‘Letem Pipol Lukim Laet Bilong Iumi’
1. Wanem privilege nao iumi garem for sharem witim pipol?
1 Taem iumi lukim laet long morning go kasem evening, datwan praisem Jehovah God. Bat Jesus storyim nara kaen laet wea hem laekem olketa disaepol for garem, hem nao “laet wea mekem man laef.” (John 8:12) Hem nambawan privilege for garem disfala spiritual laet bat iumi garem responsibility for sharem datwan tu. Jesus sei: “Letem olketa man lukim laet bilong iufala,” mekem olketa tu kasem gud samting. (Matt. 5:16) From staka pipol no fren witim God, hem important tumas for iumi sharem disfala laet! Hao nao iumi savve letem pipol lukim laet bilong iumi, olsem Christ duim?
2. Wanem nao Jesus duim wea showimaot hem important for letem pipol lukim laet bilong iumi?
2 Preach Long Pipol: Jesus iusim taem, strong, and olketa material samting for helpem pipol savve long tru samting abaotem God. Hem go long haos bilong pipol, preach long olketa taon, and antap long olketa maunten. Hem preach long eni ples wea pipol stap. Jesus luksavve long gudfala samting wea pipol kasem taem hem helpem olketa fren gud witim God. (John 12:46) For helpem plande pipol moa, Jesus lanem olketa disaepol bilong hem for kamap “laet bilong world.” (Matt. 5:14) Olketa letem pipol for lukim laet bilong olketa long wei for duim gudfala samting for olketa narawan and for storyim tru samting abaotem God.
3. Wanem nao iumi savve duim for showimaot iumi tinghae long truth?
3 Pipol bilong God luksavve olketa mas gohed for showimaot olketa “pikinini bilong laet” and olketa preach long eni ples wea pipol stap. (Eph. 5:8) Sapos iumi readim Bible or olketa buk bilong iumi long skul or ples wea iumi waka, datwan savve mekem chance kamap for iumi storyim Bible witim narawan. Hem nao samting wea wanfala young sista duim. Hem startim wanfala Bible study and 12-fala skul fren bilong hem tekem olketa buk!
4. Why nao wei for ‘letem pipol lukim laet bilong iumi’ hem minim for garem gudfala wei?
4 Showimaot Gudfala Wei: Samting wea iumi duim evriday savve helpem pipol lukim laet bilong iumi. (Eph. 5:9) Pipol savve lukim gudfala wei bilong iumi long waka, long skul, and long olketa nara ples and datwan savve mekem iumi garem chance for storyim olketa tru samting long Bible. (1 Pet. 2:12) Olsem example, gudfala wei bilong wanfala boy wea 5 year mekem teacher bilong hem for ringim dadi and mami bilong hem. Teacher sei: “Mi nating meetim pikinini wea barava savve long wanem hem stret and wanem hem no stret, olsem pikinini bilong iutufala!” Tru tumas, ministry bilong iumi and gudfala wei bilong iumi savve mekem pipol laek savve long “laet wea mekem man laef” and datwan hem praisem God bilong iumi.