilong man wea raetem psalm wea iumi shud garem?

³ For fren gud witim Dadi bilong iumi long heven, iumi mas gohed followim wise kaonsel bilong Jehovah. Iumi shud garem sem tingting olsem man wea raetem psalm, wea sei: “Olketa reminder bilong iu bae stap olowe witim mi. Mi barava hapi long olketa”! (Ps. 119:111) Waswe, iu tu hapi long olketa law bilong Jehovah olsem datfala man wea raetem psalm? Or waswe, samfala taem iu tingse hem hard tumas for obeyim olketa? Nomata sapos samfala taem iu feel nogud long kaonsel wea iu kasem, no wikdaon. Iu savve strongim wei wea iu trustim wisdom bilong God! Bae iumi storyim thrifala samting wea iumi savve duim for helpem iumi long diswan.

PREA SAVVE STRONGIM WEI WEA IU TRUSTIM GOD

4. Nomata staka samting happen long laef bilong David, wanem nao hem duim evritaem?

⁴ Plande gud samting happen long laef bilong King David, bat plande nogud samting kasem hem tu. Nomata olsem, hem evritaem barava trustim Creator bilong hem. Hem sei: “Mi kam front long iu Jehovah for prea long iu, and mi trustim iu.” (Ps. 25:1, 2) Wanem nao helpem David lane for barava trustim Dadi bilong hem long heven?

5, 6. Storyim wei wea David hem fren witim Jehovah.

⁵ Staka pipol prea long God taem olketa kasem bigfala problem nomoa. Olketa olsem wanfala fren wea story long iu nomoa taem hem needim selen or laekem iu for duim samting for hem. Gogo, maet iu start for daotem sapos hem trufala fren bilong iu. Bat David hem no olsem. Olketa prea bilong hem showimaot hem barava lovem and trustim Jehovah long full laef bilong hem, nomata wanem samting nao kasem hem.—Ps. 40:8.

⁶ David praisem and showimaot hem tinghae long Jehovah taem hem sei: “Jehovah, Lord bilong mifala, nem bilong iu hem nambawan long evri ples long earth, olketa wea hae winim heven talemaot iu nambawan!” (Ps. 8:1) From datwan, iumi luksavve David fren gud witim Dadi bilong hem long heven. From hem tinghae long bigfala glory bilong Jehovah, hem laek for praisem hem “long full day.”—Ps. 35:28.

7. Wanem gud samting nao iumi savve kasem sapos iumi prea evritaem long Jehovah?

⁷ Olsem David, for strongim wei wea iumi trustim Jehovah, iumi mas story witim hem evritaem long prea. Bible sei: “Fren gud witim God and bae hem fren gud witim iufala.” (Jas. 4:8) Wei for prea long Jehovah helpem iumi for fren gud witim hem and hem wanfala important wei wea iumi savve kasem holy spirit tu.—Readim 1 John 3:22.

8. Taem iumi prea, why nao iumi shud trae for no talem sem toktok evritaem?

⁸ Taem iu prea, waswe, iu talem sem toktok evritaem? Sapos olsem, bifor iu prea, ting raonem firstaem wanem nao iu laek for talem. Sapos evritaem iu meetim wanfala fren iu talem sem toktok long hem, waswe, bae hem hapi long iu? Maet bae hem les for herem samting wea iu talem. Hem tru, Jehovah bae no les for herem prea bilong olketa wea worshipim hem. Nomata olsem, taem iumi prea iumi no laek for talem sem toktok evritaem.

9, 10. (a) Wanem nao iumi shud prea abaotem? (b) Wanem nao savve helpem iumi for prea long Jehovah from heart?

⁹ For fren gud witim God, iumi mas prea from heart. Taem iumi talem Jehovah evri tingting and feeling bilong iumi, datwan bae strongim wei wea iumi trustim hem. So wanem nao iumi shud prea abaotem? Bible hem sei: “Long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu.” (Phil. 4:6) Hem stret for iumi prea abaotem eni samting wea affectim laef bilong iumi or wei wea iumi fren witim God.

¹⁰ Iumi savve lanem staka samting from prea bilong olketa faithful man and woman bifor. (1 Sam. 1:10, 11; Acts 4:24-31) Olsem example, olketa Psalm fulap witim olketa prea and singsing for praisem Jehovah wea kam from heart bilong man. Olketa prea and singsing hia storyim evri feeling bilong man, nomata taem hem barava sorre or taem hem hapi fogud. Taem iumi readim and ting raonem olketa prea hia, datwan savve helpem iumi for prea long Jehovah from heart.

