“Hem Givim Paoa Long Man wea Taed”
1 Iumi evriwan savve taed samfala taem. Iumi savve feel olsem no from waka or from olketa nara samting wea iumi duim nomoa, bat iumi savve taed tu from olketa problem wea iumi feisim long disfala “nogud taem wea hard for deal witim.” (2 Tim. 3:1) Wanem nao iumi olketa servant bilong Jehovah savve duim for kasem strong long spiritual wei, mekem iumi no lusim strong wea iumi garem for ministry bilong iumi? Iumi savve depend long datwan wea garem “strongfala paoa,” Jehovah. (Isa. 40:26) Hem luksavve long olketa need bilong iumi and hem barava laek for helpem iumi.—1 Pet. 5:7.
2 Arrangement Bilong Jehovah for Help: Jehovah givim holy spirit bilong hem for strongim iumi, wea hem nao datfala sem spirit wea hem iusim for creatim universe. Spirit bilong God savve helpem iumi for “strong bak moa” sapos iumi kamap taed. (Isa. 40:31) Askem iuseleva, ‘Wanem nao last taem wea mi prea for holy spirit strongim mi, mekem mi fulfillim Christian responsibility bilong mi?’—Luke 11:11-13.
3 Wei for readim and ting raonem Word bilong God evriday and for kasem spiritual strong long wei for studyim olketa Christian pablikeson bilong iumi evritaem, bae mekem iumi kamap olsem wanfala “tree wea olketa plantim klosap long olketa smol wata, wea garem frut long season bilong hem and wea leaf bilong hem no savve dae.”—Ps. 1:2, 3.
4 Jehovah iusim tu olketa Christian brata and sista for kamap “samting for helpem and strongim” iumi. (Col. 4:10, 11) Olketa savve strongim iumi long olketa kongregeson meeting thru long wei for encouragem iumi, givim olketa koment, and givim olketa tok. (Acts 15:32) Olketa Christian elder nao savve givim help long spiritual wei and encouragement wea savve strongim man.—Isa. 32:1, 2.
5 Ministry: Sapos iu start for kamap taed, no stop for preach! Wei for share long ministry evritaem hem difren from olketa nara samting wea iumi duim, from ministry barava strongim iumi. (Matt. 11:28-30) Wei for preachim gud nius hem helpem iumi tingim Kingdom bilong God evritaem and laef olowe and olketa nambawan blessing wea bae kamap long future.
6 Staka samting hem stap for iumi duim bifor disfala wicked world hem distroe. Iumi garem staka reason for gohed strong long service bilong iumi, from iumi “depend long strong wea God givim.” (1 Pet. 4:11) Jehovah God bae helpem iumi for finisim waka bilong iumi, from “hem givim paoa long man wea taed.”—Isa. 40:29.