Wanem Nao Bible Talem?

Waswe, Bible savve helpem iu taem iu wari tumas?

Wanem nao bae iu sei?

• Ia

• Nomoa

• Maet olsem

Bible hem sei

“Putim evri wari bilong iufala long hand bilong [God] bikos hem tingim iufala.” (1 Peter 5:7) Bible sei God savve helpem iumi for deal witim olketa samting wea iumi wari abaotem.

Wanem moa iumi savve lanem from Bible?

• Prea savve helpem iu for garem “peace bilong God” wea bae daonem wari bilong iu.—Philippi 4:6, 7.

• And tu, wei for readim Bible savve helpem iu for deal witim eni samting wea iu wari abaotem.—Matthew 11:28-30.

Waswe, enitaem wei for wari tumas bae finis?

Samfala tingse . . . wei for wari hem normal samting long laef, bat olketa narawan tingse wei for wari bae hem finis bihaen man dae and laef long nara ples. Wanem nao tingting bilong iu?

Bible hem sei

God bae finisim olketa samting wea savve mekem iumi wari. “No eniwan bae dae and no enitaem bae pipol sorre or krae or feelim pain tu.”—Revelation 21:4.

Wanem moa iumi savve lanem from Bible?

• Taem Kingdom bilong God hem rul, pipol bae stap long peace and no warim eni samting.—Isaiah 32:18.

• Wei for wari tumas bae hem finis. —Isaiah 65:17.