Wanem Jehovah Duim for Fren Gud Witim Iumi

1. Wanem nao iumi olketa man needim, and hu nao olketa wea iumi savve fren gud witim hem?

IUMI olketa man need for fren gud witim narawan. Iumi hapi taem iumi garem olketa famili member and fren wea lovem iumi, tinghae long iumi, and minim iumi. Bat main wan wea iumi need for fren gud witim hem nao, hem Creator bilong iumi Jehovah.—Eccl. 12:1.

2. Wanem nao Jehovah promisim long iumi, bat why nao staka pipol no bilivim diswan?

² Jehovah laekem iumi for fren witim hem. Hem promisim iumi sapos iumi “fren gud” witim hem, “bae hem fren gud” witim iumi. (Jas. 4:8) Iumi hapi for savve long datwan! Bat staka pipol tingse hard tumas for God laek fren witim olketa. Olketa tingse olketa no fit for fren witim hem, or hem farawe tumas from olketa. Waswe, iumi olketa man savve fren gud witim Jehovah?

3. Waswe, iumi savve fren gud witim Jehovah?

³ Iumi olketa man savve fren gud witim Jehovah, “bikos hem no hard nomoa for savve long hem.” (Readim Acts 17:26, 27; Psalm 145:18.) Nomata iumi no perfect, Jehovah hem willing for fren gud witim iumi. (Isa. 41:8; 55:6) Man wea raetem psalm hem fren gud witim Jehovah, and hem sei: “God wea iu herem prea, evri difren kaen pipol bae kam long iu. Man wea iu chusim and invaetem hem for kam long iu bae hem hapi.” (Ps. 65:2, 4) Distaem bae iumi story abaotem King Asa wea rul long Judah. Bible storyim wei wea Asa fren gud witim God, and wei wea God fren gud witim hem.a

LANE FROM EXAMPLE BILONG KING ASA

4. Wanem gudfala example nao King Asa showimaot for pipol long Judah?

⁴ King Asa hem strong for worshipim Jehovah. Taem hem kamap king staka jury man and woman stap long olketa temple long Judah, and staka pipol worshipim olketa idol. King Asa raosem olketa jury hia from olketa temple and distroem olketa idol. (1 Ki. 15:9-13) From Asa hem fren gud witim Jehovah and obeyim hem, Asa fit for talem olketa Israelite for “worshipim Jehovah wea hem God bilong olketa grani bilong olketa, and for followim datfala Law and wanem hem talem.” Bihaen datwan, Jehovah mekem olketa Israelite for garem peace long first tenfala year wea Asa hem rul. Asa talem olketa Israelite why Jehovah givim datfala peace long olketa. Hem sei: “Hem mekem iumi for garem peace bikos iumi worshipim hem.” (2 Chron. 14:1-7) Wanem nao happen bihaen?

5. Wanem nao happen wea showimaot Asa hem trustim God, and wanem nao Jehovah duim?

⁵ Tingim sapos iu nao King Asa. Wanfala man bilong Ethiopia wea nem bilong hem Zerah hem kam witim 1 million man and 300 chariot for faetem pipol bilong iu long Judah. (2 Chron. 14:8-10) Army bilong iu garem 580,000 soldia nomoa. Hao nao bae iu feel? Bae iu ting why nao God letem bigfala army hia for kam? Waswe, bae iu depend long savve bilong iuseleva, or bae iu trustim Jehovah for protectim iu? Samting wea Asa duim showimaot hem fren gud witim Jehovah and barava trustim hem. Asa sei: “Plis, God bilong mifala Jehovah, helpem mifala, bikos mifala depend long iu.” Wanem nao God duim for helpem hem? Bible sei: “Jehovah helpem Asa and olketa bilong Judah for winim olketa bilong Ethiopia.” Evriwan long datfala army bilong Ethiopia olketa dae!—2 Chron. 14:11-13.

