Truth Abaotem Future
Enitaem iu ting abaotem wat nao bae happen lo future? Bible storyim olketa important samting wea klosap for happen wea bae changem laef blo pipol lo full earth.
Jesus storyim hao for iumi luksavve “Kingdom bilong God hem klosap kam nao.” (Luke 21:31) Samfala samting wea hem profesi abaotem, hem olketa bigfala war, earthquake, bigfala hangere, and olketa nogud sik, olketa samting hia iumi lukim distaem.—Luke 21:10-17.
Bible storyim tu dat lo “olketa last day” lo rul blo olketa man bae showaot lo wei blo pipol, wei blo olketa bae nogud tumas. Iu savve read abaotem datwan lo 2 Timothy 3:1-5. Taem iu lukim olketa wei hia and wat pipol duim distaem, for sure iu agree dat disfala Bible profesi hem happen distaem.
Wat nao datwan minim? Klosap nao Kingdom blo God bae mekem olketa big change wea bae helpem pipol for garem gud laef moa. (Luke 21:36) Lo Bible, God promisim olketa gud samting for disfala earth and for pipol wea bae stap lo hem. Diswan hem samfala example.
GUD RULERSHIP
“And hem [Jesus] kasem paoa for rul, honor, and wanfala kingdom, mekem olketa pipol, nation, and olketa languis grup stap anda lo paoa blo hem. Rul blo hem bae stap for olowe and bae hem no savve finis, and kingdom blo hem bae no enitaem distroe.”—DANIEL 7:14.
Wat diswan minim: Iu savve enjoyim laef anda lo wanfala gavman wea bae rulim full earth wea God setimap wea Son blo hem nao bae King.
GUD HEALTH
“And no eniwan wea stap lo there bae sei: ‘Mi sik.’”—ISAIAH 33:24.
Wat diswan minim: No enitaem bae iu sik or disable; iu bae stap olowe and no dae moa.
PEACE BAE EVRIWEA
“Hem finisim olketa war lo evri ples lo earth.”—PSALM 46:9.
Wat diswan minim: Bae no eni war moa and evri wei for safa wea iumi kasem from datwan bae nomoa tu.
EVRI GUD PIPOL NAO BAE STAP LO EARTH
“Wicked pipol bae nomoa nao . . . Pipol wea hambol bae stap lo earth.”—PSALM 37:10, 11.
Wat diswan minim: Olketa nogud pipol bae nomoa nao, only pipol wea laek for obeyim God nomoa bae stap.
FULL EARTH BAE PARADAES
“Olketa bae buildim olketa haos and stap insaed, And olketa bae plantim olketa grape planteison and kaikaim frut blo olketa.”—ISAIAH 65:21, 22.
Wat diswan minim: Full earth bae luk naes tumas. God bae ansarem prea blo iumi taem hem bae duim will blo hem “lo earth.”—Matthew 6:10.