Gud Samting for Olketa Famili
1. Hao nao olketa Israelite famili kasem gud samting from wei for keepim Sabbath evri week?
1 Wei for keepim Sabbath hem gud samting for olketa famili wea showimaot Jehovah kaen tumas long olketa. Olketa Israelite rest from waka wea olketa savve duim, and olketa garem taem for ting raonem gudfala wei bilong Jehovah and wei wea olketa fren witim hem. Dadi and mami savve iusim disfala chance for minim gud Law bilong God long pikinini bilong olketa. (Deut. 6:6, 7) Wei for keepim Sabbath evri week helpem pipol bilong Jehovah for ting raonem wei wea olketa fren witim hem.
2. Wei for keepim Sabbath lanem iumi wanem samting abaotem Jehovah?
2 Hem tru, Jehovah no askem olketa famili for keepim Sabbath. Bat datfala law lanem iumi samfala samting abaotem God bilong iumi. Hem evritaem laekem pipol bilong hem for kasem gud samting. (Isa. 48:17, 18) Distaem, wanfala wei wea Jehovah showimaot hem laekem iumi for kasem gud samting, hem nao long wei for duim Famili Worship.
3. Famili Worship hem for wanem?
3 Famili Worship Hem for Wanem? Start long January 2009, Kongregeson Buk Study hem kamap long semtaem wea iumi garem Theocratic Ministry Skul and Service Meeting. Wanfala reason why disfala change kamap, hem for evriwan long famili strongim wei wea olketa fren witim Jehovah, taem olketa markem wanfala taem evri week for duim famili worship. Evri famili kasem encouragement for duim famili study long day wea olketa duim buk study bifor, sapos hem fitim, and for iusim datfala taem for study and story raonem Bible fitim need bilong famili.
4. Waswe, fitim famili for iusim wan hour nomoa for duim Famili Worship? Explainim.
4 For iumi joinim Kongregeson Buk Study, iumi needim taem for redyim iumiseleva, travel, and samfala nara samting. Staka long iumi iusim staka taem for go and kam long datfala meeting wea hem wan hour nomoa. From disfala change kamap, iumi evriwan long famili savve iusim datfala taem for worshipim Jehovah. So iumi savve iusim moa taem for duim Famili Worship. Bat iumi shud ting raonem wanem famili needim and savve bilong each wan, and markem haomas hour wea fitim evriwan.
5. Waswe, fitim for iusim full taem for famili study tugeta? Explainim.
5 Waswe, Fitim for Iusim Full Taem for Study Tugeta? Taem olketa hasband and waef, and olketa famili wea garem pikinini storyim Bible tugeta, olketa encouragem each other. (Rom. 1:12) Evriwan long famili fren gud tugeta. Dastawe, wei for storyim Bible tugeta hem main samting long taem bilong Famili Worship. Bat each wan long famili tu savve study seleva. Olsem example, bihaen famili study tugeta, famili savve stap tugeta taem wanwan insaed famili savve study seleva, or maet redi for meeting or readim olketa magasin. Samfala famili disaed for no onem TV long full taem hia.
6. Hao nao for study tugeta?
6 Hao Nao for Study Tugeta? Famili Worship shud no evritaem olsem kwestin and ansa. For mekem Famili Worship interesting and evriwan enjoyim, staka famili garem program wea semsem olsem olketa part long meeting long midol week. Olketa divaedem wanem for storyim long difren part and olketa duim diswan long staka difren wei. Olsem example, maet olketa readim Bible tugeta, redyim difren part long meeting, and maet olketa garem taem for practicem hao for duim preaching waka. Page 6 garem samfala idea.