6. Wanem nao Asa duim wea iumi tu laek for duim?

⁶ Wanem nao mekem Asa fit for barava trustim wei wea God bae leadim and protectim hem? Bible sei “Asa duim wanem Jehovah laekem” and hem “worshipim Jehovah long full heart bilong hem.” (1 Ki. 15:11, 14) Iumi tu mas worshipim God long full heart bilong iumi mekem iumi savve fren gud witim God distaem and long future. Iumi tinghae tumas long wei wea Jehovah duim samting firstaem for helpem iumi fren gud witim hem. Distaem bae iumi storyim tufala wei wea God duim datwan.

RANSOM HELPEM IUMI FOR FREN GUD WITIM JEHOVAH

7. (a) Wanem nao Jehovah duim wea mekem iumi laek for fren gud witim hem? (b) Wanem nao nambawan samting wea helpem iumi for fren gud witim God?

⁷ Naesfala earth wea Jehovah wakem for iumi stap insaed showimaot Jehovah lovem olketa man. Hem showimaot love long iumi tu long wei for givim iumi olketa samting wea iumi needim for gohed laef evriday. (Acts 17:28; Rev. 4:11) Wanfala important wei wea Jehovah showimaot hem lovem iumi nao hem lukaftarem iumi long spiritual wei. (Luke 12:42) Nara samting tu hem talem iumi hem herem iumi taem iumi prea. (1 John 5:14) Bat nambawan samting wea helpem iumi for fren gud witim God and wea showimaot Jehovah lovem iumi, hem nao datfala ransom. (Readim 1 John 4:9, 10, 19.) Jehovah sendem kam “spesol Son” bilong hem for dae for iumi, mekem iumi savve kamap free from sin and dae, and garem hope for laef olowe.—John 3:16.

8, 9. Long wanem wei nao Jesus helpem iumi for fren witim Jehovah?

⁸ Olketa wea laef bifor Christ peim datfala ransom savve kasem gud samting tu from datwan. Hao nao olsem? Taem Jehovah talem firstfala profesi long Bible wea story abaotem man wea bae kam for sevem pipol, long tingting bilong Jehovah hem olsem Jesus givim finis datfala ransom, bikos God savve plan bilong hem bae kamap tru. (Gen. 3:15) Staka handred year bihaen, aposol Paul praisem Jehovah for “price wea Christ Jesus peim for sevem” olketa man. Paul storyim tu wei wea ‘God hem forgivim sin bilong pipol wea laef long bifor kam.’ (Rome 3:21-26) Tru nao, iumi no savve fren gud witim God sapos Jesus no givim datfala sakrifaes!

⁹ Pipol wea hambol savve fren gud witim Jehovah only sapos olketa showimaot faith long ransom bilong Jesus. Hao nao Bible showimaot datwan? Aposol Paul sei: “Christ hem dae for iumi taem iumi sin yet, wea diswan showimaot God hem lovem iumi.” (Rome 5:6-8) Jesus givim datfala ransom sakrifaes, no from iumi duim eni samting wea mekem iumi fit for kasem datwan, bat bikos Jehovah and Jesus lovem iumi. Jesus sei: “Hard for eniwan kam long mi sapos Dadi wea sendem mi kam hem no leadim hem kam long mi firstaem.” Hem sei tu: “Mi nomoa road for man go long Dadi long heven.” (John 6:44; 14:6) Jehovah iusim holy spirit for leadim pipol wea showimaot faith long Jesus for kam long Hem, and for helpem olketa gohed fren gud witim Hem mekem olketa savve laef olowe. (Readim Jude 20, 21.) Distaem bae iumi storyim narafala wei wea Jehovah helpem iumi for fren gud witim hem.

