Waswe, Iu Savve Duim Big Go Moa Preaching Waka Bilong Iu?
1. Why nao preaching waka hem important winim enitaem bifor?
1 Taem Jesus lukim hao pipol interest long gud nius abaotem Kingdom, hem talem olketa disaepol bilong hem for “askem man wea ownim planteison for sendem go olketa wakaman for harvestim planteison bilong hem.” (Matt. 9:37, 38) From iumi stap long barava end bilong harvest, waka bilong iumi hem important winim enitaem bifor. Diswan minim, iumi shud prea and ting raonem hao for mekem big go moa preaching waka bilong iumi .—John 14:13, 14.
2. Wanem nao samfala duim for mekem big go moa preaching waka bilong olketa?
2 Preach Big Go Moa: Staka savve pioneer, bikos Jehovah nao helpem and leadim olketa. (Ps. 26:2, 3; Phil. 4:6) Samfala waka hard for auxiliary pioneer for wan or tufala month evri year. Diswan hem nambawan wei for olketa duim big go moa preaching waka. Hapi wea olketa kasem from olketa auxiliary pioneer, mekem staka laek kamap regular pioneer.—Acts 20:35.
3. Sapos iu pioneer bifor, wanem nao iu savve ting raonem?
3 Waswe, Iu Savve Pioneer Moa?: Sapos iu pioneer bifor, iu mas tingim yet olketa blessing wea iu kasem long datfala taem. Waswe, iu prea and ting raonem sapos iu fit for pioneer moa? Samting wea stopem iu for pioneer bifor maet no stopem iu for pioneer distaem. Maet distaem nao hem taem for iu enjoyim nambawan waka for pioneer moa.—1 John 5:14, 15.
4. Wanem spesol waka nao iumi evriwan savve duim?
4 Preaching waka hem gohed for longfala taem and hem klosap finis. (John 4:35, 36) Hem gud for iumi evriwan ting raonem wanem iumi duim distaem, for luksavve sapos iumi savve changem eni samting mekem iumi duim big go moa preaching waka bilong iumi. Sapos hem hard for iumi duim big go moa preaching waka bilong iumi, waswe, iumi savve faendem eni wei for duim gud go moa? (Mark 12:41-44) Olketa wea fit for duim disfala spesol waka distaem, olketa kasem nambawan waka from Jehovah!—Ps. 110:3.