Herem Voice Bilong Jehovah Evritaem
“Bae iufala herem wanfala voice bihaen long iufala wea sei: ‘Diswan nao road for iufala wakabaot followim.’”—ISA. 30:21.
1, 2. Hao nao Jehovah leadim pipol bilong hem?
BIBLE showimaot Jehovah evritaem leadim pipol bilong hem. Long bifor, God iusim olketa angel, olketa vision, and olketa dream for talem pipol bilong hem olketa samting wea bae happen long future, or for talem olketa wanem hem laekem olketa for duim. (Num. 7:89; Ezek. 1:1; Dan. 2:19) Samfala taem God chusim olketa man tu for talem pipol bilong hem wanem hem laekem olketa for duim. Nomata wanem wei nao Jehovah iusim for story long pipol bilong hem, olketa wea obeyim hem kasem blessing.
2 Long distaem, Jehovah iusim Bible, holy spirit, and kongregeson for leadim pipol bilong hem. (Acts 9:31; 15:28; 2 Tim. 3:16, 17) From instruction wea iumi kasem from Jehovah hem barava klia, hem olsem iumi herem wanfala voice wea sei: “Diswan nao road for iufala wakabaot followim.” (Isa. 30:21) Jehovah iusim Jesus tu for talem iumi wanem Hem laekem iumi for duim. Hem markem Jesus for leadim kongregeson, and Jesus iusim “datfala wakaman wea faithful and wise” for duim datwan. (Matt. 24:45) Sapos iumi laek for laef olowe, hem barava important for iumi obeyim direction wea kam from olketa.—Heb. 5:9.
3. Wanem nao maet mekem iumi for no obeyim Jehovah? (Lukim piksa long start bilong study.)
3 Satan savve sapos iumi obeyim wanem Jehovah talem bae iumi kasem laef, so hem trae for mekem iumi for no lisin long Jehovah. Nara samting tu, from iumi no perfect datwan maet mekem iumi no laek obeyim Jehovah. (Jer. 17:9) Olketa samting hia savve stopem iumi for no herem voice bilong Jehovah. Disfala study bae helpem iumi for herem voice bilong Jehovah evritaem. Iumi bae storyim tu hao wei for prea and evritaem lisin long Jehovah bae helpem iumi evriwan for gohed fren gud witim hem.
AGAINSTIM OLKETA TRIK BILONG SATAN
4. Wanem nao Satan iusim for trae mekem pipol for duim wanem hem laekem?
4 Satan iusim olketa laea story for trae mekem pipol for duim wanem hem laekem. (Readim 1 John 5:19.) Pipol evriwea long world savve kasem information long olketa niuspepa, buk, magasin, radio, TV, and long Internet. Samfala information hia savve helpem pipol, bat staka taem hem mekhae long olketa nogud samting wea Jehovah no laekem. (Jer. 2:13) Olsem example, olketa nius report, movie, and olketa TV program savve mekhae long wei wea man maritim man, or woman maritim woman. Datwan mekem staka pipol for tingse wanem Bible talem abaotem olketa man wea sleep witim nara man, and woman wea sleep witim nara woman, hem ova tumas.—1 Cor. 6:9, 10.
5. Wanem nao savve helpem iumi for no letem olketa laea story bilong Satan spoelem iumi?
5 Wanem nao pipol wea lovem olketa standard bilong Jehovah savve duim mekem olketa laea story bilong Satan no spoelem olketa? Hao nao bae olketa luksavve long samting wea hem stret and no stret? Bible sei: “Hem nao for gohed lukaot and obeyim toktok bilong [God].” (Ps. 119:9) Bible helpem iumi for luksavve long samting wea tru and samting wea no tru. (Prov. 23:23) Jesus sei iumi needim “evri toktok wea kamaot from mouth bilong Jehovah.” (Matt. 4:4) Iumi mas lanem hao for followim olketa Bible principle long laef bilong iumi. Olsem example, taem God no givim yet eni law wea sei adultery hem rong, Joseph luksavve hem bae sin againstim God sapos hem durong witim waef bilong Potiphar. Joseph no garem eni tingting for no obeyim Jehovah. (Readim Genesis 39:7-9.) Nomata staka taem nao waef bilong Potiphar switim Joseph, Joseph chus for herem voice bilong Jehovah and no datfala woman. Distaem tu iumi mas herem voice bilong Jehovah, and no olketa laea story wea kam from Satan.
