Truth Abaotem Kingdom blo God
Jesus teachim olketa follower blo hem for prea olsem: “Dadi bilong mifala long heven, mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.” (Matthew 6:9, 10) Wat nao Kingdom blo God? Wat nao hem duim? And why nao iumi shud prea for hem?
Jesus nao hem King lo Kingdom blo God.
Luke 1:31-33: “Iu mas nemim hem Jesus. Hem bae kamap wanfala barava important man and olketa bae kolem hem Son bilong Barava Haefala God. Jehovah God bae mekem hem King olsem dadi bilong hem, David, and bae hem King ovarem pipol bilong Jacob for olowe, and Kingdom bilong hem bae no savve finis.”
Main samting wea Jesus preach abaotem hem datfala Kingdom.
Matthew 9:35: “Jesus hem go long evri taon and vilij. Hem teach long olketa sinagog and hem preachim datfala gud nius abaotem Kingdom and hem healim enikaen sik wea pipol garem.”
Jesus storyim lo olketa disaepol blo hem wanfala saen for helpem olketa savve Kingdom hem klosap for kam.
Matthew 24:7: “Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa taem bilong bigfala hangre bae kasem plande pipol, and olketa earthquake bae sekem staka ples.”
Distaem olketa disaepol blo Jesus preach abaotem datfala Kingdom evriwea lo earth.
Matthew 24:14: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”