Part 6—Conductim Olketa Bible Study wea Muv Ahed
Taem Student Askem Kwestin
1 Taem iu startim finis wanfala Bible study, hem gud for studyim olketa Bible teaching followim order bilong olketa chapter long buk wea iufala study insaed, no just chusim eni difren subject nomoa each week. Diswan helpem student for buildim faondeson bilong stretfala savve and muv ahed long spiritual wei. (Col. 1:9, 10) Bat plande taem olketa student askem kwestin abaotem olketa didifren subject long taem bilong study. Wanem nao iumi shud duim?
2 Luksavve: Iu savve ansarem long datfala taem sapos olketa kwestin join witim wanem iutufala studyim. Sapos kwestin bilong hem bae kasem ansa long wanfala study wea bae kamap bihaen, hem gud for talem hem diswan. Bat sapos kwestin bilong hem no join witim wanem iufala studyim or iu need for duim research for ansarem long gudfala wei, maet hem gud for story abaotem datfala samting bihaen long study or long narataem. Samfala pablisa faendem hao wei for raetem kwestin bilong student mekem hem feel sure hao iu tinghae long datfala kwestin and hem help tu for no storyim difren samting long taem bilong study.
3 Olketa main study pablikeson no story deep tumas abaotem staka Bible teaching. Waswe, sapos wanfala student faendem hard for acceptim wanfala teaching or hol strong long biliv bilong hem wea no stret? Maet bae hem gud for storyim nara information wea barava explainim gud wanem Bible talem abaotem datfala subject. Sapos student still no acceptim datwan, story abaotem diswan long narataem bat gohed witim study. (John 16:12) Taem hem kasem samfala moa savve abaotem Bible and muv ahed long spiritual wei, maet bae hem minim datfala Bible teaching.
4 No Ova Tumas: Sapos iu no savve ansarem kwestin bilong hem, stap klia long wei for talem tingting bilong iuseleva. (2 Tim. 2:15; 1 Pet. 4:11) Talem hem hao bae iu go duim research and ansarem kwestin bilong hem bihaen. Iu savve iusim chance hia for teachim student hao for duim research. Isisi showim hem hao for iusim olketa difren tul wea organization bilong Jehovah provaedem for duim research. Long wei olsem bae gogo hem fit for kasem ansa seleva long olketa kwestin bilong hem.—Acts 17:11.