ANSA FOR OLKETA BIBLE KWESTIN
Why nao Bible storyim olketa profesi?
Why nao Bible storyim samting wea happen long taem bilong iumi?—Luke 21:10, 11.
Plande profesi wea stap insaed long Bible storyim staka samting wea bae happen for mekem datfala profesi kamap tru. No eni man savve talem evri samting wea bae happen long future. So wei wea olketa profesi long Bible kamap tru, datwan pruvim Bible hem toktok bilong God.—Readim Joshua 23:14; 2 Peter 1:20, 21.
Olketa profesi wea kamap tru finis helpem iumi for garem faith long God. (Hebrew 11:1) And tu, olketa profesi hia helpem iumi for sure wanem God promisim for future bae kamap tru. So olketa profesi long Bible givim iumi hope.—Readim Psalm 37:29; Rome 15:4.
Hao nao olketa profesi long Bible helpem iumi?
Samfala profesi helpem olketa wea worshipim God for luksavve olketa mas duim samting. Olsem example, taem olketa Christian long first century lukim samfala profesi kamap tru, olketa lusim Jerusalem. Gogo, taem Jerusalem hem distroe bikos staka pipol long there rejectim Jesus, olketa Christian stap farawe long wanfala sef ples.—Readim Luke 21:20-22.
Distaem, olketa profesi wea kamap tru finis showimaot klosap nao Kingdom bilong God bae finisim olketa gavman long disfala earth. (Daniel 2:44; Luke 21:31) Jesus Christ, datfala King wea Jehovah markem bae duim datwan, so hem important tumas for iumi duim samting distaem wea bae mekem iumi fit for sev.—Readim Luke 21:34-36.