Olketa Vision Abaotem Olketa Long Heven

JEHOVAH HEM OLMAETI GOD

“Mi lukim wanfala throne long heven wea wanfala man sidaon long hem. Man hia wea sidaon long throne hem shaen olsem wanfala jasper ston and wanfala spesol red ston. Wanfala rainbow wea luk olsem emerald ston, hem stap raonem datfala throne.”—Revelation 4:2, 3.

“Datfala braet laet wea shaen raonem God, hem olsem wanfala rainbow wea showaot long olketa cloud long day wea hem rain. Hem luk olsem glory bilong Jehovah.”—Ezekiel 1:27, 28.

Tufala vision hia wea aposol John and profet Ezekiel tufala lukim hem showimaot glory bilong Barava Haefala God, Jehovah. Hem garem olketa samting wea iumi savve long hem olsem olketa ston wea shaen, rainbow, and throne. Olketa samting hia helpem iumi for luksavve ples wea Jehovah stap hem barava luk naes and hem garem peace.

Samting wea olketa vision storyim hem barava fitim toktok bilong man wea raetem psalm wea sei: “Jehovah hem nambawan and hem fit for kasem praise. Hem hae winim olketa nara god. Evri god wea olketa nara pipol worshipim hem iusles. Bat Jehovah nao hem God wea wakem evri samting long heven. Hem garem bigfala paoa and ples wea hem stap hem barava luk naes.”—Psalm 96:4-6.

Nomata Jehovah hem Olmaeti God, hem laekem iumi for prea long hem and Bible sei hem bae herem olketa prea bilong iumi. (Psalm 65:2) God hem barava lovem and tingim iumi dastawe aposol John hem sei olsem: “God hem love.”—1 John 4:8.

JESUS STANDAP LONG RAET SAED BILONG GOD

“God givim holy spirit long Stephen. Hem luk go ap long skae, and hem lukim bigfala paoa bilong God hem shaen braet tumas and Jesus hem standap long raet saed bilong God. Hem sei: ‘Mi lukim skae hem open and Son bilong man hem standap long raet saed bilong God.’”—Acts 7:55, 56.

Stephen hem lukim datfala vision bihaen hem story witim olketa bigman bilong Jew religion wea bihaenem dae bilong Jesus. Datfala vision pruvim Jesus hem laef bak and hem garem hae position long heven. Aposol Paul hem sei olsem abaotem datwan: “[Jehovah] mekem [Jesus] laef bak and mekem hem sidaon long raet saed bilong hem long heven. Hem putim hem hae winim evri gavman and paoa and rul and evri nem long disfala world and long niu world wea bae kam.”—Ephesus 1:20, 21.

And tu, Bible sei Jesus hem followim example bilong Jehovah long wei for tingim pipol. Taem Jesus hem duim ministry bilong hem long earth, hem healim olketa wea sik and mekem olketa wea dae for laef bak. Hem showimaot hem barava lovem God and olketa man, dastawe hem sakrifaesim laef bilong hem. (Ephesus 2:4, 5) Klosap nao bae Jesus iusim paoa wea hem garem for mekem pipol evriwea long world wea obeyim God for kasem olketa blessing.

OLKETA ANGEL WEA WAKA FOR GOD

“Mi [profet Daniel] lukim olketa tekem kam olketa throne and mi lukim datfala Man from taem bifor kam [Jehovah] hem sidaon. . . . Plande thousand gohed waka for hem, and ten thousand taems ten thousand gohed for standap front long hem.”—Daniel 7:9, 10.

Long datfala vision abaotem heven, Daniel lukim plande angel. Masbi Daniel sapraes tumas taem hem lukim datfala vision! Olketa angel olketa spirit wea garem bigfala savve and paoa. Olketa garem olketa difren position, olsem olketa seraph and cherub. And Bible story abaotem olketa angel winim 250 taem.

Samfala pipol bilivim samfala wea dae olketa kamap olketa angel long heven. Bat datwan hem no tru. God wakem olketa angel firstaem bifor hem wakem olketa man. Taem God wakem disfala earth, olketa angel stap finis and olketa hapi and singaot taem olketa lukim datwan.—Job 38:4-7.

