“Hapi Nao Man wea No Givap Taem Hem Kasem Test and Hard Taem”
1 Evri Christian bae kasem olketa test and hard taem. (2 Tim. 3:12) Maet diswan hem saed long nogud health, hard taem saed long selen, temptation, persecution, or olketa nara samting. Olketa test and hard taem wea Satan iusim hem for mekem iumi wikdaon, hem for mekem iumi no tingim tumas Christian ministry bilong iumi, insaed diswan tu hem wei for no servem God. (Job 1:9-11) Long wanem wei nao wei for gohed strong taem olketa test and hard taem kasem iumi hem lead go long hapi living?—2 Pet. 2:9.
2 Redi for Olketa Test and Hard Taem: Jehovah hem givim iumi Word bilong hem, wea insaed diswan hem laef and olketa teaching bilong Jesus. Taem iumi herem olketa toktok bilong Jesus and followim, iumi mekem strong faondeson, and long wei olsem, hem redyim iumi for feisim olketa test and hard taem. (Luke 6:47-49) Iumi savve kasem help from olketa nara samting tu—olketa Christian brata bilong iumi, olketa kongregeson meeting, and olketa Bible pablikeson wea faithful and wise slave provaedem. Iumi kasem help from wei wea iumi prea evritaem, wea datwan hem wanfala present from God.—Matt. 6:13.
3 Jehovah hem givim iumi tu wanfala hope. Taem iumi buildim strongfala faith long olketa promis bilong Jehovah, hope bilong iumi savve kamap “olsem anka for soul, wea sure and stedy.” (Heb. 6:19) Long taem olketa raetem Bible, olketa ship no savve lusim wharf and go long open sea sapos olketa no garem anka, nomata sea hem fine. Wei for dropim daon anka taem wanfala cyclone hem kam bae stopem ship for drift and bangam reef. Olsem tu, wei for mekem grow faith bilong iumi distaem long olketa promis bilong God, bae strongim iumi taem olketa tokpiksa cyclone, wea minim olketa test and hard taem, hem kasem iumi. Olketa test and hard taem hia savve kamap long enitaem nomoa. Firstaem, pipol long Lystra barava acceptim preaching waka bilong Paul and Barnabas, bat evri samting hem change kwiktaem taem olketa Jew arrive wea againstim tufala.—Acts 14:8-19.
4 Fasin for No Givap Mekem Man Hapi: For gohed strong long ministry nomata pipol againstim iumi hem mekem iumi hapi nomoa. Iumi hapi taem pipol ting long iumi olsem strong follower bilong Christ and from diswan olketa sei iumi fit for kasem persecution. (Acts 5:40, 41) For gohed strong long taem bilong olketa test and hard taem helpem iumi for garem olketa fasin olsem hambol fasin, wei for obey, and fasin for gohed strong evribit. (Deut. 8:16; Heb. 5:8; Jas. 1:2, 3) Hem teachim iumi for depend long Jehovah, for trustim olketa promis bilong hem, and depend long hem for protection.—Prov. 18:10.
5 Iumi savve hao olketa test wea kasem iumi hem just for lelebet taem nomoa. (2 Cor. 4:17, 18) Olketa test and hard taem hia givim iumi chance for showimaot iumi garem bigfala love for Jehovah. Taem iumi gohed strong and no givap, iumi pruvim hao olketa samting wea Satan talem hem no tru. So iumi no givap! “Hapi nao man wea gohed for stand strong long test, bikos long taem wea God appruvim hem, hem bae kasem datfala crown bilong laef.”—Jas. 1:12.