BIBLE HELPEM IUMI FOR FREN GUD WITIM JEHOVAH

10. Long wanem wei nao Bible savve helpem iumi for fren gud witim God?

¹⁰ Long disfala study, iumi storyim finis olketa scripture from 14-fala difren buk long Bible. Jehovah iusim holy spirit for leadim olketa man for raetem Bible bikos hem laek helpem iumi for fren gud witim hem. Sapos iumi no garem Bible, bae iumi no fit for fren witim Creator bilong iumi. And tu, bae iumi no savve abaotem datfala ransom and wei wea Jesus helpem iumi for fren gud witim Jehovah. Iumi lanem long Bible olketa nambawan wei bilong Jehovah, and plan bilong hem for olketa man. Olsem example, long Exodus 34:6, 7 Jehovah sei hem “God wea showimaot mercy and kaen tumas, hem no savve kros kwiktaem and hem garem bigfala love and hem evritaem duim samting wea hem talem, hem showimaot love long staka thousand pipol, and hem forgivim man wea duim mistek and rong and sin.” Datwan mekem iumi laek for fren gud witim God. Jehovah savve sapos iumi gohed lane abaotem hem long Bible datwan bae helpem iumi for barava trustim hem and fren gud witim hem.

11. Why nao hem important for iumi savve gud long olketa wei bilong Jehovah? (Lukim piksa long start bilong study.)

¹¹ Long introduction bilong datfala buk Kam Klos Long Jehovah, hem sei taem iumi start for fren gud witim samwan, iumi start for savve gud long hem, and laekem olketa wei bilong hem. So for fren gud witim God, iumi need for studyim Bible mekem iumi savve gud long olketa wei bilong hem. Iumi tinghae tumas long wei wea Jehovah iusim olketa man for raetem Bible, wea datwan mekem hem isi for iumi minim.

12. Why nao Jehovah iusim olketa man for raetem Bible?

¹² Jehovah savve iusim olketa angel for raetem Bible. Olketa angel interest tumas long wanem iumi olketa man duim. (1 Pet. 1:12) Olketa angel barava fit for raetem Bible, wea hem message bilong Jehovah for olketa man. Bat olketa angel no olsem iumi olketa man. Olketa no garem semkaen feeling, need, and wik point olsem iumi. Jehovah savve olketa angel barava difren from iumi, so hem iusim olketa man nao for raetem Bible. Iumi savve minim tingting and feeling bilong olketa man wea raetem Bible, and pipol wea olketa raet abaotem long Bible. Iumi minim feeling bilong olketa taem olketa sorre, garem daot, fraet, and duim mistek. And tu, taem iumi read abaotem olketa samting wea mekem olketa hapi, iumi tu feel hapi. Datwan hem bikos evri man wea raetem Bible olketa “man olsem iumi nomoa.”—Jas. 5:17.

13. Hao nao tingting bilong iu abaotem prea wea Jonah talem taem hem insaed bele bilong datfala big fish?

¹³ Olsem example, tingim Jonah. God givim Jonah wanfala important waka for duim, bat hem ranawe. Sapos wanfala angel nao raetem datfala story, waswe, bae hem fit for raet abaotem olketa feeling wea Jonah garem long datfala taem? Nomoa. Dastawe hem barava gud Jehovah chusim Jonah for raetem story bilong hemseleva, wea insaed datwan tu hem prea wea Jonah talem long God taem hem insaed long bele bilong datfala big fish. Jonah sei: “Taem mi klosap for dae, Jehovah nao mi tingim.”—Jonah 1:3, 10; 2:1-9.

14. Why nao iumi savve mining feeling bilong Isaiah taem iumi readim wanem hem raetem?

¹⁴ Tingim tu samting wea Isaiah raetem taem hem lukim bigfala paoa bilong Jehovah long wanfala vision. Bihaen Isaiah lukim datfala vision, hem sei olsem abaotem wei wea hem man wea no perfect: “Mi lukim datfala King, Jehovah, wea hem komanda bilong olketa angel long heven. So sorre long mi! Bae mi dae nao, bikos mi man wea no fit for talem toktok wea klin, and pipol wea stap raonem mi tu no fit for talem toktok wea klin!” (Isa. 6:5) Wanfala angel bae no talem kaen toktok olsem abaotem hemseleva. Bat Isaiah talem datwan bikos hem nao feeling wea hem garem. And from iumi no perfect olsem Isaiah, iumi savve minim feeling bilong hem.