Olketa angel wea waka for God help long disfala important waka for talemaot gud nius abaotem Kingdom bilong God. (Matthew 24:14) Long wanfala vision, aposol John lukim hao olketa angel hia help long datfala waka. Hem sei: “Mi lukim nara angel hem flae long skae. Hem garem gud nius for talemaot long evriwan long earth. Disfala gud nius bae hem stap for olowe and hem talem long pipol bilong evri kantri, tribe, and languis.” (Revelation 14:6) Nomata olketa angel no story long pipol distaem olsem long bifor, olketa savve directim pipol wea duim preaching waka for go long olketa wea laek for lane abaotem God.

SATAN LAEA LONG STAKA PIPOL

“Bigfala faet hem kamap long heven. Michael [Jesus Christ] witim olketa angel bilong hem faetem datfala big snek, and datfala big snek witim olketa angel bilong hem faetem olketa tu bat olketa no win, and olketa no savve stap long heven nao. So olketa torowem go daon long earth datfala big snek witim olketa angel bilong hem. Hem nao datfala snek bilong bifor kam wea nem bilong hem Devil and Satan, wea hem laea long evriwan long earth.”—Revelation 12:7-9.

Taem Satan stap yet long heven, heven no garem peace. Start long taem wea olketa man stap long earth, wanfala angel bilong God laekem tumas olketa man for worshipim hem. So hem againstim Jehovah and hem kamap Satan, wea minim hem “man for againstim narawan.” Olketa nara angel tu joinim Satan for againstim Jehovah and olketa kamap olketa demon. Satan and olketa demon barava againstim Jehovah and olketa mekem olketa man for followim olketa and no followim wanem Jehovah talem.

Satan and olketa demon bilong hem duim olketa nogud samting and olketa barava raf. Olketa heitim olketa man and duim staka samting wea mekem pipol safa. Olsem example, Satan killim dae olketa animal and olketa wakaman bilong Job. Then hem killim dae tenfala pikinini bilong Job taem hem iusim “strongfala wind” for distroem haos wea olketa stap insaed. Bihaen datwan, hem mekem Job for garem “olketa boela long hed bilong hem go kasem leg bilong hem.”—Job 1:7-19; 2:7.

Klosap nao God bae finisim Satan. Taem Jesus torowem Satan kam daon long earth, Satan savve “hem garem lelebet taem nomoa.” (Revelation 12:12) Long future bae hem no stap nao, and datwan hem gudfala nius!

OLKETA WEA BAE GO LONG HEVEN

“Iu [Jesus] baem olketa hia from evri tribe and languis and pipol and kantri. Iu mekem olketa for kamap olketa king and olketa priest bilong God bilong iumi, and olketa bae kamap olketa king for rulim disfala earth.”—Revelation 5:9, 10.

Jesus hem laef bak and hem go long heven. Olketa narawan tu bae go ap long heven. Jesus sei long olketa aposol bilong hem wea faithful: “Mi go for redyim ples for iufala. . . . Bae mi kam bak moa and tekem iufala go long ples wea mi stap, mekem iufala tu stap long ples wea mi stap.”—John 14:2, 3.

Olketa wea go long heven bae rul witim Jesus long Kingdom, wea hem wanfala gavman wea bae rul ovarem pipol and olketa bae kasem staka blessing. Disfala Kingdom nao Jesus hem talem olketa wea followim hem for prea for hem. Jesus sei: “Dadi bilong mifala long heven, mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.”—Matthew 6:9, 10.

WANEM NAO OLKETA BAE DUIM LONG HEVEN?

“Mi [aposol John] herem wanfala voice from datfala throne hem singaot big olsem: ‘Tent bilong God hem stap witim olketa man. . . . Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.’”—Revelation 21:3, 4.

Datfala profesi wea John lukim long vision hem abaotem taem wea Jesus and olketa wea rul witim hem bae finisim Satan wea rulim disfala world. And olketa bae mekem earth for kamap paradaes. Dae and olketa samting wea mekem olketa man safa and sorre bae finis nao.

Waswe long staka billion pipol wea bae laef bak bat no go long heven? Long future, bae olketa enjoyim laef olowe long Paradaes long earth.—Luke 23:43.