Iu Savve Kamap Wanfala Teacher!
1. Wanem spesol waka nao evri Kingdom pablisa savve duim?
1 Nambawan part long waka for preach hem for lanem trufala teaching long narawan. Taem hem herem gud nius abaotem Kingdom and iu helpem hem for fren gud witim God bilong universe, datwan hem samting for iumi tinghae long hem. (Jas. 4:8) Evri Kingdom pablisa shud traem wei for lanem samwan wea lukaotem olketa trufala teaching and for lukim hem changem tingting and wei bilong hem.—Matt. 28:19, 20.
2. Why nao maet samfala fraet for duim Bible study, and wanem nao bae helpem olketa for no garem problem olsem?
2 Trustim Jehovah: Long bifor, olketa wakman wea faithful tingse olketa no fit for duim waka wea olketa kasem. Taem Moses, Jeremiah, Amos, and olketa narawan olsem trustim Jehovah God, olketa no fraet and olketa duim bigfala waka. (Ex. 4:10-12; Jer. 1:6, 7; Amos 7:14, 15) Aposol Paul tu hem “no fraet.” Why nao olsem? Hem talemaot hao “God bilong iumi nao hem strongim” hem. (1 Thess. 2:2) Tru nao, iumi evriwan savve trustim Jehovah for helpem iumi, givim bigfala savve, and strong wea iumi needim for garem olketa Bible study wea kamap gud.—Isa. 41:10; 1 Cor. 1:26, 27; 1 Pet. 4:11.
3, 4. Wanem nao helpem iumi for lanem pipol abaotem Bible?
3 Willing for Lane: Nambawan Man for lanem man, Jehovah God, hem iusim Bible for lanem iumi for kamap teacher wea barava fit. (Isa. 54:13; 2 Tim. 3:16, 17) Wei for iusim gud eni chance for minim Bible long gudfala wei and for kamap gudfala moa long wei for lanem olketa trufala Bible teaching long pipol bae showaot iumi willing for lane. Datwan nao main waka bilong Theocratic Ministry Skul and Service Meeting, bat evri kongregeson meeting lanem iumi for iusim Bible for lanem pipol.
4 Trae lane hao for iusim olketa simpol wei for lanem pipol olketa trufala deep teaching long Bible. Ministry Skul buk, page 227, hem talem olsem: “Iu mas savve gud long subject bilong iu sapos iu laek for storyim long wei wea isi for narawan for minim.” Wei for ansa long olketa meeting bae helpem iumi for tingim olowe olketa main point. So redi gudfala, and iu bae kamap gud go moa long wei wea iu lanem narawan.
5. Hu moa long kongregeson savve helpem iumi for kamap gud go moa for lanem narawan?
5 Luk olsem olketa firstfala Christian wakman lane from olketa narawan taem olketa duim waka for mekem disaepol. (Luke 10:1) Sapos iu savve duim, go witim olketa pablisa wea garem savve, olsem olketa pioneer, elder, and traveling overseer, for duim Bible study. Lukim wei wea olketa iusim olketa simpol tokpiksa and nara samting olsem long olketa study buk bilong iumi for minim olketa trufala Bible teaching. Askem olketa abaotem wanem iu savve duim for kamap gudfala moa for lanem narawan. (Prov. 1:5; 27:17) Tinghae long wanem olketa lanem long iu, bikos hem olsem God nao lanem iumi.—2 Cor. 3:5.
6. Wanem nao iumi need for duim for kamap wanfala teacher bilong Bible?
6 Trustim Jehovah, and kasem gudfala samting from wei wea hem lanem iumi. Prea for help for kamap gud go moa. (Ps. 25:4, 5) Iu tu savve kasem hapi taem iu helpem narawan for kamap wanfala teacher bilong Bible, olsem iu!