Helpem Olketa Narawan for “Obey From Heart”
1. Wanem nao Jehovah laekem olketa worshiper bilong hem for duim?
1 For worshipim Jehovah long wei wea hem acceptim, hem barava important for garem fasin for obey. (Deut. 12:28; 1 Pet. 1:14-16) Klosap nao God bae judgem “olketa wea no savve long [hem] and olketa wea no obeyim gud nius.” (2 Thess. 1:8) Hao nao iumi savve helpem olketa narawan ‘obeyim from heart,’ olketa teaching long Word Bilong God?—Rom. 6:17.
2. Why nao hem important for helpem olketa narawan mekem grow strongfala faith?
2 Help for Mekem Grow Faith and Love: Long Bible, fasin for obey hem barava join witim faith. Aposol Paul story abaotem “komand bilong God bilong olowe for mekhae long wei for obey thru long faith.” (Rom. 16:26) Hebrews chapter 11 storyim staka difren example bilong olketa wea showimaot faith, wea plande long olketa hia mas duim samting followim will bilong Jehovah. (Heb. 11:7, 8, 17) Long narasaed, wei for no obey hem join witim wei for no garem faith. (John 3:36; Heb. 3:18, 19) Iumi need for mekem grow gudfala wei for iusim Word Bilong God for helpem olketa narawan mekem grow kaen faith wea muvim man for obey.—2 Tim. 2:15; Jas. 2:14, 17.
3. (a) Hao nao fasin for obey hem join witim love? (b) Hao nao iumi savve helpem olketa Bible student mekem grow fasin for lovem Jehovah?
3 Fasin for obey hem join tu witim love for God. (Deut. 5:10; 11:1, 22; 30:16) First John 5:3 hem sei: “Wei for lovem God hem minim, iumi mas obeyim olketa komandment bilong hem; bat olketa komandment bilong hem no wanfala hevi.” Hao nao iumi savve helpem olketa Bible student mekem grow fasin for lovem Jehovah? Lukaotem chance long taem bilong study for helpem student mekem grow wei for tinghae long olketa fasin bilong Jehovah. Storyim love and fasin for tinghae wea iu garem for God. Helpem student for tingim wei wea hemseleva savve mekem grow wei for fren witim Jehovah. Important samting nao, love for Jehovah bae muvim olketa narawan—iumi tu—for obeyim hem from heart.—Matt. 22:37.
4. (a) Why nao example bilong iumi hem important? (b) Wanem nao iumi mas duim for mekem grow “heart wea obey”?
4 Example Bilong Iumi: Example bilong iumi hem barava important wei wea savve muvim olketa narawan for obeyim gud nius. Bat, iumi mas waka hard for mekem grow “heart wea obey.” (1 Ki. 3:9; Prov. 4:23) Wanem nao man need for duim? Feedim heart bilong iu witim spiritual kaikai long wei for evritaem studyim Bible and attendim evri meeting. (Ps. 1:1, 2; Heb. 10:24, 25) Kaban witim olketa wea strong for tru worship. (Prov. 13:20) Share evritaem long field ministry, and garem feeling for barava laek helpem pipol long territory bilong iu. Prea long Jehovah for helpem iumi mekem grow gudfala heart. (Ps. 86:11) Stap klia long olketa samting olsem dirty or raf hapitaem wea savve spoelem heart bilong iu. Aftarem olketa samting wea helpem iu for strongim wei wea iu fren gud witim God.—Jas. 4:7, 8.
5. Hao nao olketa wea obey kasem blessing?
5 Jehovah promisim pipol bilong hem bifor hao olketa bae kasem staka blessing sapos olketa lisin long voice bilong hem. (Deut. 28:1, 2) Distaem tu, Jehovah blessim “olketa wea obeyim hem olsem ruler.” (Acts 5:32) So, thru long teaching and example bilong iumi, iumi laek helpem olketa narawan for obey from heart.