Truth Abaotem Olketa Angel

God hem Spirit, and olketa angel tu spirit olsem hem. Iumi no savve lukim olketa from olketa ‘no garem body olsem iumi olketa man.’ Olketa faithful angel wea stap long heven savve lukim God and story witim hem.—Luke 24:39; Matthew 18:10; John 4:24.

Samfala taem olketa angel savve change for kamap man mekem olketa kam long earth for duim waka wea God askem olketa for duim. Bihaen, olketa change for kamap spirit moa and go bak long heven.—Judges 6:11-23; 13:15-20.

Olketa story long Bible showimaot olketa angel wea samfala pipol bifor lukim hem olketa man angel. Nomata olsem, God no wakem olketa man angel and woman angel and for olketa marit and garem pikinini. And tu, olketa angel no stap long earth firstaem olsem man then bihaen olketa dae, olketa kamap angel long heven. Jehovah nao wakem olketa angel dastawe Bible sei “olketa son bilong trufala God.”—Job 1:6; Psalm 148:2, 5.

Bible story abaotem “languis bilong olketa man and olketa angel,” wea diswan showimaot olketa angel garem languis and savve story. Nomata God sendem olketa angel for story witim pipol long earth, hem no letem olketa man for worshipim olketa or prea long olketa.—1 Corinth 13:1; Revelation 22:8, 9.

Taem Bible sei namba bilong olketa angel hem ten thousand taems ten thousand, datwan showimaot maet staka billion angel nao stap long heven.—Daniel 7:10; Revelation 5:11.

Olketa angel “barava strong” and savve bilong olketa hem winim olketa man. Olketa savve flae fast tumas winim wanem iumi olketa man savve tingim.—Psalm 103:20; Daniel 9:20-23.

Nomata olketa angel barava strong and garem bigfala savve, olketa garem spialaen, and olketa no savve tu long samfala samting.—Matthew 24:36; 1 Peter 1:12.

Evri angel wei bilong olketa no semsem, olketa savve showimaot olketa wei bilong God, and olketa savve disaed seleva. So olketa savve chus for duim stret samting or samting wea no stret. Bat, sorre samting, samfala angel chus for againstim God.—Jude 6.