15, 16. (a) Why nao iumi savve minim feeling bilong olketa man wea Bible story abaotem? Storyim samfala example. (b) Wanem nao bae helpem iumi for fren gud witim Jehovah?

¹⁵ Tingim samting wea Jacob and Peter talem abaotem tufala seleva. Jacob sei hem “no fit,” and Peter sei hem “man wea sin.” (Gen. 32:10; Luke 5:8) Olketa disaepol bilong Jesus tu olketa “fraet tumas” samfala taem. And taem pipol againstim Paul and olketa narawan, olketa needim ‘God for strongim olketa’ for gohed preachim gud nius. (John 6:19; 1 Thess. 2:2) Bat olketa angel bae no garem olketa feeling olsem olketa man hia. Datwan hem bikos olketa perfect and garem bigfala paoa winim olketa man. Bat taem olketa man wea no perfect talemaot feeling and tingting bilong olketa, iumi savve minim feeling bilong olketa bikos iumi tu no perfect. Taem iumi readim samting wea olketa raetem iumi savve ‘hapi taem olketa hapi, and taem olketa krae iumi krae witim olketa tu.’—Rome 12:15.

¹⁶ Sapos iumi ting raonem wei wea Jehovah deal witim olketa wea worshipim hem bifor, bae iumi lanem staka nambawan samting abaotem God bilong iumi. Bae iumi lukim wei wea Jehovah patient and showimaot love long olketa man hia wea no perfect. Datwan bae helpem iumi for savve gud long Jehovah and lovem hem, and bae iumi barava fren gud witim hem.—Readim Psalm 25:14.

GOHED STRONGIM WEI FOR FREN WITIM GOD

17. (a) Wanem gudfala advaes nao Azariah givim long Asa? (b) Wanem nao Asa duim wea showimaot hem no followim advaes bilong Azariah, and wanem nao kamaot from datwan?

¹⁷ Iumi savve lanem samfala nara samting from example bilong King Asa tu. Bihaen hem winim datfala army bilong Ethiopia, profet Azariah givim gudfala advaes long hem. Azariah sei: “Jehovah bae stap witim iufala sapos iufala faithful long hem. Sapos iufala lukaotem hem, bae hem letem iufala for faendem hem, bat sapos iufala lusim hem bae hem lusim iufala.” (2 Chron. 15:1, 2) Bat samfala year bihaen, Asa no followim disfala advaes wea Azariah givim. Taem kingdom bilong Israel long north kam for faet againstim Judah, Asa hem fraet. Hem no askem Jehovah for helpem hem, bat hem mekem wanfala agreement witim Syria, wea pipol hia no worshipim Jehovah. Jehovah sei long hem: “Krangge samting nao iu duim, so start long disfala taem bae olketa enemy faetem iu.” And datwan nao samting wea happen. (2 Chron. 16:1-9) Wanem nao iumi lanem from diswan?

18, 19. (a) Wanem nao iumi shud duim sapos iumi no fren gud witim Jehovah distaem? (b) Wanem nao bae helpem iumi for gohed fren gud witim Jehovah?

¹⁸ Iumi mas no lusim Jehovah. Sapos iumi no fren gud witim Jehovah distaem, iumi shud kwiktaem duim wanem Hosea 12:6 hem talem. Hem sei: “Kam bak long God bilong iu, gohed showimaot love and duim stret samting, and evritaem trust long God bilong iu.” Taem iumi ting raonem olketa gudfala samting wea iumi kasem from sakrifaes bilong Jesus, and evritaem studyim gud Bible, datwan bae helpem iumi for fren gud witim Jehovah.—Readim Deuteronomy 13:4.

¹⁹ Man wea raetem psalm hem sei: “Taem mi fren gud witim God, mi kasem gud samting.” (Ps. 73:28) Iumi tu savve kasem gud samting sapos iumi fren gud witim God. Iumi laek for gohed lanem olketa niu samting abaotem Jehovah. Datwan bae strongim love wea iumi garem for hem. And sapos iumi fren gud witim Jehovah, hem bae fren gud witim iumi distaem and for olowe!