ANSA FOR OLKETA BIBLE KWESTIN

Wanem nao Bible teachim abaotem God?

God hem wanfala spirit wea iumi no savve lukim. Hem wakem olketa samting long skae, long earth, and evri nara samting. (Psalm 90:2) God laekem pipol for savve long tru samting abaotem hem.​—Readim Acts 17:24-27.

God hem garem nem. Taem iumi lukluk long olketa samting wea hem wakem, datwan bae helpem iumi for savve long samfala wei bilong hem. (Rome 1:20) Bat for savve gud long God, iumi mas studyim Bible. Long Bible iumi savve lane abaotem olketa wei bilong hem.​—Readim Psalm 103:7-10.

Hao nao God ting long olketa samting wea no stret?

Jehovah, God wea wakem iumi, heitim olketa samting wea no stret. And hem wakem olketa man for olsem hem. (Deuteronomy 25:16) Dastawe staka pipol les long olketa samting wea no stret. God no kosim olketa nogud samting wea happen. Hem letem man seleva for disaedem samting. Bat staka pipol disaed for duim samting wea no stret. Datwan mekem ‘heart bilong Jehovah sorre.’​—Readim Genesis 6:5, 6; Deuteronomy 32:4, 5.

Jehovah laekem tumas for duim samting wea stret, and hem bae stretem olketa nogud samting. (Psalm 37:28, 29) Long Bible, God promisim klosap nao bae hem finisim olketa samting wea no stret.​—Readim 2 Peter 3:7-9, 13.