Evri Difren Kaen Man Bae Sev
1. Wanem nao iumi mas duim sapos iumi laekem God for acceptim iumi?
1 Kaeness bilong God wea iumi no fit for kasem hem mekem iumi garem chance for sev. Will bilong Jehovah hem “for evri difren kaen man mas sev and kasem stretfala savve bilong truth.” (1 Tim. 2:3, 4) God acceptim iumi from iumi showimaot faith long ransom sakrifaes bilong Jesus, no from kala skin, position long community, savve, or lukluk bilong iumi. (John 3:16, 36) From iumi pipol wea waka witim God, iumi mas aotem tingting for favorim pipol bikos diswan maet mekem iumi rejectim pipol wea Jehovah willing for acceptim.
2, 3. Wanem nao bae helpem iumi for no judgem pipol from lukluk bilong olketa?
2 Stap Klia Long Wei for Judgem Narawan: Jehovah hem lukluk long heart bilong man, and hem no duim diswan for spoelem or favorim hem. (1 Sam. 16:7) Jehovah luksavve tu long wanem datfala man fit for duim. Dastawe Jehovah ting long olketa wea laek for mekem hem hapi olsem olketa barava spesol. (Hag. 2:7) Waswe, tingting bilong iumi abaotem olketa narawan hem semsem witim tingting bilong God?
3 Lukluk bilong samfala pipol wea iumi meetim long ministry maet mekem iumi sapraes. Kaleko bilong olketa maet luk nogud or maet hem ova tumas. Maet olketa no keepim gud beard bilong olketa, or maet olketa garem ring long nose or lip bilong olketa. Samfala maet no garem eni ples for stap. Maet samfala kros long iumi. Winim wei for judgem olketa and sei hard for olketa kamap worshiper bilong Jehovah, iumi shud garem gudfala tingting abaotem olketa, “from bifor iumi tu no tingting gud, no obey, [and] followim laea samting.” (Titus 3:3) Wei for tingim diswan bae mekem iumi willing for preach long evriwan nomata sapos lukluk bilong olketa mekem olketa luk olsem olketa nogud.
4, 5. Example bilong Jesus and Paul teachim iumi wanem?
4 Example Bilong Olketa Bifor: Jesus Christ willing for helpem olketa man wea pipol tingse bae hard for olketa kamap gud. (Luke 8:26-39) Jesus no enitaem acceptim wei for duim rong samting, bat hem luksavve hao samting wea happen long laef bilong man savve isi for mekem hem duim nogud samting. (Luke 7:37, 38, 44-48) Dastawe hem barava minim why nao pipol duim samting and hem “barava feel sorre long olketa, from olketa olsem sheep wea no garem shepherd.” (Mark 6:34) Waswe, iumi savve duim moa samting for followim example bilong hem?
5 Pipol sutim, killim and putim aposol Paul insaed prison. (Acts 14:19; 16:22, 23) Waswe, evri hard samting hia mekem hem kros and mekem hem tingse waka bilong hem for preach long samfala nation and pipol hem iusles? Barava nomoa. Hem savve hao pipol wea garem honest heart, olketa stap long evri difren kaen nation, and hem barava laek for faendem olketa. Waswe, iumi tu ting olsem abaotem pipol long territory bilong iumi wea kam from difren ples and wea garem difren kastom?
6. Hao nao fasin bilong iumi savve affectim olketa niu wan wea kam long kongregeson meeting?
6 Wei for Welkamim Olketa Narawan Distaem: Plande pipol bilong God hapi tumas from olketa brata and sista wea no letem lukluk bilong man affectim tingting bilong olketa, welkamim olketa long kongregeson. Wanfala man wea beard bilong hem grow big and hair bilong hem long kasem shoulder bilong hem, and wea werem dirty kaleko, hem kam long wanfala Kingdom Hall long Germany. Plande pipol long community ting long hem olsem wanfala nogud man. Nomata olsem, olketa brata and sista welkamim hem long meeting. From hem barava tinghae long datwan, hem kam bak long week bihaen. No longtaem nomoa hem changem lukluk bilong hem, hem stop for smoke, and hem stretem marit bilong hem saed long law. No longtaem bihaen, hem and waef bilong hem and tufala pikinini servem Jehovah tugeta.
7. Hao nao iumi savve followim example bilong God bilong iumi wea no savve favorim man?
7 Iumi followim example bilong God bilong iumi taem iumi invaetem evriwan for kasem gud samting from kaeness bilong God wea iumi no fit for kasem.
Blurb long page 4]
“God hem no saed witim eniwan, bat long evri nation man wea fraet long hem and duim raeteous fasin nao hem acceptim.”—Acts 10:34, 35.