6, 7. Wanem nao iumi mas duim mekem iumi no lisin long toktok bilong Satan?
6 From olketa religion long world garem enikaen difren teaching, datwan mekem pipol konfius and olketa tingse hem hard nao for man faendem tru religion. Bat hem no hard for faendem tru religion sapos iumi willing for lisin long Jehovah. Iumi need for disaed hu nao iumi laek for lisin long hem. Hem hard for lisin gud long tufala man wea story long semtaem, so hem important for iumi “heresavve long toktok” bilong Jesus mekem iumi savve lisin gud long hem. Hem nao man wea Jehovah markem for lukaftarem olketa sheepsheep bilong hem.—Readim John 10:3-5.
7 Jesus sei: “Followim samting wea iufala herem.” (Mark 4:24) Instruction wea iumi kasem from Jehovah hem klia and hem stret, bat iumi mas tinghae long datfala instruction mekem iumi savve acceptim datwan. Bikos sapos iumi no careful, maet iumi lisin long toktok bilong Satan and no lisin long instruction bilong Jehovah. No letem olketa samting long world olsem music, olketa TV program, olketa buk, or nara pipol, or olketa teacher, or olketa savveman bilong world for kontrolem laef bilong iu.—Col. 2:8.
8. (a) Wanem nao Satan savve iusim for trae mekem iumi foldaon? (b) Wanem nao savve happen long iumi sapos iumi no gohed lukaot?
8 Satan savve iumi man wea born sin, and hem trae mekem iumi for foldaon long olketa wik point bilong iumi. Datwan savve mekem hem no isi for iumi gohed faithful long Jehovah. (John 8:44-47) Olsem example, maet iumi no prea long Jehovah nao, no go evritaem long ministry, or start for misstim olketa meeting. Sapos kaen samting olsem happen long iumi, datwan hem olsem wanfala warning wea iumi mas no ting nating long hem. Sapos iumi no stretem diswan, maet bae iumi stop nao for herem voice bilong Jehovah. Then, gogo maet iumi duim rong samting, wea bifor iumi no ting bae iumi duim datwan. (Rome 7:15) Bat bae iumi no duim bigfala rong sapos iumi luksavve long eni samting wea iumi need for stretem, and kwiktaem stretem datwan. And sapos iumi lisin gud long voice bilong Jehovah, bae iumi no lisin long eni samting wea olketa apostate talem.—Prov. 11:9.
9. Why nao hem barava important for luksavve and kwiktaem faet againstim eni wik point wea iumi garem?
9 Sapos man wea garem wanfala nogud sik hem kwiktaem faendem datwan and kasem treatment, maet hem savve winim datfala sik. Olsem tu, sapos iumi luksavve iumi garem wanfala wik point wea savve mekem iumi foldaon, iumi mas kwiktaem duim samting for againstim datwan bifor Satan “kasholem [iumi] for duim wanem hem laekem.” (2 Tim. 2:26) Wanem nao iumi shud duim sapos iumi luksavve tingting and samting wea iumi laekem hem no followim wanem Jehovah laekem? Iumi mas kwiktaem lisin long Jehovah and duim wanem hem talem. (Isa. 44:22) Iumi mas luksavve staka nogud samting savve kamaot from wei for duim sin. Dastawe iumi laek for kwiktaem faet againstim eni wik point wea iumi garem, mekem iumi no duim eni bigfala rong.
Hao nao wei for evritaem duim olketa spiritual samting savve protectim iumi from olketa trik bilong Satan? (Paragraf 4-9 storyim diswan)
NO PRAOD AND NO GREEDY
10, 11. (a) Wanem nao samfala samting wea showimaot man hem praod? (b) Wanem nao iumi savve lanem from samting wea happen long Korah, Dathan, and Abiram?
