Part 8—Conductim Olketa Bible Study wea Muv Ahed
Leadim Olketa Student Kam Long Organization
1. Why nao hem gud for storyim wanfala point abaotem organization bilong Jehovah each week long taem wea iu go for duim Bible study?
1 Goal bilong iumi taem iumi duim Bible study hem no for lanem student olketa teaching nomoa, bat hem for helpem hem for kamap part long Christian kongregeson. (Zech. 8:23) Datfala brochure Olketa Witness Bilong Jehovah—Wan Mind for Duim Will Bilong God Evriwea Long World savve helpem iumi for duim diswan. Givim wanfala copy for niu Bible student bilong iu, and encouragem hem for readim. Witim datwan, iusim lelebet taem each week taem iu go for study for storyim wanfala point abaotem organization bilong Jehovah.
2. Hao nao iu savve encouragem olketa Bible student for kam long meeting long kongregeson?
2 Meeting Bilong Kongregeson: Wei for kam long olketa meeting bilong kongregeson hem nao main samting wea savve helpem olketa Bible student tinghae long organization bilong God. (1 Cor. 14:24, 25) Dastawe, maet hem gud for iu helpem olketa for savve abaotem faevfala meeting wea kamap evri week thru long wei for explainim wanfala meeting long each taem wea iu study. Talem title bilong next pablik tok. Showim information wea bae iumi studyim long Wastaoa Study and Kongregeson Buk Study. Explainim long hem wanem nao Theocratic Ministry Skul and Service Meeting. Taem iu kasem wanfala assignment long datfala skul, maet iu savve practicem datwan witim hem. Sharem olketa interesting point wea kamap long olketa meeting. Iusim olketa piksa insaed olketa pablikeson bilong iumi for helpem olketa lukim wanem nao happen long olketa meeting. Start from fastaem wea iufala start for study, invaetem olketa for kam long meeting.
3. Wanem nao samfala samting wea iumi savve storyim abaotem organization?
3 Sapos hem klosap taem for Memorial, olketa assembly, and visit bilong circuit overseer, hem gud for iusim lelebet taem for explainim and mekem olketa interest long olketa arrangement hia. Iu savve isisi ansarem olketa kwestin olsem: Why nao iumi garem nem Olketa Jehovah’s Witness? Why nao iumi kolem ples bilong iumi for meeting, Kingdom Hall? Wanem nao waka bilong olketa elder and ministerial servant? Hao nao iumi organizem preaching waka and territory bilong iumi? Hao nao olketa wakem literature bilong iumi? Hao nao organization bilong iumi kasem selen? Branch office and Governing Body duim wanem for lukaftarem disfala waka?
4, 5. Hao nao olketa video bilong iumi savve mekem man for tinghae long organization?
4 Olketa Video wea Help for Teachim Man: Nara samting wea savve helpem olketa Bible student for savve long nambawan organization bilong Jehovah hem olketa video bilong iumi. Datfala video To the Ends of the Earth hem showim waka bilong iumi for preach evriwea long world; Our Whole Association of Brothers hem showim olketa brata bilong iumi evriwea long world; and United by Divine Teaching showim wei wea Olketa Jehovah’s Witness garem wan mind. Wanfala woman wea tekem olketa magasin and olketa nara literature bilong iumi for faevfala year finis hem krae taem hem lukim datfala video Jehovah’s Witnesses—The Organization Behind the Name. Hem trustim finis olketa Witness wea savve visitim hem, bat taem hem lukim disfala video, hem feel hem savve trustim organization tu. Olketa startim study witim hem, and week bihaen, hem attendim olketa meeting long Kingdom Hall.
5 Taem iumi iusim lelebet taem each week and iusim olketa tul wea iumi garem, iumi savve helpem olketa Bible student bilong iumi for kam long organization wea Jehovah iusim distaem.