Hao for Garem Gudfala Marit

1-3. Wanem nao samfala hard samting wea savve kasem olketa wea marit? (Lukim piksa long start bilong study.)

WANFALA hasband wea marit for 38 year finis hem sei: “Sapos iu waka hard for garem gudfala marit, Jehovah bae blessim iu.” Tru nao, hasband and waef savve hapi long marit bilong tufala and sapotim each other taem olketa kasem hard taem.—Prov. 18:22.

² Nomata olsem, samfala taem tufala wea marit maet garem samfala problem. Bible sei olketa wea marit bae kasem “hard taem long laef bilong olketa.” (1 Cor. 7:28) Why nao olsem? Olketa hevi bilong laef evriday savve mekem hevi kamap insaed long marit. From hasband and waef no perfect, samfala taem maet tufala talem samting wea mekem narawan feel nogud, or wea narawan savve minim rong. (Jas. 3:2, 5, 8) Staka hasband and waef garem waka wea mekem olketa barava busy, and olketa mas lukaftarem pikinini bilong olketa tu. From tufala kasem stress and barava feel taed, tufala no garem staka taem for spendem tugeta and strongim marit bilong tufala. Hevi saed long selen, sik, or olketa narafala hard samting maet mekem problem kamap insaed marit, and gogo diswan savve spoelem love and respect wea tufala garem for each other. And tu, olketa “nogud samting” olsem wei for durong, wei wea man nating shame for duim rong samting, wei for enemy long narawan, faet, wei for no trustim man, kros, and raoa savve barava spoelem marit.—Gal. 5:19-21.

³ Narafala samting wea savve spoelem marit nao hem wei bilong pipol long “olketa last day” distaem for tingim seleva nomoa, and for nating tinghae long God. (2 Tim. 3:1-4) And tu, wanfala enemy hem laek for spoelem olketa wea marit. Aposol Peter sei: “Devil, wea hem enemy bilong iufala, hem raraon olsem wanfala lion wea singaot big and hem laekem tumas for kaikaim eniwan.”—1 Pet. 5:8; Rev. 12:12.

4. Wanem nao savve helpem iumi for garem gudfala marit?

⁴ Wanfala hasband long Japan sei: “Mi barava wari abaotem hao for kasem selen wea famili bilong mifala needim. And from mitufala no savve story gud tugeta, hem tu kasem bigfala hevi. No longtaem go nomoa, waef bilong mi hem sik big tu. Olketa samting hia mekem mifala savve raoa samfala taem.” Samfala hard samting bae kamap insaed long marit, bat iumi fit for winim olketa samting hia. Jehovah savve helpem hasband and waef for garem gudfala marit. (Readim Psalm 127:1.) Bae iumi storyim faevfala samting wea bae helpem olketa hasband and waef for garem gudfala marit. Bae iumi storyim tu why hem important for hasband and waef showimaot love insaed long marit.

FOLLOWIM WANEM JEHOVAH TALEM

5, 6. Wanem nao hasband and waef savve duim mekem Jehovah savve helpem tufala for garem gudfala marit?

⁵ Taem hasband and waef faithful long Jehovah and stap anda long hem, marit bilong tufala bae garem strongfala faondeson. (Readim Ecclesiastes 4:12.) Olketa hasband and waef wea followim wanem Jehovah talem bae garem gudfala marit. Bible sei: “Sapos iufala go difren and go long raet saed or go long left saed, bae iufala herem wanfala voice bihaen long iufala wea sei: ‘Diswan nao road for iufala wakabaot followim.’” (Isa. 30:20, 21) Wanfala wei wea hasband and waef “herem” toktok bilong Jehovah nao hem for readim Bible tugeta. (Ps. 1:1-3) Nara samting wea bae barava strongim marit bilong tufala hem for evritaem duim Famili Worship wea tufala enjoyim and wea encouragem tufala long spiritual wei. And taem hasband and waef prea tugeta evriday, datwan tu savve helpem tufala for garem gudfala marit nomata tufala kasem olketa hevi from world bilong Satan.

⁶ Gerhard from Germany sei olsem: “Taem mitufala feel nogud long mitufala, advaes long Bible helpem mifala for patient and willing for forgivim narawan.” Hem sei for garem gudfala marit, hem barava important for hasband and waef for patient and willing for forgivim narawan. Taem hasband and waef evritaem duim olketa spiritual samting tugeta, tufala bae fren gud witim Jehovah, and datwan strongim marit bilong tufala.

HASBAND MAS SHOWIMAOT LOVE

7. Hao nao hasband shud deal witim waef bilong hem?

⁷ Wei wea hasband lead long famili bilong hem savve helpem hem and waef for garem gudfala marit. Bible sei: “Christ hem hed bilong evri man, [and] man hem hed bilong woman.” (1 Cor. 11:3) Wanem nao olketa hasband, wea hed long famili, lanem from diswan? Disfala scripture showimaot olketa hasband mas deal witim waef bilong olketa olsem hao Jesus deal witim olketa disaepol bilong hem. No enitaem Jesus raf or spoelem olketa disaepol bilong hem bat hem evritaem kaen, showimaot love, hem hambol, and hem no askem olketa for duim samting wea olketa no fit for duim.—Matt. 11:28-30.