10 Iumi mas luksavve heart bilong iumi savve leadim iumi go rong. Olsem example, maet iumi start for kamap praod or greedy. Tufala nogud wei hia savve mekem iumi for duim bigfala rong. Man wea praod maet tingse hem gud winim narawan and hem savve duim eni samting wea hem laekem. Maet hem tingse hem no need for followim direction wea kam from olketa nara Christian, olketa elder, or from organization bilong God tu. Kaen man olsem hem no lisin gud long voice bilong Jehovah.
11 Jehovah markem Moses and Aaron for leadim olketa Israelite insaed long wilderness. Bat Korah, Dathan, and Abiram againstim tufala bikos olketa praod and laek for worshipim Jehovah followim tingting bilong olketa seleva. Wanem nao Jehovah duim? Hem killim dae olketa hia wea bighed. (Num. 26:8-10) Iumi lanem wanfala important samting from wanem hem happen long thrifala hia. Wei for bighed and againstim Jehovah savve mekem man kasem barava nogud samting. Bible sei: “Man wea praod bae kasem nogud samting.”—Prov. 16:18; Isa. 13:11.
12, 13. (a) Storyim example wea showimaot man wea greedy savve kasem nogud samting. (b) Sapos iumi luksavve iumi start for greedy, wanem nao iumi mas duim?
12 Wei for greedy tu savve spoelem man. Staka taem man wea greedy hem tingse hem no need for followim wanem Jehovah talem. Maet hem tingse hem savve tekem samting wea no bilong hem. Naaman, wanfala bigman long army bilong Syria, hem garem leprosy, and profet Elisha healim hem. From Naaman tinghae tumas long samting wea Elisha duim, hem laek for givim hem selen and kaleko, bat Elisha no laek tekem. Bat wakaman bilong Elisha, wea nem bilong hem Gehazi, hem greedy and laekem nao datfala selen and kaleko. Bihaen Naaman go, Gehazi kwiktaem go bihaenem hem, bat hem no talem Elisha. Gehazi laea long Naaman mekem Naaman givim datfala selen and kaleko long hem. Wanem nao happen long disfala greedy man, Gehazi? Hem kasem leprosy!—2 Ki. 5:20-27.
13 Wei for greedy savve barava spoelem man. So sapos iumi luksavve iumi start for garem disfala wei for greedy, iumi mas kwiktaem stretem tingting bilong iumi. Samting wea kasem Achan showimaot wei for greedy savve barava spoelem man. Achan sei: “Taem mi lukim wanfala spesol kaleko from Shinar and samfala silver wea hevi bilong hem 200 shekel, and wanfala gold bar wea hevi bilong hem 50 shekel, mi laekem tumas so mi tekem nao.” Achan shud rejectim datfala feeling for laekem tumas olketa samting hia wea hem shud no tekem. Bat hem stealim olketa samting hia and haedem long tent bilong hem. Jehovah talemaot sin bilong Achan long evriwan, and long datfala sem day olketa killim dae Achan and famili bilong hem. (Josh. 7:11, 21, 24, 25) Sapos iumi no careful, eniwan long iumi savve kamap greedy olsem Achan. Dastawe, iumi mas “lukaot and keakea nogud [iumi] greedy.” (Luke 12:15) Wei for durong tu hem showimaot man hem greedy. Nomata maet samfala taem iumi garem rong tingting, hem barava important for iumi kontrolem tingting bilong iumi. Iumi mas aotem datfala rong tingting nogud iumi laekem tumas datfala samting gogo iumi duim sin nao.—Readim James 1:14, 15.
