Anda lo rul blo God, evri creation garem wan mind and stap lo peace

Why Nao Iumi Needim Kingdom blo God?

Start kam from taem God wakem Adam and Eve, Creator blo iumi, wea nem blo hem Jehovah, hem nomoa Ruler. Evri samting hem duim showimaot love. Hem wakem naesfala garden lo Eden for kamap hom blo tufala. Hem provaedem tu staka kaikai for tufala. And tu, hem givim gudfala waka for tufala duim. (Jenesis 1:28, 29; 2:8, 15) Olketa man bae still garem peace sapos olketa stap anda lo rul blo God wea showimaot love.

Adam holem frut wea Eve givim lo hem wea God stopem tufala for no kaikaim. — Adam and Eve rejectim rul blo God

Bible storyim hao wanfala bighed angel, wea bihaen hem kamap Satan, hem againstim raet wea God garem for rul. Hem olsem Satan sei, olketa man bae hapi sapos olketa rulim olketa seleva. Sorre tumas, firstfala parents blo iumi, Adam and Eve sapotim Satan and againstim God.—Jenesis 3:1-6; Revelation 12:9.

From Adam and Eve rejectim rul blo God, tufala lusim nao hom blo tufala, and datfala hope for laef olowe, and for garem gudfala health. (Jenesis 3:17-19) Disison wea tufala mekem affectim tu olketa pikinini wea born kam lo laen blo tufala. Bible sei from Adam hem sin, “sin kasem evriwan long world. . . From olketa sin, olketa dae.” (Rome 5:12) Nara big samting moa kamaot from sin: “Pipol i bosim olketa narafala pipol, so olketa safa.” (Eklesiastes 8:9) So taem olketa man rulim olketa seleva staka problem nao kamaot from datwan.

OLKETA MAN START FOR RUL

Nimrod wea praod hem standap. Lo bihaen, pipol wakem wanfala building. — Nimrod againstim Jehovah

First man for rul wea Bible storyim hem Nimrod. And hem againstim wei wea Jehovah rulim olketa man. Start kam from taem blo Nimrod, olketa man wea garem paoa iusim paoa blo olketa for spoelem narawan. Samting olsem 3,000 year go finis, King Solomon sei: “Mi lukim dat samfala pipol i mekem olketa narafala pipol fo safa. Olketa hu i safa, olketa krae tumas, bat no eniwan strongim tingting blong olketa.”—Eklesiastes 4:1.

Olketa man wea rul distaem olsem tu. Lo 2009, wanfala pablikeson blo United Nation sei pipol tingim nogud wei for rul nao, hem “main samting wea kosim evri nogud samting wea happen insaed olketa community blo iumi.”

TAEM FOR DUIM SAMTING!

World needim olketa gudfala man for rul and wanfala gud gavman. And hem nao samting wea Creator blo iumi promis for duim!

Olketa piksa: Olketa samting wea kamaot from rul blo man. 1. Wanfala woman lo Asia karem pikinini blo hem and sidaon lo saed building. 2. Wanfala olo man wea sik leidaon lo hospital. 3. Olketa soldia sutsut lo gun taem olketa faet. 4. Pipol wea kros olketa protest and holem olketa banner. 5. Wanfala woman and dota blo hem standap aotsaed lo haos and faendaot glass lo front door blo olketa hem brek. 6. Wanfala taon fulap lo olketa smoke wea kamaot from olketa factory and olketa paoa cable. — Nomata samfala gavman duim gudfala samting, olketa no savve stretem evri problem

God startim finis wanfala Kingdom, or gavman, wea bae changem olketa gavman blo man, and “rul blong hem bae stap evritaem olowe.” (Daniel 2:44) Diswan nao Kingdom wea staka million pipol prea for hem. (Matthew 6:9, 10) God bae no rul lo datfala Kingdom seleva. Bat, hem markem finis samwan wea stap lo earth bifor, for hem nao rul lo datfala Kingdom. Hu nao God chusim?