8. Wanem nao hasband savve duim mekem waef bilong hem lovem and respectim hem?

⁸ Christian hasband bae no need for talem waef bilong hem for mas respectim hem. Bat hasband bae traem best for “gohed minim gud waef bilong [hem]” and respectim hem “bikos olketa woman no strong olsem [olketa man].” (1 Pet. 3:7) Hasband shud iusim toktok wea showimaot hem respectim waef, and hem shud kaen long waef bilong hem nomata taem tufala stap seleva or witim olketa narawan. Samting wea hasband duim and toktok bilong hem shud showimaot hem lovem waef bilong hem. (Prov. 31:28) Taem hasband showimaot love long waef, bae waef lovem and respectim hem, and Jehovah bae blessim marit bilong tufala.

WAEF WEA HAMBOL AND WILLING FOR STAP ANDA

9. Hao nao waef savve showimaot hem stap anda long hasband bilong hem?

⁹ Love wea iumi garem for Jehovah bae helpem iumi for hambol and “stap anda long God wea hem nambawan and garem bigfala paoa.” (1 Pet. 5:6) Wanfala important wei wea waef savve showimaot hem hambol and stap anda long God hem nao for sapotim hasband bilong hem. Bible sei: “Iufala olketa waef mas stap anda long hasband bilong iufala, bikos datwan hem stret samting for olketa wea followim Lord for duim.” (Col. 3:18) Hem tru, maet waef no agree long samfala samting wea hasband bilong hem disaedem. Bat sapos samting wea hasband disaedem hem no againstim olketa law bilong God, waef wea stap anda long hasband bae sapotim hem.—1 Pet. 3:1.

10. Why nao hem important for waef stap anda long hasband?

¹⁰ Jehovah barava tinghae long olketa waef. Bible sei waef hem waka tugeta witim hasband bilong hem. (Mal. 2:14) Taem hasband and waef mekem olketa disison wea bae affectim famili, waef savve talemaot tingting and feeling bilong hem long wei wea showimaot respect, and long semtaem gohed for stap anda long hasband bilong hem. Hasband wea garem gudfala tingting bae herehere gud long wanem waef bilong hem talem. (Prov. 31:10-31) Taem waef willing for stap anda long hasband, datwan savve helpem famili for hapi and stap gud. And tu, hasband and waef bae hapi bikos tufala savve tufala duim wanem God laekem.—Eph. 5:22.

MAS WILLING FOR FORGIVE

11. Why nao hem barava important for hasband and waef forgivim narawan?

¹¹ For garem gudfala marit, hasband and waef mas willing for forgivim narawan. Taem hasband and waef “evritaem forgivim” narawan, datwan bae strongim marit bilong tufala. (Col. 3:13) Bat samting wea savve spoelem marit nao hem sapos hasband and waef tingim olowe nogud samting wea narawan duim, and iusim datwan for tok daonem narawan. Taem hasband and waef gohed garem nogud feeling and kros long narawan, bae hem no isi for tufala forgivim narawan and waka tugeta. Datwan savve mekem marit bilong tufala no strong, olsem olketa krak long wanfala building savve mekem datfala building for no strong. Bat taem hasband and waef willing for forgivim narawan, olsem Jehovah hem forgivim tufala, datwan bae strongim marit bilong tufala.—Mic. 7:18, 19.

12. Sapos iumi lovem narawan, wanem nao bae iumi willing for duim?

¹² Man wea showimaot trufala love hem “no tingim olowe nogud samting wea narawan duim long hem.” Bible sei, “man wea garem love hem evritaem willing for forgivim narawan.” (1 Cor. 13:4, 5, readim 1 Peter 4:8.) So sapos iumi lovem narawan, bae iumi willing for forgivim hem evritaem. Taem aposol Peter askem Jesus haomas taem nao hem mas forgivim narawan, Jesus sei: “Seventi-seven taem.” (Matt. 18:21, 22) Disfala toktok bilong Jesus showimaot wanfala Christian shud evritaem willing for forgivim narawan.—Prov. 10:12.a

13. Wanem nao savve helpem iu for garem wei for forgivim narawan?

¹³ Annette from Germany sei: “Sapos hasband and waef no laek for forgivim narawan, tufala savve start for kros olowe long narawan and no trustim narawan, and datwan savve barava spoelem marit. Taem hasband and waef forgivim narawan, datwan bae strongim marit and wei wea tufala fren gud tugeta.” Samting wea bae helpem iu for garem wei for forgive hem nao for showimaot iu tinghae long hasband or waef bilong iu. Lukaotem chance for praisem marit partner bilong iu. (Col. 3:15) Sapos iu willing for forgive, bae iu garem peace, stap gud witim marit partner bilong iu, and God bae blessim iu.—Rome 14:19.

FOLLOWIM GOLDEN RUL

14, 15. Wanem nao datfala Golden Rul, and hao nao wei for followim savve strongim marit?

