Evriwea Mi Go Mi Tekem Gun Bilong Mi

LAEF BILONG MI BIFOR:

Mi born and growap long Rome, and mi stap long ples wea olketa pipol poor. Laef bilong mi hem no isi. No enitaem mi story witim mami bilong mi and mi no stap gud tu witim dadi bilong mi. Mi stap witim pipol wea duim olketa nogud samting.

Mi start for steal taem mi ten year nomoa. Firstaem mi trae for lusim famili bilong mi hem taem mi 12 year. From mi duim olketa nogud samting, tu-thri taem nao dadi bilong mi mas kam tekem mi from police station. Staka taem mi raoa witim pipol, mi raf tumas, and mi kros long evriwan nomoa. Taem mi 14 year, mi lusim famili bilong mi nao. Mi start for iusim drug and stap long street. From mi no garem eni ples for sleep, mi savve go insaed eni car wea stap long saed road nomata hem lok and sleep long there go kasem early morning. Then mi go lukaotem eni wata long taon for wasim body bilong mi.

Gogo mi savve tumas hao for steal. Olsem example, mi savve ranawe witim basket bilong man and long naet mi savve go stealim haos bilong pipol. Wanfala rabis gang herem mi savve tumas for duim olketa nogud samting, so olketa laekem mi for joinim olketa and datwan mekem mi savve stealim olketa bank tu. Olketa narawan long gang hia tinghae long mi bikos mi man for raf and kwiktaem for kros. Evriwea mi go mi tekem gun bilong mi, and taem mi sleep mi putim andanit long pilo bilong mi tu. Hem wei bilong mi nao for raf, iusim drug, steal, talem olketa rabis toktok, and mi man for olobaot. Evritaem olketa police lukaotem mi and staka taem nao olketa arrestim mi and mi go long prison.

BIBLE CHANGEM LAEF BILONG MI:

Bihaen mi aot from prison, mi go lukim wanfala aunty bilong mi. Mi no savve datfala aunty and tufala pikinini bilong hem Olketa Jehovah’s Witness. Olketa invaetem mi for go long meeting bilong olketa Witness. Mi interest for savve moa abaotem datwan, so mi go witim olketa. Taem mifala arrive long Kingdom Hall, mi talem olketa mi bae sidaon long bihaen nomoa. Mi laek duim datwan for chekim hu nao kam insaed. Long datfala taem mi holem gun bilong mi tu.

Wanem mi lukim long datfala meeting changem laef bilong mi. Hem olsem mi stap long barava difren ples. Staka pipol smile and sei hello long mi. Mi lukim olketa Witness kaen and mi feel olsem mi savve trustim olketa. Olketa Witness barava difren from pipol wea mi stap witim olketa!

Mi start for studyim Bible witim olketa Witness. Wanem mi lanem helpem mi for luksavve mi mas changem staka samting long laef bilong mi. Mi ting raonem toktok wea stap long Proverbs 13:20 wea sei: “Man wea fren witim pipol wea wise bae hem wise, bat man wea fren witim pipol wea krangge bae hem kasem nogud samting.” Mi luksavve mi mas lusim datfala gang. Hem no isi, bat Jehovah nao helpem mi for duim datwan.

Mi changem olketa nara samting tu. From mi traem best bilong mi, gogo mi stop smoke and no iusim drug. Mi katem short nao hair bilong mi, no werem earring nao, and mi stop for talem rabis toktok. Hem nao firstaem wea mi duim olketa samting wea stret.

Mi no man for read and study, so hem no isi for studyim Bible. Bat taem mi traem best for duim datwan, mi start for lovem Jehovah and konsens bilong mi hem pokem mi. Staka taem mi ting daonem miseleva and mi daotem sapos Jehovah savve forgivim mi long olketa nogud samting wea mi duim. Taem mi feel olsem, samting wea savve helpem mi nao hem for readim long Bible wei wea Jehovah forgivim King David bihaen hem duim olketa bigfala sin.—2 Samuel 11:1–12:13.

Hem no isi tu for mi go preach long pipol long haos bilong olketa. (Matthew 28:19, 20) Mi wari nogud mi meetim samwan wea mi duim nogud samting long hem bifor! Bat gogo mi luksavve mi mas gohed for preach nomoa. Mi start for enjoyim wei for helpem olketa narawan for lane abaotem nambawan Dadi bilong iumi long heven, wea willing for forgivim iumi.

GUD SAMTING WEA MI KASEM:

Sapos mi no lane abaotem Jehovah ating mi dae finis! Staka long olketa fren bilong mi bifor, samfala dae finis and samfala stap long prison, bat mi garem gudfala laef and mi luk forward long wanfala nambawan future. Mi trae for hambol, obeyim Jehovah, and for kontrolem kros bilong mi. From mi duim olsem, mi fren gud witim olketa narawan. Mi maritim naesfala woman wea nem bilong hem Carmen, and mitufala enjoyim laef tugeta. Mitufala helpem olketa narawan for lanem olketa samting long Bible, and datwan mekem mitufala hapi.

And iu savve, distaem mi duim gudfala waka nao. Samfala taem mi savve waka long bank, bat mi no stealim bank, mi klinim nomoa!