Waswe, Iu Changem Wei Bilong Iu?

1, 2. Hao nao famili bilong iumi, olketa fren, kastom, and community wea iumi growap savve affectim iumi?

FAMILI bilong iumi, olketa fren, kastom, and community wea iumi growap savve affectim iumi evriwan. Olketa samting hia savve affectim kaikai iumi laekem, kaleko iumi werem, and wei bilong iumi.

² Bat samfala samting hem important winim kaikai and kaleko. Olsem example, taem iumi growap, iumi lanem wanem nao stret and no stret. Bat pipol garem difren tingting abaotem wanem nao stret and no stret. Konsens bilong iumi tu affectim wanem iumi duim. Bible sei staka taem “pipol . . . duim samting wea law bilong God talem nomata olketa no savve long datfala law.” (Rome 2:14) Bat sapos no eni law bilong God hem stap for wanfala samting, waswe, hem olraet nomoa for iumi followim tingting bilong famili bilong iumi or bilong pipol long ples wea iumi stap?

3. Wanem nao tufala reason why olketa Christian no followim olketa standard bilong pipol long world?

³ For olketa Christian, ansa hem nomoa. Wanfala reason hem bikos Bible sei: “Man savve followim wei wea luk stret long hem bat diswan lead go long dae.” (Prov. 16:25) From iumi no perfect, iumi no fit for luksavve long best wei for followim. (Prov. 28:26; Jer. 10:23) Mek-tu reason, Bible sei Satan nao “god bilong disfala world.” Hem nao kontrolem olketa wei and standard wea pipol bilong disfala world followim. (2 Cor. 4:4; 1 John 5:19) Sapos iumi laek for mekem Jehovah hapi and for hem blessim iumi, iumi mas followim kaonsel long Rome 12:2.—Readim.

4. Wanem nao bae iumi storyim long disfala study?

⁴ Disfala study bae storyim thrifala important point wea stap long Rome 12:2: (1) Why nao iumi mas ‘change’? (2) Wanem samting nao iumi mas changem? and (3) Wanem nao savve helpem iumi for change? Distaem bae iumi storyim thrifala kwestin hia.

WHY NAO IUMI MAS CHANGE?

5. Paul raetem toktok long Rome 12:2 for hu?

⁵ Taem Paul raetem leta for olketa long Rome long 56 C.E., hem no raet for pipol long Rome. Hem raet for olketa anointed Christian wea stap long there. (Rome 1:7) Hem encouragem olketa for changem wei bilong olketa and “no gohed followim wei bilong pipol long disfala world.” Taem Paul hem sei “wei bilong pipol long disfala world,” datwan savve minim tu tingting bilong pipol long Rome abaotem samting wea stret and no stret, olketa kastom, and kaleko bilong olketa. Paul sei “no gohed followim,” bikos samfala brata and sista garem yet wei and tingting olsem pipol long Rome. Hao nao datwan affectim olketa brata and sista long datfala taem?

6, 7. Long taem bilong Paul, why nao laef hem no isi for olketa Christian long Rome?

⁶ Taem olketa tourist visitim Rome distaem, olketa lukim olketa old temple and building wea stap for plande thousand year. Olketa building hia helpem iumi for lane abaotem laef and religion bilong pipol long Rome bifor. Olketa buk wea storyim history story abaotem faet bilong olketa gladiator, olketa chariot resis, and olketa drama witim music, wea samfala story hem abaotem olketa dirty samting. Rome hem wanfala rich taon wea pipol garem staka chance for kasem selen.—Rome 6:21; 1 Pet. 4:3, 4.

⁷ Nomata pipol long Rome garem staka temple and staka god, olketa no trae fren witim olketa god wea olketa worshipim. Religion bilong olketa hem join nomoa witim olketa kastom samting wea olketa duim taem man born, marit, and dae, and hem affectim laef bilong olketa evriday. So hem no isi for olketa Christian wea stap long Rome. Staka long olketa worshipim olketa false god bifor, so olketa mas changem wei bilong olketa for kamap Christian. Nomata bihaen olketa baptaes, olketa mas gohed changem wei bilong olketa.

8. Why nao olketa Christian stap long danger long disfala world?

⁸ Distaem tu, olketa Christian stap long danger long disfala world. Why nao olsem? Bikos tingting bilong pipol long world hem showaot long staka samting. (Readim Ephesus 2:2, 3; 1 John 2:16.) Evriday iumi stap midolwan pipol wea wei and tingting bilong olketa and samting olketa laekem hem nogud, and datwan savve spoelem iumi. So iumi mas followim datfala kaonsel for “no gohed followim wei bilong pipol long disfala world,” and for “changem wei bilong [iumi].” Hao nao iumi savve duim datwan?

WANEM SAMTING NAO IUMI MAS CHANGEM?

