Wanfala War wea Changem Evri Samting

Long 1914 World War I hem start and disfala year 2014, hem mek-100 year bihaen datwan. Long datfala taem, staka million young man lusim famili bilong olketa and go for faet long World War I. From olketa hia tinghae long kantri bilong olketa, olketa willing for go faet. Wanfala soldia bilong America sei: “Mi hapi tumas for go faet long datfala war.”

Bat no eniwan tingse olketa army bae gohed for faet long Belgium and France for longfala taem. Gogo olketa soldia start for luksavve war hem barava nogud samting. Long datfala taem, olketa kolem war hia “Bigfala War.”

Long World War I, samfala sei samting olsem 10 million pipol dae and 20 million pipol garekil or lusim leg, hand, or eye bilong olketa. Olketa nogud samting hia happen bikos olketa bigman mekem olketa nogud disison. Olketa bigman long gavman bilong Europe no savve stretem olketa raoa wea kamap midolwan long olketa kantri, wea gogo diswan startim datfala war wea staka kantri join insaed. War hia barava spoelem staka samting. Hem changem olketa samting wea affectim iumi distaem tu.

OLKETA NOGUD DISISON WEA SPOELEM TRUST

World War I start bikos olketa bigman mekem olketa nogud disison. Wanfala buk, The Fall of the Dynasties—The Collapse of the Old Order 1905-1922, storyim olketa bigman long gavman bilong Europe no luksavve samting wea olketa disaedem bae kosim nogud samting for happen long world.

Long June 28, 1914, wanfala man killim dae Archduke bilong Austria and bihaen tu-thri week olketa kantri long Europe startim disfala war, nomata no eniwan laekem diswan for happen. Tu-thri day bihaen war hem start, samwan askem bigman long gavman bilong Germany why nao disfala war hem start. Hem sei: “Mi tu no minim diswan.”

Olketa bigman wea disaedem olketa samting wea kosim datfala war no luksavve wanem nao bae kamaot from datwan. Bat kwiktaem nomoa olketa soldia start for luksavve long samting wea olketa bigman duim. Olketa bigman bilong gavman no duim wanem olketa promisim long olketa soldia, olketa bigman bilong religion trikim olketa, and olketa bigman bilong army laea long olketa. Long wanem wei nao olketa duim olsem?

Olketa bigman bilong gavman sei datfala war bae openem wei for olketa man garem gudfala laef. Wanfala bigman long gavman bilong Germany sei long future, pipol long Germany bae garem gudfala living and evriwan bae stap sef. Woodrow Wilson wea hem president bilong America long bifor sei datfala war bae helpem democracy for gohed long world. And long Britain, pipol tingse “disfala war bae finisim evri nara war.” Bat evri samting hia nating happen nomoa.

Olketa bigman bilong religion barava sapotim datfala war. Wanfala buk, The Columbia History of the World hem sei olketa bigman shud teachim pipol abaotem Bible, bat olketa encouragem pipol for faet long war, and datfala war mekem pipol evriwea for heitim nara pipol. Olketa bigman hia encouragem pipol for duim olsem. Wanfala buk, A History of Christianity sei: “Olketa bigman long religion saedem kantri and no followim biliv bilong olketa. Staka long olketa sei sapos iu wanfala Christian, iu mas lovem kantri bilong iu. Olketa talem olketa soldia nomata olketa Christian olketa mas killim dae narawan long nem bilong God.”

Olketa bigman bilong army promisim olketa soldia olketa bae kwiktaem nomoa winim datfala war, bat datwan no happen. Army long tufala saed gohed for faet nomata no eniwan hem win. Wanfala man for raet abaotem history sei barava nogud samting hem kamaot from datwan, and staka million soldia garekil or no savve tingting stret bihaen datwan. Nomata olketa bigman savve olketa soldia go for dae bilong olketa, olketa talem olketa soldia for gohed faet. Gogo olketa soldia les for followim wanem olketa bigman talem.

Long wanem wei nao World War I hem spoelem laef bilong pipol? Wanfala soldia wea faet long datfala war sei: “War hia . . . spoelem tingting and wei bilong pipol long datfala taem.” And tu, datfala war finisim wei wea samfala gavman rul ovarem olketa nara kantri. Hem start bilong olketa nogud samting wea gohed long mek-20 century and olketa nogud samting hia hem winim eni samting wea happen bifor. Olketa wakaman strike and wei for againstim gavman hem kamap normal samting nomoa.

Why nao datfala war hem changem evri samting? Waswe, diswan hem samting wea seknomoa happen? Ansa for tufala kwestin hia bae helpem iumi for savve wanem nao bae happen long future.