Followim Example Bilong Christ Long Ministry Bilong Iu
1 Jesus showimaot example for iumi followim long ministry bilong iumi. Hem showimaot plande taem and long olketa difren kaen wei hao hem barava lovem God and pipol. Hem teachim truth long olketa wea hambol and duim olketa kaenfala samting for olketa wea safa and kasem bigfala hevi from narawan.—Matt. 9:35.
2 Example and Olketa Teaching Bilong Jesus: Jesus no letem olketa samting saed long politik or wei for helpem community for pullim tingting bilong hem. And hem no letem eni nara gud samting wea hem savve duim for mekem hem no garem inaf taem for duim main waka bilong hem. (Luke 8:1) Hem strong for preachim datfala gud nius abaotem Kingdom bilong God, wea hem nao only samting wea bae stretem olketa problem bilong man. Jesus hem garem important waka for duim and lelebet taem nomoa for duim datwan. Taem pipol long Capernaum laekem Jesus for gohed stap long there, hem sei olsem long olketa disaepol bilong hem: “Iumi go long narafala ples . . . mekem mi savve preach long there tu, from hem nao reason why mi kam.”—Mark 1:38.
3 Bihaen Jesus trainim olketa disaepol bilong hem, hem sendem olketa go witim olketa kliafala instruction olsem: “Preach, and sei, ‘Kingdom bilong heven hem kam klosap.’” (Matt. 10:7) Hem teachim olketa follower bilong hem hao olketa samting saed long Kingdom shud main samting long laef bilong olketa. (Matt. 6:33) Last samting wea Jesus talem long olketa disaepol bilong hem bifor hem go ap long heven hem showimaot klia wanem nao olketa mas duim. Hem sei olsem: “Iufala mas go and mekem pipol long evri nation for kamap disaepol bilong mi.”—Matt. 28:19.
4 Wei wea Kingdom Hem Important: Kingdom bilong God nao main samting wea Jesus storyim, and hem encouragem olketa disaepol bilong hem for followim example bilong hem. Nomata pipol trae hard for stretem olketa problem bilong man, olketa bae no savve stretem datwan. (Jer. 10:23) Kingdom bilong God nomoa bae mekhae long wei wea nem bilong God hem holy and finisim for olowe olketa samting wea spoelem olketa man. (Matt. 6:9, 10) Pipol distaem ‘feel nogud and krae long evri rabis samting wea nara pipol duim.’ Wei for teachim pipol hia abaotem Kingdom bae mekem olketa hapi and satisfae long laef bilong olketa, and garem hope for future wea olketa savve depend long hem.—Ezek. 9:4.
5 Jesus hem gohed yet for directim waka for preachim gud nius abaotem Kingdom bilong God, and hem promisim iumi hao hem bae sapotim iumi. (Matt. 28:20) Waswe, ministry bilong iumi hem barava followim example wea Jesus showimaot for iumi? (1 Pet. 2:21) Long olketa last day distaem, iumi laek for duim evri samting wea iumi fit for duim for followim long klos wei example wea Jesus showimaot saed long ministry!