ANSA FOR OLKETA BIBLE KWESTIN

Wanem nao iu savve duim for helpem pikinini bilong iu lovem God?

A parent teaching his child using lessons from creation — Storyim olketa samting wea God wakem for helpem pikinini bilong iu savve long God and lovem hem

For helpem olketa pikinini bilong iu lovem God, first samting iu mas duim hem for helpem olketa savve long God. Storyim samting for pruvim long olketa God hem stap and hem lovem olketa. (1 John 4:8) Olsem example, hem important for olketa pikinini savve: Why nao God wakem olketa man and wanem nao plan bilong hem for olketa? Why nao God letem pipol for safa? Wanem nao God bae duim for olketa man long future?—Readim Philippi 1:9.

For helpem olketa pikinini bilong iu lovem God, iuseleva nao mas showimaot iu lovem God. Taem olketa lukim iu duim datwan, bae olketa followim example bilong iu.—Readim Deuteronomy 6:5-7; Proverbs 22:6.

Hao nao iu savve teachim pikinini bilong iu for lovem God?

Toktok bilong God hem garem paoa. (Hebrew 4:12) So helpem olketa pikinini bilong iu for lanem olketa main teaching long Bible. Taem Jesus teachim pipol hem askem olketa kwestin, hem lisin long olketa, and hem helpem olketa for minim olketa Scripture. Sapos iu laekem olketa pikinini bilong iu for lovem God, iu savve followim hao Jesus hem teach.—Readim Luke 24:15-19, 27, 32.

And tu, olketa story long Bible abaotem hao God tingim pipol savve helpem pikinini for savve long God and lovem hem. Staka samting for helpem olketa pikinini for lovem God hem stap long www.jw.org—Readim 2 Timothy 3:16.

For savve moa, lukim chapter 14 long disfala buk, Wanem Nao Really Samting wea Bible Teachim?, wea Olketa Jehovah’s Witness pablisim

Hem stap tu long www.jw.org, or raet go long eni address long page 2 and ask for wanfala copy