Waswe, End Bilong World Hem Klosap?

Waswe, God bae letem olketa pipol for gohed spoelem olketa narawan and disfala earth? Nomoa. Olsem iumi storyim long firstfala article, God bae finisim wei for safa and wei wea pipol spoelem narawan. God wea wakem iumi and disfala earth laekem iumi for savve hem klosap nao for hem duim datwan. Hao nao bae iumi savve long datwan?

Tingim disfala tokpiksa: Sapos iu laek go long wanfala ples wea iu no kasem bifor, iu bae askem samwan for talem iu hao for kasem datfala ples. Then, taem iu lukim samfala samting wea hem talem iu for lukluk for hem, bae iu savve iu klosap for kasem datfala ples. Long sem wei tu, God hem givim iumi Bible wea storyim olketa big samting wea happen long world distaem. So taem iumi lukim olketa samting hia gohed for happen, iumi savve klosap nao world bae finis.

Bible sei olketa samting wea happen long world bae pruvim iumi stap long taem bilong end. Olketa samting wea happen distaem hem barava difren from olketa samting wea happen bifor. Iumi bae storyim samfala samting wea Bible sei bae happen.

1. OLKETA BIGFALA CHANGE LONG WORLD Long wanfala profesi long Matthew chapter 24 hem storyim wanfala saen abaotem staka samting wea bae happen long world. Olketa samting wea happen bae showimaot “world hem gogo for finis” and bae lead go long taem wea “world bae finis.” (Verse 3, 14) Olketa samting hia nao hem war, bigfala hangre, olketa earthquake kasem staka ples, plande pipol duim olketa samting wea no stret, love bilong staka no strong, and olketa bigman bilong religion laea long pipol. (Verse 6-26) Hem tru, olketa samting hia happen bifor, bat long taem bilong end evri samting hia bae happen nomoa long semtaem. Iumi bae storyim nara thrifala samting wea bae happen long datfala taem.

2. WEI BILONG PIPOL Bible sei long “olketa last day,” wea hem nao taem wea world hem gogo for finis, wei bilong pipol bae nogud tumas. Bible sei: “Pipol bae tingim olketa seleva nomoa, laekem tumas selen, tok praod, mekhae long olketa seleva, tok spoelem God and man, and no obeyim dadi and mami. Olketa bae no savve tinghae, bae no faithful, no garem love insaed long famili, and no willing for agree. Olketa bae laea for spoelem narawan, no savve kontrolem seleva, raf, and no laekem gud samting. Olketa bae spoelem fren bilong olketa, bighed, and praod tumas. Olketa bae no lovem God, bat bae interest nomoa for enjoyim seleva.” (2 Timothy 3:1-4) Hem tru, wei wea pipol no respectim narawan hem no niu samting, bat long “olketa last day” pipol bae duim olketa samting wea nogud tumas, and datwan hem mekem “evri samting hem hard tumas.” Waswe, iu lukim datwan?

3. PIPOL SPOELEM EARTH Bible sei God bae “finisim olketa wea spoelem earth.” (Revelation 11:18) Long olketa wanem wei nao pipol spoelem earth? Bible sei taem bilong Noah hem olsem taem bilong iumi tu. Bible sei tu: “Taem God luk kam long earth hem lukim evri samting hem nogud tumas and earth hem fulap witim pipol wea raf. Hem lukim olketa pipol barava spoelem earth.” So God sei: “Bae mi finisim olketa.” (Genesis 6:11-13) Waswe, iu lukim wei wea staka pipol long world distaem savve raf tumas? Distaem tu, pipol garem paoa for finisim evriwan wea stap long disfala earth. Olketa garem staka weapon wea savve duim datwan. And pipol spoelem earth long narafala wei tu. Olketa duim olketa samting wea spoelem air wea iumi brithim, and olketa duim olketa samting wea spoelem land and sea wea datwan spoelem staka animal and plant.

Tingim diswan: ‘Long 1914, waswe, pipol garem paoa for finisim evriwan long earth?’ Nomoa, bat distaem olketa man garem staka weapon wea savve duim datwan, and tu, olketa spoelem environment bilong iumi. Olketa gohed for wakem olketa niu samting saed long technology bat olketa no tingim wei wea datwan savve spoelem pipol and disfala earth. Nomata olsem, hem no olketa man nao for disaedem or kontrolem wanem bae happen long future. God sei hem bae finisim pipol wea spoelem disfala earth!

4. TALEMAOT GUD NIUS EVRIWEA LONG WORLD Profesi long Matthew storyim nara samting wea bae happen. Hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” (Matthew 24:14) Datfala preaching waka hem barava difren from preaching waka wea staka religion duim bifor. Long olketa last day, olketa wea preach bae mekhae long “disfala gud nius abaotem Kingdom.” Waswe, iu savve long eni religion wea mekhae long datfala message? And nomata maet hem luk olsem samfala preachim message hia, waswe, olketa preach long tu-thri ples nomoa or olketa talemaot disfala gud nius long “evri ples long world”?

Web site bilong Olketa Jehovah’s Witness, www.jw.org, mekhae long “disfala gud nius abaotem Kingdom.” Datfala Web site garem olketa pablikeson wea storyim gud nius abaotem Kingdom long winim 700 languis. Waswe, iu savve long eni nara religion wea helpem pipol long full world for savve long gud nius long kaen wei olsem? Nomata long taem wea olketa no wakem Internet yet, staka pipol savve Olketa Jehovah’s Witness olketa pipol wea talemaot gud nius abaotem Kingdom bilong God. Start kam long 1939, title bilong Wastaoa magasin hem, “Wastaoa wea Talemaot Kingdom Bilong Jehovah.” Wanfala buk wea story abaotem olketa religion hem sei “no eni nara religion preach long staka pipol and long staka kantri” olsem Olketa Jehovah’s Witness. Disfala preaching waka mekhae long wei wea God bae iusim Kingdom bilong hem for finisim disfala world.

END BILONG WORLD HEM KLOSAP

Waswe, iu luksavve fofala samting wea iumi storyim long disfala article hem happen distaem? For winim wan handred year, Wastaoa magasin storyim olketa samting wea happen long world for helpem pipol wea readim datfala magasin for luksavve end bilong world hem klosap. Bat samfala pipol sei disfala world hem gud nomoa. Olketa tingse from iumi herem staka nius, datwan nao mekem pipol for sei disfala world hem nogud tumas. Nomata olsem, staka pipol luksavve olketa samting wea happen distaem pruvim iumi stap long taem wea world hem gogo for finis.

Samfala savveman sei iumi klosap long end bilong disfala world. Olsem example, long 2014, Science and Security Board of the Bulletin of the Atomic Scientists, givim warning long United Nations Security Council abaotem olketa samting wea pipol duim wea gogo bae finisim iumi olketa man. Olketa scientist hia sei sapos pipol no kwiktaem duim samting, olketa man bae finisim evri samting wea laef long earth. Olketa Jehovah’s Witness and staka pipol wea readim Wastaoa magasin barava sure iumi stap long olketa last day and end bilong world hem klosap. Bat iumi no need for fraet long wanem bae happen long future. Why nao olsem? Bikos iu savve stap laef taem disfala world hem finis!