KAVA SUBJECT | KINGDOM BILONG GOD—WANEM NAO IU SAVVE KASEM

Kingdom Bilong God—Wanem Gud Samting Nao Iu Savve Kasem From Datwan?

Taem iu readim tufala first article, maet iu luksavve Kingdom bilong God hem important long Olketa Jehovah’s Witness. And taem iu read abaotem wanem Kingdom bae duim long future, maet iu tu laek for kasem olketa blessing hia. Bat long semtaem, maet iu no sure sapos olketa promis hia bae kamap tru.

Hem gud for no kwiktaem bilivim evri samting wea iu herem. (Proverbs 14:15) Hem nao wanem olketa long Beroeaa duim. Taem olketa herem gud nius abaotem Kingdom olketa no just bilivim nomoa wanem olketa herem. Olketa lukluk gud long olketa Holy Raeting “for savve sapos samting wea olketa herem hem tru or nomoa.” (Acts 17:11) Gogo, olketa barava trustim gud nius wea olketa herem, hem toktok bilong God.

Hem gud sapos iu tu followim wanem olketa long Beroea duim. Mifala Jehovah’s Witness offerim free Bible study wea savve helpem iu for comparem wanem mifala bilivim abaotem Kingdom bilong God witim wanem Bible teachim.

Taem iu studyim Bible, iu savve kasem ansa long samfala important kwestin long laef tu.

Waswe, God nao wakem iumi, or laef kamap seleva nomoa?
Why nao God wakem iumi?
Why nao God letem iumi for safa?
Wanem nao happen long man wea dae?
Waswe, disfala earth bae distroe?
Wanem nao savve mekem famili hapi?

Main samting nao, taem iu studyim Bible datwan bae helpem iu for “fren gud witim God.” (James 4:8) Taem iu gohed for study bae iu luksavve long olketa gud samting iu savve kasem distaem, and long taem Kingdom bilong God hem rulim earth. Jesus prea olsem long Dadi bilong hem: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.”—John 17:3.

Olketa Jehovah’s Witness savve iusim disfala buk Wanem Nao Really Samting wea Bible Teachim? for studyim Bible witim iu.

Sapos iu laek for studyim Bible witim mifala, askem eni Jehovah’s Witness or raetem information long form long www.jw.org. (Lukim ASK FOR WANFALA FREE BIBLE STUDY long home page)

a Beroea hem wanfala taon long Macedonia long bifor.

Why Kingdom Bilong God Hem Important Long Folake

No longtaem go nomoa, Folake, wanfala gele wea hem ten year, kasem assignment long skul for raet abaotem disfala subject: “Samting wea Barava Important Long Mi.” Folake disaed for raet abaotem why hem laekem tumas for storyim Kingdom bilong God long pipol.

Folake sei, “Kingdom bilong God hem wanfala gavman. Bat iu no savve lukim datfala gavman, nomata iu werem eyeglass!”

Folake raet tu abaotem olketa samting wea hem luk forward long hem taem Kingdom bilong God hem rul. Firstaem hem story abaotem samfala problem wea datfala Kingdom bae stretem. Hem sei: “Mi sorre tumas taem mi herem pipol stap nomoa long street from olketa no garem haos,” and hem sorre tu for herem “olketa pikinini long olketa difren ples long world dae from olketa no garem inaf kaikai.” Then hem sei: “Bat mi hapi taem mi readim Isaiah 65:21.” Datfala scripture storyim wanem olketa man bae kasem taem Kingdom bilong God hem rul. Verse hia hem sei: “Olketa bae wakem olketa haos and stap insaed, and olketa bae plantim olketa grape planteison and kaikaim frut bilong datwan.”

Folake sei hem luk forward tu long taem wea God bae iusim Kingdom bilong Hem for finisim sik. Hem storyim Revelation 21:4 wea sei, God “bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu.” Long end bilong datfala story, Folake hem sei “wei for story abaotem Kingdom bilong God nao hem samting wea barava important long mi.”