9. Wanem nao staka pipol changem long laef bilong olketa mekem olketa fit for baptaes?

⁹ Taem man hem studyim Bible and followim wanem hem lanem, hem start for fren gud witim Jehovah. Hem lusim false religion and changem samfala samting long laef bilong hem. Hem traem best for garem niufala wei and followim wei bilong Jesus. (Eph. 4:22-24) Evri year iumi hapi for lukim staka thousand pipol gohed gud olsem, olketa dedicate long Jehovah God, and baptaes. Diswan mekem Jehovah barava hapi. (Prov. 27:11) Bat waswe, hem nomoa samting wea man mas changem?

10. Hao nao wei for change hem no minim for kamap gud winim bifor nomoa?

¹⁰ Wei for change hem no minim for kamap gud winim bifor nomoa. Olsem example, maet wanfala company sei bred wea olketa wakem distaem hem gud winim bifor. Maet hem garem wanfala niu samting nomoa insaed or hem garem niu nem nomoa. Bat datfala bred hem klosap semsem olsem bifor. Wanfala Bible dictionary sei datfala toktok “changem wei” long Rome 12:2 savve minim tu for mekem tingting bilong iumi niu, or for holy spirit helpem iumi for barava changem tingting bilong iumi. So taem Christian changem wei bilong hem, hem no just lusim nomoa olketa nogud wei, toktok wea no fitim, or wei for durong. Samfala pipol no duim olketa nogud samting hia nomata olketa no savve long wanem Bible talem. So wanem nao iumi olketa Christian mas duim for changem wei and tingting bilong iumi?

11. Wanem nao Paul sei man mas duim for changem wei bilong hem?

¹¹ Paul sei: “Changem wei bilong iufala long wei for changem tingting.” Long start long leta bilong Paul for olketa long Rome, hem story abaotem pipol wea “garem tingting wea no stret . . . Olketa evritaem duim samting wea no stret, duim sin, greedy, and garem nogud wei. Olketa jealous, killim dae nara pipol, raoa, laea,” and duim olketa nara nogud samting. (Rome 1:28-31) Dastawe Paul encouragem olketa Christian wea stap midolwan long pipol olsem for “changem wei bilong [olketa] long wei for changem tingting.”

12. Plande pipol distaem garem wanem kaen tingting, and why nao olketa Christian wea garem tingting olsem stap long danger?

¹² Plande pipol long world garem kaen tingting wea Paul storyim. Olketa tingse olketa standard and principle long Bible hem no fitim taem bilong iumi, and no eniwan shud forcem narawan for followim olketa. Plande teacher and dadi and mami letem olketa pikinini duim eni samting wea olketa laekem. Olketa talem pikinini evri man free for disaed seleva wanem nao stret and no stret. Long tingting bilong pipol olsem, no eni wei for man barava savve wanem nao stret and no stret. Plande pipol wea sei olketa biliv long God tu tingse hem no important for olketa duim wanem God sei hem stret. (Ps. 14:1) Sapos olketa Christian garem tingting olsem, olketa stap long danger. Sapos iumi no careful, maet tingting olsem stopem iumi for no gohed followim direction wea iumi kasem from organization bilong God, and maet iumi start for komplen tu abaotem eni samting wea iumi no laekem. Or maet iumi no barava agree witim kaonsel wea iumi kasem from Bible abaotem hapitaem, wei for iusim Internet, and hae education.

13. Why nao iumi mas no laea long iumiseleva abaotem wanem kaen man nao iumi?

¹³ For iumi “no gohed followim wei bilong pipol long disfala world,” wea minim iumi no letem pipol long world affectim tingting bilong iumi, iumi mas no laea long iumiseleva abaotem wanem kaen man nao iumi. Iumi mas honest long iumiseleva abaotem hao iumi ting long samting, and olketa goal and standard bilong iumi. Maet olketa narawan no savve wanem nao long heart bilong iumi, and maet olketa praisem iumi and sei iumi gohed gud. Bat iumiseleva nomoa savve sapos iumi letem samting iumi lanem from Bible for changem wei bilong iumi, and sapos iumi gohed for duim olsem or nomoa.—Readim James 1:23-25.

WANEM NAO SAVVE HELPEM IUMI FOR CHANGE?

14. Wanem nao bae helpem iumi for savve long wanem iumi mas changem?

¹⁴ For changem wei bilong iumi, iumi mas changem wanem nao long heart bilong iumi. Wanem nao savve helpem iumi for mekem bigfala change olsem? Taem iumi studyim Bible, iumi lanem wanem nao Jehovah laekem iumi for duim. Tingting bilong iumi abaotem samting wea iumi readim long Bible savve helpem iumi for luksavve wanem nao long heart bilong iumi. Diswan bae helpem iumi for savve wanem nao iumi mas changem mekem iumi duim ‘samting wea God hapi long hem.’—Rome 12:2; Heb. 4:12.

