Kwestin Box

◼ Waswe, iumi mas evritaem talem wanfala haosholder hao iumi willing for acceptim donation for waka raonem world?

Nomoa. Bat Kingdom Ministry Bilong Iumi long July 2008 hem garem article “Showim Iu Tinghae Long Olketa Buk.” Hem sei: “Samfala pablisa fraet for talem olketa haosholder hao olketa donation nao sapotim disfala waka.” Iumi need for luksavve long taem wea hem fitim for story abaotem donation. Iumi need for helpem pipol minim disfala waka iumi duim hem for teachim pipol abaotem Bible and hem no wanfala bisnis. Iumi no forcem pipol for givim donation.

Long firstaem wea iumi givim pablikeson long pipol wea interest, hem gud for iumi storyim wei wea olketa donation nao sapotim waka wea iumi duim. Hem gud for givim pablikeson nomoa long olketa wea interest or wea laek for readim olketa magasin bilong iumi bikos staka taem kaen pipol olsem bae givim donation.

Taem iumi go bak for givim moa literature long pipol wea interest olsem, staka taem olketa givim donation nomata iumi no storyim datwan. Samfala laek for savve long kost bilong buk or magasin bilong iumi. Iumi savve talem olketa, waka wea iumi duim hem no wanfala bisnis for salem olketa pablikeson bat iumi givim pablikeson long pipol wea interest nomoa. Iumi savve talem olketa tu, eniwan wea laek sapotim waka wea gohed evriwea long world savve givim donation. Sapos iumi go bak tu-thri taem finis long return visit, bat haosholder no ask abaotem donation, maet hem fitim for iumi story abaotem donation.

Nomata iumi givimaot olketa pablikeson bilong iumi long olketa wea interest and olketa no peim, iumi need for evritaem tingim hem kostim selen for wakem and printim olketa pablikeson bilong iumi. Iumi sure spirit bilong God bae helpem pipol bilong hem and olketa wea interest for givim olketa donation for sapotim Kingdom waka wea gohed long full world.