Skul wea Helpem Iumi for Followim Wanem Iumi Lanem
1 Taem iumi lukluk long information long 2006 Theocratic Ministry Skul Schedule, bae iumi kasem gud samting sapos iumi duim best for followim olketa Bible teaching hia long holy service and evriday living bilong iumi. Iumi shud disaed strong for duim olketa samting wea iumi lanem.—John 13:17; Phil. 4:9.
2 Olketa Koment: Schedule for 2006 addim moa wanfala minute long taem for audience koment long part bilong olketa main point from Bible reading. Diswan minim brata wea duim disfala part mas finis insaed faev minute and no six minute. Olketa wea koment tu shud tingim taem. Wei for tingting gud raonem firstaem wanem for talem bae helpem man for givim gudfala koment insaed 30 second or no kasem 30 second. Samting olsem tenfala nao savve koment insaed faev minute long taem for audience tekpart.
3 Olketa Tok wea Teachim Man: Olketa main point from Bible reading and point kaonsel shud mekhae long hao datfala information savve helpem iumi long ministry and long olketa nara samting long evriday living bilong iumi. Speaker shud duim moa samting winim for muvim nomoa olketa wea lisin for laek duim samting. Hem shud talem wanem man need for duim, hao for duim, and storyim olketa gud samting wea man savve kasem from hem duim datwan. Hem savve sei: “Information hia talem iumi for duim samting long wei olsem,” or “Long ministry iumi savve iusim olketa verse hia long wei olsem.” Olketa elder and ministerial servant wea savve long olketa need bilong olketa brata and pipol long territory shud duim best for iusim datfala information long wei wea bae really helpem audience.
4 For iusim olketa Bible example savve barava helpem audience savve hao for followim information wea speaker storyim. Bihaen speaker story abaotem wanfala Bible example, hem savve sei, “Maet iu tu kasem diswan.” Hem shud mek sure wei wea hem iusim datfala Bible example hem fitim wanem datfala chapter storyim, fitim wanem full Bible talem, and fitim information wea “faithful and wise slave” pablisim.—Matt. 24:45.
5 Wisdom hem fasin for iusim savve and wei for minim samting long gudfala wei. “Wisdom hem main samting.” (Prov. 4:7) Taem iumi gohed for kasem wisdom wea helpem man thru long information long Theocratic Ministry Skul, iumi laek tu for mekem wei for sharem diswan long nara pipol kamap moabeta.