Iufala Bae Kamap “Olketa Priest wea Rul Olsem King”

1, 2. Why nao Jehovah mas protectim pikinini bilong datfala woman wea Genesis 3:15 storyim?

FIRSTFALA profesi long Bible helpem iumi for luksavve wanem God bae duim for mekem plan bilong hem kamap tru. Datfala promis wea God talem long Eden hem sei: “Mi bae mekem iu [Satan] and datfala woman for iutufala heitim iutufala. Pikinini bilong iu and pikinini bilong hem bae tufala heitim tufala.” Wanem nao bae kamaot from wei wea tufala heitim tufala? Jehovah sei: “Pikinini bilong datfala woman bae killim hed bilong iu [Satan] and iu bae killim leg bilong hem.” (Gen. 3:15) From Satan barava heitim datfala woman, hem bae traem best bilong hem for finisim pikinini bilong datfala woman.

² Dastawe man wea raetem psalm prea olsem abaotem pipol bilong God: “Olketa enemy bilong iu and olketa wea heitim iu, olketa againstim iu. Olketa plan haed for duim nogud samting long pipol bilong iu. Olketa sei: ‘Iumi go and finisim nation bilong Israel.’” (Ps. 83:2-4) Goal bilong Satan hem for spoelem and finisim famili laen wea datfala “pikinini” bae born kam insaed. For protectim datfala pikinini and mek sure datfala Messiah Kingdom bae mekem plan bilong Jehovah kamap tru, God mekem samfala nara agreement moa.

AGREEMENT WEA PROTECTIM DATFALA PIKININI

3, 4. (a) Wanem taem nao datfala Law agreement hem start, and wanem nao olketa Israelite promis for duim? (b) God mekem datfala Law agreement for wanem?

³ Taem olketa wea born long laen bilong Abraham, Isaac, and Jacob kamap staka, Jehovah mekem olketa for kamap datfala nation bilong Israel. Jehovah iusim Moses for mekem wanfala spesol agreement witim nation hia. Jehovah givim Law long olketa, and olketa Israelite promis for obeyim. Bible sei: “[Moses] readim datfala buk bilong agreement long olketa pipol. Then olketa sei: ‘Mifala willing for duim and obeyim evri samting wea Jehovah talem.’ So Moses tekem blood [bilong buluka wea olketa sakrifaesim] and torowem lelebet blood hia long olketa pipol and sei: ‘Diswan nao blood bilong datfala agreement wea Jehovah mekem witim iufala followim evri toktok long buk hia.’”—Ex. 24:3-8.

⁴ Datfala spesol agreement wea Jehovah mekem witim nation bilong Israel long Maunt Sinai, hem nao datfala Law agreement, and datwan hem start long 1513 B.C.E. Datfala agreement showimaot Jehovah chusim nation bilong Israel for kamap pipol bilong hem. Jehovah hem kamap ‘Judge, man for givim law, and King bilong olketa.’ (Isa. 33:22) History bilong olketa Israelite showimaot wanem hem happen sapos man followim or no followim olketa raeteous standard bilong God. Law hem tambuim olketa Israelite for no maritim eniwan wea no worshipim Jehovah, and hem tambuim olketa for no worshipim olketa nara god. God mekem datfala Law agreement for protectim datfala “pikinini” wea kam from laen bilong Abraham mekem no eni samting savve spoelem hem long spiritual wei.—Ex. 20:4-6; 34:12-16.

5. (a) Wanem chance nao datfala Law agreement givim long olketa Israelite? (b) Why nao God rejectim nation bilong Israel?

⁵ Datfala Law agreement garem arrangement for samfala duim waka olsem priest long Israel. Olketa priest hia piksarem wanfala sekson wea bae duim waka olsem priest for helpem olketa man long future. (Heb. 7:11; 10:1) Datfala Law agreement givim chance long nation bilong Israel for kamap “olketa priest wea rul olsem king.” For kasem disfala privilege, olketa Israelite mas obeyim olketa law bilong Jehovah. (Readim Exodus 19:5, 6.) Bat nation bilong Israel no obey. Olketa les long Messiah, wea hem nao main pikinini wea kam from laen bilong Abraham. Olketa rejectim Jesus, so God rejectim olketa tu.

6. Why nao God givim datfala Law?

⁶ From datfala nation bilong Israel no gohed for faithful long God, olketa no kamap olketa priest wea rul olsem king. Waswe, diswan minim plan bilong God for givim datfala Law hem no kamap tru nao? Nomoa, datfala Law hem for protectim datfala “pikinini” wea bae kam from laen bilong Abraham, and hem for helpem pipol luksavve long Messiah. Taem Christ kam long earth and pipol luksavve hem Messiah, plan bilong God for givim datfala Law hem kamap tru. Bible sei: “Christ hem finisim Law taem hem dae.” (Rome 10:4) So hu nao bae kamap olketa priest wea rul olsem king? Jehovah mekem narafala agreement for startim wanfala niu nation wea bae garem datfala privilege.