14. Wanem nao iumi shud duim sapos wei for praod or greedy mekem iumi laek for duim samting wea no stret?
14 Tru nao, wei for praod and greedy savve lead go long bigfala trabol. Sapos iumi ting raonem nogud samting wea savve kamaot from wei for duim sin, datwan bae helpem iumi for gohed herem voice bilong Jehovah. (Deut. 32:29) Long Bible, Jehovah talem iumi gud samting wea iumi savve kasem sapos iumi duim stret samting, and nogud samting wea iumi savve kasem sapos iumi duim rong samting. Sapos wei for praod or greedy nao mekem iumi laek for duim samting wea no stret, iumi shud tingim hao datwan bae affectim iumi, olketa wea iumi lovem, and wei wea iumi fren witim Jehovah.
EVRITAEM PREA AND LISIN LONG JEHOVAH
15. Wanem nao iumi savve lanem from example bilong Jesus?
15 Jehovah laekem iumi for kasem barava gud samting long laef. (Ps. 1:1-3) Hem givim iumi instruction long barava taem wea iumi needim. (Readim Hebrew 4:16.) Nomata Jesus hem perfect, hem luksavve hem needim Jehovah for leadim hem. Hem prea evritaem. Jehovah sapotim and leadim Jesus long olketa nambawan wei. Hem sendem olketa angel for helpem Jesus, givim holy spirit long hem, and helpem Jesus taem hem chusim 12-fala aposol bilong hem. Jehovah story kam from heven tu for showimaot hem sapotim and hapi long Jesus. (Matt. 3:17; 17:5; Mark 1:12, 13; Luke 6:12, 13; John 12:28) Olsem Jesus, iumi tu mas prea evritaem and barava story gud witim Jehovah. (Ps. 62:7, 8; Heb. 5:7) Prea savve helpem iumi for fren gud witim Jehovah, and evritaem duim samting wea hem laekem.
16. Hao nao Jehovah helpem iumi for herem voice bilong hem?
16 Hem no hard for kasem instruction wea kam from Jehovah. Nomata olsem, Jehovah no forcem iumi for followim olketa instruction hia. So iumi mas askem God for givim holy spirit for leadim iumi from hem willing tumas for duim datwan. (Readim Luke 11:10-13.) And hem important for iumi lisin gud long wanem hem talem. (Luke 8:18) Olsem example, sapos iumi askem Jehovah for helpem iumi for stap klia long wei for durong bat iumi gohed lukluk long olketa rabis piksa or dirty movie, datwan showimaot iumi no really laekem hem for helpem iumi. Sapos iumi laekem Jehovah for helpem iumi, iumi mas stap long olketa ples wea spirit bilong Jehovah stap, olsem long olketa meeting long kongregeson. Olketa meeting helpem staka pipol bilong Jehovah for misstim nogud samting. Taem olketa luksavve olketa start for garem rong tingting, olketa stretem datwan.—Ps. 73:12-17; 143:10.
GOHED LISIN GUD LONG VOICE BILONG JEHOVAH
17. Why nao hem danger for depend long savve bilong iumiseleva?
17 Iumi savve lanem wanfala important samting from King David wea rulim Israel bifor. Taem David depend long Jehovah, hem duim olketa big samting. Taem David hem young, hem killim dae datfala giant Goliath. Bihaen datwan, David kamap wanfala soldia, and then hem kamap king, and hem leadim and protectim olketa Israelite. Bat taem David start for depend long savve bilong hemseleva, heart bilong hem leadim hem for duim nogud samting. Hem duim adultery witim Bath-sheba, and hem killim dae hasband bilong hem tu. Nomata olsem, taem Jehovah stretem David, hem hambol for talemaot rong bilong hem, and hem fren bak witim Jehovah.—Ps. 51:4, 6, 10, 11.
18. Wanem nao savve helpem iumi for gohed lisin long voice bilong Jehovah?
18 Iumi laek for followim advaes wea stap long 1 Corinth 10:12, and no trustim iumiseleva. Bible sei iumi no savve kontrolem gogo bilong iumiseleva, so sapos iumi no letem voice bilong Jehovah for leadim iumi, voice bilong Satan nao bae leadim iumi. (Jer. 10:23) Hem barava important for iumi prea evritaem and letem holy spirit for leadim iumi. Tru tumas, iumi laek for lisin gud long voice bilong Jehovah evritaem.