¹⁴ Iumi laekem narawan for respectim and kaen long iumi. Iumi tinghae long narawan wea lisin long iumi and tingim feeling bilong iumi. Bat samfala taem maet iu herem samwan hem sei: “Samting wea hem duim long mi bae mi changem bak long hem.” Maet iumi luksavve why hem laek for duim datwan. Nomata olsem Bible sei: “Iu mas no sei: ‘From hem duim datwan long mi, bae mi duim sem samting long hem tu.’” (Prov. 24:29) Jesus storyim best samting for duim taem narawan duim samting wea mekem iumi feel nogud. Jesus talem disfala principle wea staka pipol kolem Golden Rul: “Samting wea iufala laekem pipol for duim long iufala, sem samting nao iufala mas duim long olketa.” (Luke 6:31) Jesus showimaot iumi shud no changem bak nogud samting wea narawan duim long iumi. Bat iumi shud duim long narawan samting wea iumi laekem hem for duim long iumi. Taem iumi followim Golden Rul insaed long marit, datwan bae helpem iumi for garem gudfala marit.

¹⁵ Taem hasband and waef tingim feeling bilong narawan, datwan strongim marit bilong tufala. Wanfala hasband long South Africa sei: “Mi and waef bilong mi traem best for followim Golden Rul long marit bilong mitufala. Hem tru, samfala taem mitufala kros long mitufala, bat mitufala waka hard for tingim feeling bilong narawan and for respectim and kaen long narawan.”

16. Olketa wanem samting nao hasband and waef mas no duim?

¹⁶ No storyim wik point bilong hasband or waef bilong iu long nara pipol, or evritaem storyim or mekfani long marit partner or long olketa narawan abaotem samfala wei bilong hem wea iu no laekem. And tu, olketa wea marit shud no garem tingting for trae winim narawan. Olsem example, wanfala bae no trae for pruvim hem strong winim narawan, trae for tok big winim narawan, or trae for talem toktok for barava daonem narawan. Hem tru, iumi evriwan no perfect and samfala taem iumi duim samting wea mekem narawan no hapi. Bat hem no stret for hasband or waef talem nogud toktok for mek shame long narawan or tok daonem narawan. And tu, hem barava no fitim for hasband or waef pushim, hitim, or killim narawan.—Readim Proverbs 17:27; 31:26.

17. Hao nao olketa hasband savve followim Golden Rul?

¹⁷ Long samfala kantri, olketa man savve raf or hitim waef for showimaot olketa strong. Bat Bible sei: “Man wea no kwiktaem for kros hem winim wanfala strongfala man, and man wea kontrolem kros bilong hem, hem winim man wea faet for tekovarem wanfala taon.” (Prov. 16:32) Iumi mas barava waka hard for kontrolem kros bilong iumi. Taem iumi duim datwan, iumi followim example bilong Jesus Christ, wea hem nambawan man wea winim evri narafala man. Man wea raf or hitim waef bilong hem, hem no strongfala man and Jehovah no hapi long hem. David, wea hem strongfala man and no fraet, hem sei: “Maet iufala kros, bat iufala mas no sin. Talemaot feeling bilong iufala insaed heart bilong iufala, taem iufala leidaon long bed bilong iufala, and iufala kwaet witim nomoa.”—Ps. 4:4.

“SHOWIMAOT LOVE”

18. Why nao hem important for hasband and waef gohed showimaot love?

¹⁸ Readim 1 Corinth 13:4-7. Hem barava important for hasband and waef showimaot love long each other. Bible sei: “Showimaot love, sorre long pipol, kaen long olketa, hambol, no raf, and patient. Nara samting moa, showimaot love, bikos datwan nao hem barava mekem pipol for wan mind.” (Col. 3:12, 14) Olketa hasband and waef mas showimaot love and followim example bilong Jesus Christ, wea willing for dae for olketa narawan. Hasband and waef wea showimaot love olsem bae garem gudfala marit nomata samfala taem tufala feel nogud long narawan, wanfala long tufala hem sik, tufala garem problem saed long selen, or olketa problem kamap witim olketa relative.

19, 20. (a) Wanem nao savve helpem hasband and waef for garem gudfala marit? (b) Wanem nao bae iumi storyim long nextfala study?

¹⁹ For garem gudfala marit, hasband and waef mas waka hard, faithful, and showimaot love. Taem olketa problem kamap insaed long marit, tufala shud no garem tingting for finisim datfala marit, bat shud waka hard for strongim marit bilong tufala. Olketa hasband and waef wea lovem Jehovah and lovem each other shud waka hard for stretem problem bilong olketa bikos “love no savve finis.”—1 Cor. 13:8; Matt. 19:5, 6; Heb. 13:4.

²⁰ Hem barava no isi for garem gudfala marit long disfala taem wea “evri samting hem hard tumas.” (2 Tim. 3:1) Bat Jehovah savve helpem iumi for garem gudfala marit. Nara samting wea olketa wea marit mas faet againstim nao hem rong tingting bilong pipol long world abaotem sex. Long nextfala study, bae iumi storyim wei wea hasband and waef savve strongim marit bilong tufala.