WANFALA NIU NATION HEM START

7. Wanem profesi nao Jeremiah talem?

⁷ Staka year bifor datfala Law agreement hem finis, Jehovah iusim profet Jeremiah for sei hem bae mekem “wanfala niu agreement” witim nation bilong Israel. (Readim Jeremiah 31:31-33.) Datfala niu agreement bae difren from Law agreement bikos man no need for givim olketa animal sakrifaes for God forgivim olketa sin bilong hem. Hao nao olsem?

8, 9. (a) Blood bilong Jesus openem wei for wanem samting? (b) Olketa wea insaed niu agreement garem chance for kasem wanem privilege? (Lukim piksa long start bilong study.)

⁸ Staka handred year bihaen, long Nisan 14, 33 C.E., Jesus startim wanfala niu celebration, wea hem nao datfala Evening Kaikai Bilong Lord. Taem Jesus story abaotem datfala wine, hem sei olsem long 11-fala faithful aposol bilong hem: “Diswan hem piksarem datfala niu agreement wea bae hem start taem mi pourimaot blood bilong mi for iufala.” (Luke 22:20) Matthew talem disfala toktok bilong Jesus: “Diswan hem piksarem blood bilong mi wea hem nao ‘blood bilong datfala agreement’ wea mi mas pourimaot for mekem plande pipol kasem forgiveness for sin.”—Matt. 26:27, 28.

⁹ Blood bilong Jesus nao startim datfala niu agreement. Jesus pourimaot blood bilong hem wantaem nomoa, and datwan openem wei for pipol kasem forgiveness for sin bilong olketa for olowe. Jesus no insaed datfala niu agreement bikos hem no garem sin so hem no needim forgiveness. Bat God savve iusim sakrifaes bilong Jesus for helpem olketa man. And tu, Jehovah savve iusim holy spirit bilong hem for anointim samfala man wea faithful and adoptim olketa olsem “olketa son” bilong hem. (Readim Rome 8:14-17.) Jehovah savve ting long olketa olsem olketa no garem sin, olsem Son bilong hem Jesus. Hem bae givim olketa anointed Christian hia “sem samting wea hem bae givim long Christ.” And tu, olketa hia bae garem chance for kasem privilege wea nation bilong Israel misstim, wea hem nao for kamap “olketa priest wea rul olsem king.” Aposol Peter sei olsem abaotem sekson hia: “Iufala ‘pipol wea God chusim and olketa priest wea rul olsem king. Iufala wanfala holy nation and spesol pipol bilong God. Hem chusim iufala for talemaot long evri ples olketa nambawan wei’ bilong hem. Hem nao kolem iufala kamaot from darkness and tekem iufala go insaed long nambawan laet bilong hem.” (1 Pet. 2:9) Tru tumas, datfala niu agreement hem barava important! Hem openem wei for olketa anointed Christian tu for kamap datfala “pikinini” wea kam from laen bilong Abraham.

NIU AGREEMENT HEM START

10. Wanem taem nao datfala niu agreement hem start, and why nao iumi sei olsem?

¹⁰ Datfala niu agreement hem no start taem Jesus witim olketa aposol bilong hem duim Evening Kaikai Bilong Lord. Why nao olsem? Bikos for datfala niu agreement hem start, Jesus mas go bak long heven and givim price bilong sakrifaes bilong hem long Jehovah. And tu, for datfala niu agreement hem start, God mas iusim holy spirit for anointim olketa wea bae rul witim Christ. So datfala niu agreement hem start long Pentecost 33 C.E. taem God anointim olketa disaepol bilong Jesus long holy spirit.

11. Hao nao niu agreement openem wei for olketa Jew and olketa wea no Jew for insaed long spiritual Israel, and haomas anointed Christian nao insaed long niu agreement?

¹¹ Taem Jehovah iusim Jeremiah for sei hem bae mekem wanfala niu agreement witim Israel, datwan showimaot gogo Law agreement bae finis. Datfala Law agreement hem finis taem niu agreement hem start. (Heb. 8:13) Datfala niu agreement hem openem wei for olketa Jew and olketa wea no Jew tu, wea olketa no circumcise, for garem chance for rul witim Christ long Kingdom bilong God bikos olketa “circumcise long heart.” (Rome 2:29) God bae putim olketa law bilong hem “long tingting bilong olketa and bae [hem] raetem insaed heart bilong olketa.” (Heb. 8:10) Namba bilong olketa anointed Christian wea insaed datfala niu agreement hem 144,000, and olketa nao datfala “Israel bilong God,” wea hem spiritual Israel.—Gal. 6:16; Rev. 14:1, 4.