7. Evriwan long famili shud garem wanem kaen feeling?
7 Evriwan Long Famili Shud Garem Wanem Kaen Feeling? Famili savve lanem staka samting taem evriwan feel gud, and relax. Maet samfala taem iufala savve study aotsaed sapos weather hem gud. Long taem bilong study, hem gud for spel lelebet. Samfala famili savve kaikai lelebet bihaen long study. From dadi and mami no iusim taem bilong Famili Worship for waelem or stretem pikinini, maet olketa iusim datfala taem for storyim wanfala problem wea kamap. Bat hem gud for storyim problem wea maet affectim pikinini taem iutufala seleva stap, and no front long brata and sista bilong hem, nogud hem feel nogud. Famili Worship shud no boring or holy tumas, bat hem taem wea evriwan showimaot olketa hapi, olsem hapi God wea iumi worshipim.—1 Tim. 1:11.
8, 9. Wanem nao olketa famili hed savve duim for redi?
8 Hao Nao Famili Hed Savve Redi? Famili bae barava kasem gud samting sapos famili hed savve redi firstaem and disaedem wanem for storyim and hao for duim study bifor Famili Worship. (Prov. 21:5) Bae hem gud tumas for hasband story witim waef abaotem diswan. (Prov. 15:22) Samfala taem hem bae gud for olketa famili hed askem tingting bilong pikinini abaotem wanem olketa savve duim. Sapos iufala duim olsem, iufala bae luksavve long wanem olketa tingim and interest bilong olketa.
9 Samfala week, famili hed no need for iusim staka taem for redi. Luk olsem, famili bae enjoyim olketa samting wea famili duim evri week, and famili hed bae no need for evritaem redyim niu program. Maet for helpem famili hed, hem gud for hem redi bihaen Famili Worship, taem hem tingim yet spiritual saed bilong famili. Samfala famili hed raetem wanem for studyim and putim long ples wea evriwan savve lukim. Diswan mekem famili hapi and luk forward for datfala study, and mekem olketa savve redi tu.
10. Hao nao olketa wea stap seleva savve duim Famili Worship?
10 Waswe Sapos Mi Nomoa Long Famili? Olketa wea stap seleva savve iusim taem for Famili Worship for study seleva. Gudfala program for study seleva hem nao for readim Bible, redi for olketa meeting, and readim olketa Wastaoa and Awake! magasin. Samfala pablisa duim extra study long wei for duim study project. Samfala taem, maet olketa savve invaetem nara pablisa or famili for joinim olketa for storyim Bible tugeta wea savve encouragem evriwan.
11, 12. Wanem nao samfala gud samting wea famili savve kasem taem olketa duim Famili Worship evri week?
11 Wanem Gud Samting Nao Famili Savve Kasem Taem Olketa Duim Famili Worship Evri Week? Olketa wea worshipim Jehovah witim full heart barava fren gud witim hem. And tu, olketa famili wea worship tugeta strongim famili for garem wan mind. Wanfala hasband and waef sei olsem abaotem gud samting tufala enjoyim: “From mitufala pioneer and no garem pikinini, mitufala barava luk forward for duim Famili Worship. From diswan, hem olsem mitufala barava fren gud tugeta and long Dadi bilong iumi long heven. So taem mitufala wekap long day for study, mitufala savve sei long each other: ‘Iu savve wanem nao bae iumi tufala duim tunaet? Naet for Famili Worship!’”
12 Disfala wei for duim famili worship hem helpem tu olketa famili wea busy. Wanfala singol mami wea garem tufala boy and wea regular pioneer sei: “Bifor, famili study bilong mifala no gohed gud. Samfala taem mifala duim, bat samfala taem nomoa bikos mi savve taed. Mi no savve hao for duim evri samting hia. So mi laek for sei thankiu tumas long iufala for disfala Famili Worship program. From diswan, mifala evritaem duim famili study and kasem gud samting from diswan.”
