‘Duim Samfala Samting Moa’ for Helpem Bible Study Bilong Iu
1. Wanem nao iumi need for duim for helpem Bible study?
1 Iumi need for waka hard for helpem wanfala Bible study for dedicate, winim wei for study evritaem witim hem nomoa. Aposol Paul markem wei wea hem fren gud witim olketa wea hem teachim, olsem wanfala mami wea lukaftarem gud olketa pikinini bilong hem. Iumi hapi tu for ‘duim samfala samting moa’ for helpem olketa Bible study bilong iumi, mekem olketa gohed for fren gud witim Jehovah.—1 Thess. 2:7-9.
2. Why nao iumi mas interest long olketa Bible study, and wanem nao iumi savve duim for showimaot datwan?
2 Interest Long Olketa: Taem Bible study followim wanem hem lanem, conscience bilong hem bae helpem hem for no fren nao witim olketa wea no followim toktok long Bible. (1 Pet. 4:4) Famili bilong hem maet no laekem hem. (Matt. 10:34-36) Taem iumi interest long olketa, datwan bae mekem olketa no feel olsem olketa missim samting. Wanfala missionary brata hem sei: “Taem iumi study finis, iumi mas no hariap for lusim Bible study bilong iumi. Sapos hem fitim, hem gud for iumi stap and story lelebet witim hem.” Iu mas redi evritaem for helpem Bible study bilong iu. Olsem example, iu savve ringim hem or go lukim hem taem hem sik! Iu savve sidaon witim hem long taem bilong meeting, and sapos hem fitim, iu savve helpem hem for lukaftarem pikinini!
3. Wanem nao iumi savve duim for helpem Bible study kasem encouragement from olketa long kongregeson?
3 Kongregeson Savve Help: Sapos iu preach klosap long haos bilong Bible study bilong iu, hem bae gud sapos iu tekem brata or sista wea iutufala waka for go meetim hem. Long taem wea fitim, invaetem olketa difren brata and sista, or eni elder for go witim iu samfala taem for duim study. No longtaem bihaen iu startim study, iu savve encouragem Bible study bilong iu for kam long olketa meeting long Kingdom Hall tu. Diswan bae encouragem hem for fren gud witim olketa brata and sista long kongregeson wea gogo maet olketa savve kamap spiritual famili bilong hem.—Mark 10:29, 30; Heb. 10:24, 25.
4. Wanem gud samting nao savve kamaot from hard waka bilong iumi?
4 Mami and dadi wea waka hard for helpem pikinini for strong long spiritual wei, bae hapi tumas taem pikinini disaed for worshipim Jehovah and gohed duim wanem Hem laekem. (3 John 4) Iumi tu savve hapi sapos iumi duim samfala samting moa for helpem olketa Bible study bilong iumi.