‘Barava Followim Wei Bilong Jesus’
1. Hao nao iumi savve kamap man wea savve hao for preach?
1 Jesus hem no skul long sem skul olsem olketa bigman bilong Jew, bat hem savve tumas hao for preach winim eni nara man. Iumi hapi tumas bikos olketa wea raetem Bible olketa storyim preaching waka wea Jesus hem duim wea datwan savve helpem iumi. For iumi kamap man wea savve hao for preach, iumi mas ‘barava followim wei bilong hem.’—1 Pet. 2:21.
2. Wanem nao bae helpem iumi for showimaot sem kaen love wea Jesus garem for pipol?
2 Showimaot Love Long Pipol: Love nao hem mekem Jesus for laek helpem pipol. (Mark 6:30-34) Staka pipol long ples wea iumi preach “olketa feel nogud tumas” and olketa Bible truth nomoa savve helpem olketa. (Rom. 8:22) Sapos iumi tingim nogud samting wea kasem olketa and love wea Jehovah garem for olketa, datwan bae mekem iumi for gohed duim preaching waka. (2 Pet. 3:9) And tu, pipol bae laek for herem samting wea iumi storyim sapos olketa luksavve iumi tingim olketa.
3. Long wea nao Jesus talemaot gud nius?
3 Redi Evritaem for Story: Jesus hem redi evritaem for talemaot gud nius long olketa narawan. (Matt. 4:23; 9:9; John 4:7-10) Iumi tu mas redi for storyim truth long pipol wea iumi meetim evriday. Taem samfala pablisa go waka, go skul, go wakabaot, go long stoa, and go long eni narafala ples, olketa tekem Bible and samfala buk witim olketa for preach long pipol.
4. Hao nao iumi savve mekhae long Kingdom taem iumi preach?
4 Mekhae Long Kingdom: Taem Jesus hem preach, hem mekhae long gud nius abaotem Kingdom. (Luke 4:43) Maet firstaem iumi no storyim Kingdom, bat gogo iumi mas helpem man wea iumi story witim for luksavve hao datfala Kingdom nomoa savve helpem hem. Nomata maet iumi storyim olketa nogud samting wea happen long olketa last day, main samting wea iumi storyim nao hem datfala “gud nius abaotem olketa gudfala samting.”—Rom. 10:15.
5. Long wanem wei nao Bible savve helpem iumi for duim gud moa preaching waka?
5 Iusim Bible Evritaem: Taem Jesus hem preach, hem iusim Word bilong God evritaem. Hem no storyim or followim tingting bilong hemseleva. (John 7:16, 18) Hem studyim and followim Word bilong God for protectim hemseleva from olketa test wea kam from Satan. (Matt. 4:1-4) For iumi lanem gud moa olketa narawan, iumi mas readim Bible evriday and obeyim samting wea iumi readim. (Rom. 2:21) Taem iumi preach long pipol wea askem kwestin, iumi mas talem toktok from Bible and sapos hem fitim, readim datfala scripture for mekhae long wanem iu storyim. Iumi laek for helpem man wea iumi story witim for luksavve hao iumi no talemaot tingting bilong iumiseleva, bat iumi talemaot tingting bilong God.
6. Wanem nao Jesus duim for kasem heart bilong pipol?
6 Kasem Heart Bilong Pipol: “No eni nara man hem toktok olsem disfala man.” (John 7:46) Datwan nao toktok bilong olketa wea go for kasholem Jesus taem olketa chief priest and olketa Pharisee askem why nao olketa no tekem hem kam. Taem Jesus hem lanem pipol, hem story long wei for kasem heart bilong olketa. (Luke 24:32) Hem iusim olketa tokpiksa abaotem trufala samting wea pipol savve gud long hem. (Matt. 13:34) Jesus no storyim staka samting gogo olketa wea herehere no minim story bilong hem. (John 16:12) Hem evritaem mekhae long Jehovah and no long hemseleva. Iumi savve kamap olketa gudfala teacher sapos iumi ‘lukluk gud evritaem long wei bilong iumi for teach’ olsem Jesus hem duim.—1 Tim. 4:16.
7. Why nao Jesus hem gohed strong and no givap?
7 Gohed Strong and No Givap: Jesus hem duim olketa mirakol bat staka pipol les for herem samting wea hem storyim. (Luke 10:13) Firstaem, samfala long famili bilong Jesus olketa tingse hem “krangge nao.” (Mark 3:21) Nomata olsem, Jesus hem gohed strong and hem no givap. Hem gohed strong bikos hem barava savve hao truth wea hem storyim savve mekem pipol for kamap free. (John 8:32) Iumi tu bae gohed strong and no givap taem Jehovah hem helpem iumi.—2 Cor. 4:1.
8. Hao nao iumi savve followim Jesus long wei for preachim gud nius?
8 Duim Moa Samting: Taem Jesus hem preach, hem no warim tumas olketa material samting. (Matt. 8:20) Hem strong for preach and samfala taem hem preach gogo hem naet nao. (Mark 6:35, 36) Jesus hem luksavve hao hem no garem staka taem for finisim waka wea hem duim. From “lelebet taem nomoa hem stap,” iumi mas followim Jesus long wei wea iumi iusim taem, strong, and olketa samting wea iumi garem for preachim gud nius.—1 Cor. 7:29-31.
9. Wanem nao iumi mas duim for mekem iumi savve gud hao for preach?
9 Olketa Christian long taem bifor olketa savve gud hao for preach bikos olketa lane from Jesus. (Acts 4:13) Sapos iumi followim datfala nambawan Man for preach Jesus Christ, iumi tu savve duim gud preaching waka bilong iumi.—2 Tim. 4:5.