Mekem Wei for Offerim Magasin Kamap Important Part Long Ministry
1, 2. Long wanem wei nao Wastaoa and Awake! affectim pipol?
1 “Hem interesting, barava fitim samting wea gohed distaem, and encouragem man.” “Olketa magasin hia barava encouragem mi winim eni narawan.” Toktok hia showimaot tingting bilong olketa reader evriwea long world abaotem Wastaoa and Awake! Tru nao, olketa magasin bilong iumi olketa nambawan tul for kasem “evri difren kaen man” witim gud nius.—1 Tim. 2:4.
2 Wanfala bisnisman tekem Awake! magasin wea garem subject wea hem interest long hem. Bihaen, hem readim tu Wastaoa wea kam witim datfala Awake! wea garem wanfala article wea muvim hem for lukluk gud moa long Trinity, wea hem nao samting hem bilivim for full laef bilong hem. Diswan mekem hem barava interest. Bihaen sixfala month hem baptaes. Nara man evritaem kasem olketa magasin bat hem nating readim. Waef bilong hem no laek for story witim olketa Witness bat hem readim olketa magasin hia. Promis bilong Bible for earth kamap wanfala paradaes wea raeteous pipol bae stap barava muvim heart bilong hem. Gogo, hem, son bilong hem and sista bilong hem kamap olketa servant bilong Jehovah.
3. Why nao hem gud for offerim Wastaoa and Awake! tugeta?
3 Offerim Tufala Tugeta: Olketa example hia showimaot hao iumi no savve hu nao bae readim olketa magasin or wanem nao bae mekem olketa interest. (Eccl. 11:6) Dastawe, hem gud for offerim Wastaoa and Awake! tugeta, nomata iumi storyim nomoa wanfala magasin. Maet long samfala taem hem fitim for offerim winim tufala difren magasin taem iumi duim haos tu haos.
4. Hao nao iumi savve mekem schedule for magasin waka?
4 Hem gud for markem wanfala day long week for duim magasin waka. Long 2005 Calendar of Jehovah’s Witnesses, evri Saturday hem “Magazine Day.” Bat from ples and living bilong each wan hem difren, samfala maet markem nara difren day for offerim olketa magasin. Waswe, iu mekem hem wei bilong iu for duim olsem evri week?
5. Iumi shud iusim olketa wanem chance for offerim magasin and wanem nao savve helpem iumi for duim datwan?
5 Markem Goal Bilong Iuseleva: Wei for markem haomas magasin for offerim evri month olsem wanfala goal savve helpem iumi for ting strong for offerim magasin. Waswe, iu garem magasin route? Waswe, iu offerim magasin long olketa wea iu meetim long ministry? Waswe, iu savve offerim magasin long street, bisnis territory, and long olketa pablik ples? Waswe, iu tekem magasin taem iu travel, go long stoa, and long nara ples iu mas go long hem? Iusim gud evri chance wea iu garem for helpem nara pipol kasem gud samting from Wastaoa and Awake!
6. Hao nao iumi savve offerim olketa old magasin?
6 Iumi savve markem goal tu for offerim olketa old magasin wea iumi garem. Nomata sapos iumi no offerim magasin insaed wan or tufala month from date bilong hem, information insaed magasin still savve helpem man. Offerim long pipol wea interest for readim. For plande million pipol, Wastaoa and Awake! magasin hem olsem “toktok . . . long barava taem.” (Prov. 25:11) Iumi laek offerim mekem plande million pipol moa for savve long Jehovah and servem hem.