Taem Marit Partner No Faithful

“Mi laek dae nomoa taem mi herem hasband talem bae hem lusim mi, and go stap witim wanfala woman wea young winim mi. Taem mi tingim staka samting wea mi duim for hem, datwan mekem mi feel nogud.”—Maria, Spain.

“Taem waef bilong mi seknomoa lusim mi, hem olsem samfala part long body bilong mi dae nao. Olketa samting wea mitufala tingim, hope for hem, and plan for duim hem finis nao. Samfala day wea mi tingse mi no tingim nao samting wea happen, bat seke mi tingim moa and mi feel nogud tumas.”—Bill, Spain.

HASBAND or waef savve feel nogud tumas taem marit partner no faithful. Hem tru, maet samfala hasband and waef savve forgivim marit partner wea repent, and waka hard for strongim moa marit bilong tufala.a Bat staka wea marit partner no faithful long olketa savve barava safa tumas, nomata maet tufala stap tugeta moa or nomoa. Wanem nao olketa hia duim for deal witim kaen hard taem olsem?

TOKTOK LONG BIBLE SAVVE HELP

Staka hasband or waef wea marit partner no faithful long olketa kasem comfort insaed Bible, nomata olketa sorre tumas. Olketa savve God lukim hard taem wea kasem olketa and hem tu sorre witim olketa.—Malakae 2:13-16.

“Taem wea mi barava wari fogud, oltaem yu nao yu mekem tingting blong mi fo kamap gudfala moa.”—Sams 94:19.

Bill hem sei: “Taem mi readim datfala scripture, mi tingim Jehovah hem olsem wanfala kaenfala dadi wea barava kea for mi.”

“Bae iu faithful long man wea faithful long iu.”—Psalm 18:25, NW.

Carmen, wea hasband bilong hem no faithful long hem for samfala month sei: “Hasband bilong mi nating faithful long mi, bat mi trustim hao Jehovah hem evritaem faithful long mi. Hem bae no enitaem lusim mi.”

“Iufala mas no wari abaotem eni samting bat long eni samting wea iufala needim, askem God for datwan long wei for prea long hem witim wei for barava askem help bilong hem . . . Taem iufala duim olsem, peace bilong God wea winim nao wanem man savve minim bae gaedem heart and tingting bilong iufala.”—Philippi 4:6, 7.

Sasha hem sei: “Mi readim olketa verse hia staka taem, and tu, mi prea long hem evritaem, taem mi duim olsem, peace bilong God stap witim mi.”

Staka wea iumi storyim antap laek for givap samfala taem. Bat from olketa trustim Jehovah God datwan nao strongim olketa. Bill hem sei: “Faith helpem mi for garem gudfala laef nomata hem luk olsem evri samting hem nogud nao. ‘Nomata mi gotru long ples wea hemi barava tudak,’ God hem stap witim mi.”—Sams 23:4.

a For savve moa sapos iu bae forgive or nomoa, lukim olketa article long Awake! bilong April 22, 1999, “When a Mate Is Unfaithful.”

Wanem Samfala Duim

Ting raonem olketa scripture wea savve comfortim iu.

Bill sei: “Mi readim Bible buk Job and Psalm, and andalaenem evri verse wea mi lukim hem fitim wanem hem kasem mi. Mi luksavve olketa hia tu kasem hard taem wea mi kasem.”

Lisin long music wea savve comfortim iu.

Carmen sei: “Mi savve lisin long music taem mi no savve sleep long naet. Diswan hem savve barava comfortim mi.” Daniel sei: “Mi lane for pleim guitar and saond bilong music givim peace long mind and mekem mi hapi.”

Storyim feeling bilong iu.

Daniel sei: “Mi no man for storyim feeling bilong mi. Bat from mi garem olketa gudfala fren, mi savve story witim olketa evriday. Mi letem olketa savve long feeling bilong mi taem mi raetem leta and story long olketa. Datwan barava helpem mi.” Sasha sei: “Help wea mi kasem from famili bilong mi hem barava important. Mami bilong mi evritaem stap for helpem mi. Sapos mi laek for story, mami bilong mi lisin long mi. Dadi bilong mi tu hem lovem mi, and hem helpem mi for no duim samting wea mi no fit for duim.”

No givap for prea.

Carmen sei: “Mi prea evritaem. Mi feelim God hem stap witim mi, lisin long mi, and helpem mi. Mi fren gud witim God nomata mi kasem olketa nogud samting hia.”