15. Taem iumi letem Jehovah for stretem iumi, datwan helpem iumi for duim wanem?

¹⁵ Readim Isaiah 64:8. Tingim wanem iumi savve lanem from datfala tokpiksa bilong profet Isaiah. Iumi olsem clay, and Jehovah hem olsem man wea wakem samting long clay. Taem Jehovah stretem iumi, hem no changem lukluk bilong iumi, bat hem changem heart bilong iumi. Taem iumi letem hem for stretem iumi, hem helpem iumi for changem heart and tingting bilong iumi. Hem barava important for iumi duim datwan, mekem iumi savve againstim olketa nogud wei bilong world. Wanem nao Jehovah duim for stretem iumi?

16, 17. (a) Sapos man laek for wakem spesol samting long clay, wanem nao hem mas duim firstaem long datfala clay? (b) Hao nao Bible helpem iumi for change mekem iumi kamap wanfala spesol samting wea Jehovah savve iusim?

¹⁶ Taem man laek wakem spesol samting long clay hem mas iusim best clay wea hem savve faendem. Bat firstaem hem mas duim tufala samting. Hem mas klinim gud datfala clay, then hem mas mixim witim wata, mekem datfala clay no brek taem hem sheipim.

¹⁷ Hem iusim wata for mekem datfala clay soft and isi for sheipim tu. Taem hem duim datwan, hem savve wakem eni samting wea hem laekem, and maet wanfala spesol samting tu. Olsem wata savve changem clay, Bible savve changem iumi. Taem iumi start for lane abaotem God, Bible helpem iumi for lusim tingting bilong pipol long world and for garem sem tingting olsem God. From datwan, God fit for changem iumi and mekem iumi kamap wanfala spesol samting wea hem savve iusim. (Eph. 5:26) Iumi kasem staka reminder for readim Bible evriday and for no misstim olketa meeting. Why nao olsem? Bikos taem iumi duim olketa samting hia, iumi letem Jehovah for stretem iumi.—Ps. 1:2; Acts 17:11; Heb. 10:24, 25.

18. (a) Sapos iumi laekem Bible for helpem iumi change, why nao iumi mas ting raonem samting wea iumi readim and lanem? (b) Wanem nao samfala kwestin wea savve helpem iumi for duim datwan?

¹⁸ Sapos iumi laekem Bible for changem iumi, hem no inaf for iumi readim and studyim nomoa. Plande pipol readim Bible and savve gud long hem. Maet iu meetim samfala pipol olsem taem iu duim preaching waka. Samfala savve baeheartim olketa Bible scripture tu.a Bat plande taem datwan no changem tingting or laef bilong olketa. Why nao olsem? Bikos Bible savve changem nomoa pipol wea letem message bilong hem for kasem heart bilong olketa. For duim olsem, iumi mas ting raonem wanem iumi lanem from Bible and tingim olketa kwestin hia: ‘Waswe, mi bilivim samting wea mi lanem hem barava tru and no just wanfala teaching bilong religion nomoa? Waswe, mi lukim pruv long laef bilong mi samting wea mi bilivim hem barava tru? Waswe, mi followim samting wea mi lanem and no just teachim datwan long narawan nomoa? Waswe, mi bilivim samting wea mi lanem hem kam from Jehovah, olsem hemseleva nao story kam for mi?’ Sapos iumi ting raonem olketa kwestin olsem, datwan bae helpem iumi for fren gud witim Jehovah. Taem samting wea iumi lanem hem kasem heart bilong iumi, bae iumi laek for changem samfala samting long laef bilong iumi for mekem God hapi.—Prov. 4:23; Luke 6:45.

19, 20. Wanem gud samting nao bae iumi kasem sapos iumi followim wanem Bible talem?

¹⁹ Sapos iumi readim Bible evritaem and ting raonem, datwan bae helpem iumi for gohed duim samting wea Paul talem. Hem sei: “Iufala mas lusim old wei bilong iufala and iufala mas garem niufala wei wea God hem givim and wea tru samting abaotem hem nao helpem man for garem.” (Col. 3:9, 10) Sapos iumi minim gud wanem Bible teachim and followim wanem iumi lanem, bae iumi laek for garem niufala wei wea savve protectim iumi from olketa trap bilong Satan.

²⁰ Aposol Peter hem sei: “From iufala olketa pikinini wea obey, no followim olketa old wei wea iufala garem taem iufala no savve long God. Bat iufala mas holy long evri samting wea iufala duim.” (1 Pet. 1:14, 15) Nextfala study bae storyim olketa blessing wea iumi bae kasem from Jehovah sapos iumi traem best for changem tingting and wei bilong iumi.