TING RAONEM OLKETA REMINDER BILONG GOD

11. Why nao iumi mas ting raonem olketa reminder bilong God?

¹¹ David hem sei: “Man savve trustim olketa reminder bilong Jehovah, and olketa mekem man wea no garem savve for kamap wise.” (Ps. 19:7) So sapos iumi no garem savve, iumi savve kamap wise taem iumi obeyim olketa law bilong God. Bat samfala kaonsel wea stap long Bible iumi mas ting raonem sapos iumi laek for gohed faithful. Olsem example, wei for ting raonem olketa Bible principle savve helpem iu for gohed faithful taem iu kasem test long skul or long ples iu waka. Wei for duim olsem savve helpem iu tu for obeyim olketa law bilong God saed long blood, wei for no teksaed, and for followim olketa Bible principle saed long kaleko and lukluk bilong iumi. Wei for ting raonem olketa principle bae redyim iumi for deal witim olketa samting hia. Then iumi savve disaed firstaem wanem for duim long olketa taem olsem. Taem iumi duim olketa samting hia iumi savve misstim staka problem.—Prov. 15:28.

12. Wei for ting raonem olketa wanem kwestin nao savve helpem iumi for followim olketa reminder bilong God?

¹² Taem iumi weitim olketa promis bilong God for kamap tru, waswe, iumi duim olketa samting wea showimaot iumi wekap long spiritual wei? Olsem example, waswe, iumi barava bilivim Bigfala Babylon hem klosap for finis? Waswe, iumi biliv strong yet long evri promis bilong God for future, olsem promis abaotem resurrection and laef olowe long paradaes long earth? Waswe, iumi gohed strong yet long ministry, or samting wea iumiseleva laekem nao hem main important samting long iumi? Waswe, iumi still barava tingim yet why hem important for nem bilong Jehovah kamap holy and for evriwan savve hem nomoa fit for rul? Wei for ting raonem olketa kwestin hia savve helpem iumi for mekem ‘olketa reminder bilong God gohed for stap olowe witim iumi.’—Ps. 119:111.

13. Why nao samfala Christian long first century no minim samfala samting? Storyim example.

¹³ Iumi no minim evri samting wea Bible story abaotem bikos hem no kasem yet taem bilong Jehovah for showimaot datwan. Staka taem Jesus talem olketa aposol bilong hem bae hem safa and dae. (Readim Matthew 12:40; 16:21.) Bat olketa aposol no minim samting wea hem talem. Bihaen Jesus laef bak and olketa disaepol lukim hem and hem helpem olketa for minim gud olketa profesi abaotem Christ, olketa just minim nao wanem hem talem. (Luke 24:44-46; Acts 1:3) And tu, taem olketa follower bilong Christ kasem holy spirit long Pentecost 33 C.E., olketa just minim nao Kingdom bilong God bae rul from heven.—Acts 1:6-8.

14. Wanem gudfala example nao olketa brata bilong iumi showimaot long start bilong mek-20 century?

¹⁴ Long start bilong mek-20 century tu olketa tru Christian no garem stretfala tingting abaotem wanem bae happen long “olketa last day.” (2 Tim. 3:1) Olsem example, long 1914 samfala tingse olketa klosap nao for go long heven, bat datwan hem no happen. Olketa Christian hia gohed studyim Bible and luksavve bigfala preaching waka stap yet for olketa duim. (Mark 13:10) So long 1922, Joseph Rutherford, wea lead long preaching waka long datfala taem, givim tok long datfala international convention long Cedar Point, Ohio, U.S.A., and hem sei: “Lukim, King hem rul finis! Iufala nao mas talem pipol abaotem hem. So talemaot, talemaot, talemaot nius abaotem King and kingdom bilong hem.” Start long datfala taem, pipol luksavve Olketa Jehovah’s Witness pipol wea “preachim datfala gud nius abaotem Kingdom.”—Matt. 4:23; 24:14.

15. Why nao hem gud for iumi ting raonem samting wea Jehovah duim for pipol bilong hem?

¹⁵ Hem gud for ting raonem olketa nambawan samting wea Jehovah duim for mekem olketa promis bilong hem kamap tru for pipol bilong hem long bifor and distaem. Datwan helpem iumi barava trustim wei wea Jehovah fit for duim samting wea hem promis for duim long future. Wei for ting raonem olketa promis bilong God bae helpem iumi for luk forward long olketa, and strongim wei wea iumi trustim God for mekem olketa promis hia kamap tru.