13. Wanem nao bae showimaot sapos famili bilong iumi bae kasem gud samting from disfala arrangement?
13 Olsem wei for keepim Sabbath, Famili Worship program hem wanfala present from Dadi bilong iumi long heven wea savve helpem olketa famili. (Jas. 1:17) Wanem olketa Israelite famili duim long Sabbath, showimaot wei wea olketa gohed fren gud witim Jehovah. Long sem wei tu, hao iumi iusim taem wea iumi markem for duim famili worship showimaot gud samting wea famili bilong iumi bae kasem. (2 Cor. 9:6; Gal. 6:7, 8; Col. 3:23, 24) Taem iufala mekius long disfala arrangement, famili savve talem sem toktok wea man for raetem psalm talem: “Hem barava gud tumas long mi for stap klosap long God. Jehovah, iu nao Lord bilong evri samting and olsem ples bilong mi for stap sef.”—Ps. 73:28.
[Blurb long page 5]
Famili Worship shud no boring or holy tumas, bat hem taem wea evriwan showimaot olketa hapi, olsem hapi God wea iumi worshipim
[Box long page 6]
KEEPIM
Samfala Idea for Famili Worship
Bible:
• Readim tugeta wanfala part from Bible reading long datfala week. Sapos datfala reading hem abaotem tu-thri man, wanfala savve read olsem man wea talem story, and olketa narawan savve readim toktok bilong olketa difren wan.
• Actim wanfala part long datfala Bible reading.
• Markem each wan long famili for readim olketa chapter bifor taem for Famili Worship, and redyim wan or tufala kwestin abaotem datfala chapter. Then duim research tugeta abaotem kwestin bilong evriwan.
• Evri week raetem wanfala Bible verse long eni pepa and trae for baeheartim and explainim. Raetem staka Bible verse, and reviewim evri week for faendemaot haomas verse nao iu savve rememberim.
• Lisin long Bible recording long CD and luk followim long Bible bilong iu.
Olketa Meeting:
• Redyim tugeta wanfala part wea bae kamap long olketa meeting.
• Practicem singsing for nextfala meeting.
• Sapos wanfala long famili garem tok long Theocratic Ministry Skul or demonstration long Service Meeting, storyim samfala idea long hao for duim datwan or practicem front long famili.
Need Bilong Famili:
• Storyim eni part from olketa buk hia, Young People Ask or Lane From Datfala Nambawan Teacher.
• Practicem wanem for duim abaotem eni samting wea maet happen long skul.
• Practicem wanem for duim wea dadi and mami and pikinini duim tugeta. Pikinini duim research abaotem wanfala topic and story raonem witim dadi and mami.
Preaching Waka:
• Practicem wanem for duim for redyim wanem for storyim long weekend.
• Storyim olketa goal wea famili savve kasem for duim moa samting long preaching waka long month bilong Memorial or taem bilong holiday.
• Hem gud for each wan long famili duim research for tu-thri minute long hao for ansarem olketa difren kwestin wea maet kamap long preaching waka, and then practicem wanem for duim.
Olketa Nara Idea:
• Readim tugeta wanfala article from olketa niu magasin.
• Hem gud for each wan long famili readim firstaem wanfala article from olketa niu magasin wea hem interest long hem, and then askem hem for storyim.
• Samfala taem hem gud for askem wanfala pablisa or hasband and waef for joinim iufala long Famili Worship, and maet interviewim olketa tu.
• Lukluk and storyim tugeta wanfala long olketa video bilong iumi.
• Storyim tugeta “Young People Ask” or “For Family Review” from Awake!
• Storyim tugeta “Lanem Pikinini Bilong Iu” or “For Young Pipol” from pablik Wastaoa magasin.
• Readim and story raonem wanfala part long niu Yearbook or niu buk wea release long distrik convention.
• Bihaen iufala attendim wanfala convention or assembly, reviewim olketa main point.
• Lukluk long olketa samting wea Jehovah wakem, and storyim wanem iumi savve lanem abaotem Jehovah from datwan.
• Waka tugeta long wanfala project, olsem wanfala model, map, and chart.