‘God Bae Givim Gud Samting Long Olketa wea Barava Lukaotem Hem’

Taem olketa wea worshipim Jehovah traem best for mekem hem hapi, waswe, Jehovah tinghae long datwan? Samfala maet sei nomoa and tingse God no interest long iumi. Bat hem no stret for garem kaen tingting olsem abaotem God. Bible nao talem trufala samting abaotem God. Hem helpem iumi for luksavve Jehovah tinghae long olketa wea faithful for worshipim hem. Iumi bae storyim wanem aposol Paul talem long Hebrew 11:6.

Wanem nao iumi mas duim for mekem Jehovah hapi? Paul sei: “Man wea no garem faith no savve mekem God hapi.” Paul no sei, “hem bae no isi for man wea no garem faith for mekem God hapi.” Bat hem sei man wea no garem faith no savve mekem God hapi. So datwan minim, iumi mas garem faith for mekem God hapi.

Wanem kaen faith nao iumi mas garem? Tufala samting bae showimaot sapos iumi garem trufala faith long God. First samting, iumi “mas biliv [God] hem stap.” Bae hem hard for iumi mekem God hapi sapos iumi no bilivim hem stap. Bat iumi mas duim nara samting for showimaot iumi garem trufala faith bikos olketa demon tu bilivim Jehovah hem stap. (James 2:19) Iumi showimaot iumi biliv God hem stap, taem iumi evritaem duim wanem hem laekem.​—James 2:20, 26.

Mek-tu samting, iumi “mas biliv” God “bae givim gud samting” long iumi. Man wea garem trufala faith hem barava sure hem no hard waka nating taem hem traem best for duim wanem God laekem. (1 Corinth 15:58) Bae hem hard for iumi mekem Jehovah hapi sapos iumi tingse hem bae no givim gud samting long iumi. (James 1:17; 1 Peter 5:7) Man wea sei God no kaen and no tinghae long iumi, hem no savve gud long datfala tru God.

Hu nao Jehovah bae givim gud samting long olketa? Paul hem sei, “olketa wea barava lukaotem hem.” Wanfala buk wea helpem olketa wea transleitim Bible sei datfala Greek word wea olketa transleitim “barava lukaotem” hem no minim for savve long hem nomoa, bat hem minim for traem best for worshipim God. Nara buk hem sei datfala Greek verb hem minim for barava waka hard. Tru tumas, Jehovah hem givim gud samting long olketa wea strong for worshipim hem and lovem hem from olketa garem faith.—Matthew 22:37.

Wanem nao gud samting wea Jehovah bae givim long olketa wea faithful for worshipim hem? Hem promis for givim long olketa wanfala nambawan future, wea hem nao for laef olowe long Paradaes long earth. Datwan showimaot Jehovah hem kaen tumas and garem bigfala love. (Revelation 21:3, 4) Nomata distaem tu, olketa wea barava lukaotem Jehovah kasem olketa nambawan blessing. Olketa hapi and satisfae from holy spirit bilong God helpem olketa and olketa followim olketa gudfala advaes long Bible.​—Psalm 144:15; Matthew 5:3.

Tru nao, Jehovah hem God wea tinghae long olketa wea faithful for worshipim hem. From iu savve long datwan, waswe, iu laek for fren gud witim hem? Sapos olsem, bae hem gud for iu lane abaotem hao for garem and for showimaot datfala faith mekem Jehovah blessim iu.