12. Long olketa wanem wei nao Law agreement hem difren from niu agreement?

¹² Long olketa wanem wei nao Law agreement hem difren from niu agreement? Olketa wea insaed Law agreement hem Jehovah and datfala nation bilong Israel, and olketa wea insaed niu agreement hem Jehovah and spiritual Israel. Jehovah iusim Moses for mekem Law agreement witim Israel, and Jehovah iusim Jesus for help for mekem niu agreement. Blood bilong olketa animal startim datfala Law agreement, and blood bilong Jesus startim datfala niu agreement. Moses leadim nation bilong Israel taem God mekem datfala Law agreement, and Jesus, wea hem hed bilong kongregeson, hem leadim olketa wea insaed long datfala niu agreement.—Eph. 1:22.

13, 14. (a) Long wanem wei nao niu agreement hem join witim Kingdom? (b) Wanem nao bae mekem spiritual Israel garem raet for rul witim Christ long heven?

¹³ Long wanem wei nao niu agreement hem join witim Kingdom? Datfala niu agreement hem mekem wanfala holy nation kamap, wea olketa garem privilege for king and priest long Kingdom bilong God. Olketa insaed datfala nation olketa tu datfala pikinini wea Genesis 3:15 storyim wea kam from laen bilong Abraham. (Gal. 3:29) So datfala niu agreement showimaot agreement wea God mekem witim Abraham bae kamap tru.

¹⁴ Datfala niu agreement hem mekem spiritual Israel kamap and hem openem wei for God givim long olketa anointed Christian “sem samting wea hem bae givim long Christ.” Bat hao nao olketa anointed Christian savve rul and kamap olketa priest witim Jesus long heven? Narafala agreement nao hem mekem olketa garem raet for duim datwan.

AGREEMENT FOR OLKETA NARAWAN RUL WITIM CHRIST

15. Wanem agreement nao Jesus mekem witim olketa faithful aposol bilong hem?

¹⁵ Bihaen Jesus startim Evening Kaikai Bilong Lord, hem mekem agreement for wanfala Kingdom witim olketa faithful disaepol bilong hem. (Readim Luke 22:28-30.) Jehovah no insaed long disfala agreement, bat Jesus and olketa anointed Christian nao insaed long diswan. Taem Jesus sei, “olsem Dadi bilong mi tu hem mekem agreement witim mi,” maet hem story abaotem agreement wea Jehovah mekem witim hem for kamap “wanfala priest for olowe olsem Melchizedek.”—Heb. 5:5, 6.

16. Datfala agreement for wanfala Kingdom hem mekem olketa anointed Christian garem raet for duim wanem samting?

¹⁶ Elevenfala aposol bilong Jesus wea faithful nating lusim hem taem hem kasem hard taem. Datfala agreement for wanfala Kingdom showimaot olketa aposol hia bae sidaon long olketa throne and kamap olketa priest wea rul olsem king witim Jesus long heven. Bat samfala moa bae kasem datfala sem privilege witim 11-fala aposol hia. Jesus sei olsem long aposol John long wanfala vision: “Bae mi letem man wea win for hem sidaon witim mi long throne bilong mi, olsem mi tu win and sidaon witim Dadi bilong mi long throne bilong hem.” (Rev. 3:21) So Jesus mekem datfala agreement for wanfala Kingdom witim evri anointed Christian, wea namba bilong olketa hem 144,000. (Rev. 5:9, 10; 7:4) Disfala agreement hem mekem olketa anointed Christian garem raet for rul witim Jesus long heven. Olsem example, tingim wanfala gele wea olketa chusim for maritim wanfala king. Bihaen tufala marit, datfala gele savve rul witim datfala king. Bible sei olketa anointed Christian olketa “olsem wanfala young gele” wea bae maritim Christ.—Rev. 19:7, 8; 21:9; 2 Cor. 11:2.

GAREM STRONG FAITH LONG KINGDOM

17, 18. (a) Storyim sixfala agreement wea iumi story abaotem wea join witim Kingdom. (b) Why nao iumi fit for garem strongfala faith long Kingdom?

¹⁷ Olketa agreement wea iumi storyim long tufala study hia, hem join witim Kingdom. (Lukim chart “Sixfala Agreement wea Mekem Plan Bilong God Kamap Tru.”) Olketa agreement hia showimaot Kingdom hem fitim olketa standard bilong Jehovah, so iumi fit for garem strongfala faith long Kingdom. Iumi barava sure God bae iusim Messiah Kingdom for mekem plan bilong hem for olketa man and for disfala earth kamap tru.—Rev. 11:15.

¹⁸ Iumi barava sure Kingdom bilong God nomoa bae stretem evri problem bilong olketa man. Hem bae givim gudfala samting for olketa man for olowe. So iumi laek gohed strong for talemaot gud nius abaotem Kingdom long olketa narawan!—Matt. 24:14.