Praisem Jehovah Evriday
1. Wanem nao evri wakaman bilong God laek for duim, and why nao olsem?
1 King David talemaot hao hem barava laek for praisem Jehovah ‘evriday,’ for olowe. (Ps. 145:2, 7, 21) Iumi tu fit for praisem Jehovah evriday.—Ps. 37:10; 145:14, 18; 2 Pet. 3:13.
2. Wanem nao olketa famili savve duim for praisem Jehovah evriday?
2 Long Haos: Iumi garem olketa buk wea savve helpem iumi for storyim olketa spiritual samting taem iumi lukluk long text evriday, taem iumi duim Famili Worship, and taem iumi redyim olketa part for kongregeson meeting. Plande famili trae for kaikai tugeta wanfala or winim wanfala taem evriday. Datwan minim olketa garem taem for story gud tugeta and praisem Jehovah. Taem mami and dadi startim olketa gudfala story olsem, datwan savve helpem olketa for ‘trainim and lanem olketa pikinini long wei bilong Jehovah.’—Eph. 6:4; Deut. 6:5-7.
3. Wanem chance for praisem Jehovah nao iumi garem taem iumi hipap witim olketa brata and sista?
3 Witim Olketa Brata and Sista: Taem iumi go long preaching or olketa kongregeson meeting witim olketa brata and sista, iumi garem nambawan chance for praisem Jehovah. (Prov. 15:30; Phil. 4:8; Heb. 13:15) From iumi evriwan lovem Jehovah, then taem iumi story tugeta hem shud isi nomoa for talem olketa toktok wea showaot iumi tinghae long gudfala wei bilong Jehovah.—Ps. 106:1.
4. Long wanem difren kaen wei nao iumi savve praisem Jehovah?
4 Story Long Olketa wea No Witness: Nomata sapos iumi no savve go long preaching evriday, wei for story lelebet witim olketa wea iumi waka witim, olketa skul fren bilong iumi, and olketa nara pipol abaotem Jehovah and olketa plan bilong hem, savve helpem gudfala pipol for garem hope. (Ps. 27:14; 1 Pet. 3:15) Taem wanfala sista go long plane, hem preach long wanfala woman wea barava hapi long wanem hem storyim. From datwan hem givim address and telephone namba bilong hem long sista hia mekem tufala savve story moa bihaen. Taem disfala world hem gogo for nogud tumas, pipol bilong Jehovah gohed for talemaot “gud nius abaotem samting wea naes tumas” long pipol wea willing for lisin. Diswan helpem pipol for garem hope and datwan mekem olketa for praisem Jehovah.—Isa. 52:7; Rom. 15:11.
5. Why nao iumi laek for praisem Jehovah, and wanem nao savve kamaot from diswan?
5 Jehovah mas barava hapi for herem olketa wakaman bilong hem praisem hem evriday! Evri samting wea Jehovah wakem wea stap raonem iumi, praisem Jehovah evriday and iumi tu savve praisem Hem evriday long haos bilong iumi, long kongregeson, and taem iumi story long olketa wea no praisem Jehovah yet.—Ps. 19:1-4.