DUIM WAKA BILONG GOD FOR STRONGIM WEI WEA IU TRUSTIM HEM

16. Taem iumi gohed busy long waka bilong God, wanem blessing nao iumi kasem?

¹⁶ God bilong iumi Jehovah garem bigfala paoa and hem man for duim samting. Man wea raetem psalm hem sei: “Jah, no eniwan strong olsem iu. Hand bilong iu strong and raet hand bilong iu garem bigfala paoa.” (Ps. 89:8, 13) Jehovah hapi taem iumi traem best long waka bilong hem, and hem blessim iumi for datwan. Hem lukim olketa man, woman, olketa young wan, and olketa olo wea worshipim hem olketa “no lesy,” bat olketa waka hard. (Prov. 31:27) Taem iumi busy long waka bilong Jehovah, iumi followim example bilong Creator bilong iumi. Jehovah hapi taem iumi traem best for duim waka bilong hem, and iumi hapi tu.—Readim Psalm 62:12.

17, 18. Taem iumi duim wanem Jehovah talem, hao nao datwan strongim wei wea iumi trustim hem? Storyim example.

¹⁷ Hao nao wei for duim olketa samting wea showimaot iumi garem faith helpem iumi for trustim Jehovah? Tingim samting wea happen taem nation bilong Israel redi for go insaed Promis Land. Jehovah talem olketa priest wea karem ark bilong agreement for march go stret insaed long Jordan River. Bat taem olketa kasem datfala river, olketa lukim rain hem mekem river hia hem hae and hem ran bikos hem season bilong rain. Wanem nao olketa Israelite bae duim? Waswe, bae olketa weit saed long river for samfala week go kasem taem river hem go daon? Nomoa, olketa barava trustim Jehovah and duim wanem hem talem. Wanem nao happen? Bible sei: “Taem olketa priest step go insaed long wata, semtaem nomoa river hem stop nao.” Then “olketa priest standap long midol long datfala river wea kamap drae . . . taem olketa narawan katkros go long narasaed.” (Josh. 3:12-17, Contemporary English Version) Masbi olketa Israelite barava hapi for lukim datfala river hem stop! From olketa duim wanem Jehovah talem, datwan strongim faith bilong olketa long Jehovah.

¹⁸ Jehovah no duim olketa mirakol olsem for pipol bilong hem distaem. Nomata olsem, hem blessim iumi taem iumi showimaot faith and duim wanem hem talem. Holy spirit bilong God helpem iumi for no fraet for preachim message abaotem Kingdom evriwea long world. And Jesus Christ, datfala faithful witness bilong Jehovah, promis for sapotim olketa disaepol bilong hem long disfala important waka. Hem sei: “Iufala go and teachim pipol long evri kantri for kamap disaepol bilong mi.” Then hem promisim olketa: “Bae mi stap witim iufala go kasem taem wea world hem finis.” (Matt. 28:19, 20) Staka Witness wea shame or fraet for story long difren pipol sei holy spirit nao helpem olketa for no fraet taem olketa duim preaching waka.—Readim Psalm 119:46; 2 Corinth 4:7.

19. Nomata sapos iumi no savve duim staka samting long waka bilong God, wanem nao iumi savve sure long hem?

¹⁹ Samfala brata and sista wea sik or olo no savve duim staka samting long waka bilong God. Nomata olsem, olketa trustim wei wea “Dadi wea kaen and sorre long iumi, and . . . wea givim iumi comfort wea iumi needim” hem minim datwan. (2 Cor. 1:3) Hem tinghae long wanem iumi fit for duim long waka bilong hem. Iumi evriwan mas no forget, faith bilong iumi long sakrifaes bilong Christ nao main samting wea bae sevem iumi.—Heb. 10:39.

20, 21. Hao nao iumi savve showimaot iumi trustim Jehovah?

²⁰ Iumi iusim taem, strong, and samting iumi garem for worshipim Jehovah. Iumi laek traem best bilong iumi long preaching waka. (2 Tim. 4:5) Iumi hapi tu for helpem nara pipol for garem “stretfala savve abaotem olketa tru teaching.” (1 Tim. 2:4) Taem iumi praisem Jehovah and mekhae long hem, iumi kasem staka spiritual blessing. (Prov. 10:22) Datwan savve helpem iumi tu for barava trustim Creator bilong iumi.—Rome 8:35-39.

²¹ Olsem iumi storyim, iumi mas lane for trustim Jehovah for givim iumi olketa gudfala reminder. So prea long God for strongim wei wea iu trust long hem. Ting raonem hao Jehovah mekem olketa promis bilong hem kamap tru long bifor and wei wea hem bae duim sem samting long future. And gohed lane for strongim wei wea iu trustim Jehovah long wei for duim waka bilong hem. No forget, olketa reminder bilong Jehovah bae stap for olowe, and sapos iu followim olketa, iu savve stap for olowe tu!