“Tingim and Kaen Long Narawan”
1. Wanem nao pipol barava needim distaem?
1 Long disfala taem winim enitaem bifor, staka pipol barava needim narawan for tingim and kaen long olketa. Wei wea evri samting long world gogo for nogud, diswan mekem staka pipol for no hapi, barava feel wikdaon, and no garem hope. Staka million pipol needim help, and iumi olketa Christian nao fit for showimaot iumi barava tingim olketa. (Matt. 22:39; Gal. 6:10) Wanem nao iumi savve duim for showimaot iumi tingim olketa?
2. Wanem nao best wei for showimaot iumi tingim and kaen long narawan?
2 Waka wea Showimaot Wei for Kea: God nomoa savve givim trufala comfort wea no savve finis. (2 Cor. 1:3, 4) Jehovah encouragem iumi for followim example bilong hem long wei for “tingim and kaen long narawan” and hem givim wanfala waka for iumi go talemaot gud nius abaotem Kingdom long olketa narawan. (1 Pet. 3:8) For iumi busy long disfala waka, hem nao best wei for comfortim “olketa wea feel sorre,” bikos Kingdom bilong God nomoa hem hope for olketa man wea safa. (Isa. 61:1) From Jehovah hem kea for olketa pipol bilong hem, klosap nao hem bae aotem pipol wea wicked and bae startim wanfala niu world.—2 Pet. 3:13.
3. Wanem nao iumi savve duim for ting long pipol olsem Jesus hem duim?
3 Ting Long Pipol Olsem Jesus Duim: Nomata taem Jesus preach long staka pipol, hem ting long olketa wanwan and no olsem wanfala grup nomoa. Hem ting long each wan long olketa olsem pipol wea needim help for fren gud witim God. Hem ting long olketa olsem olketa sheepsheep wea no garem eni man for leadim olketa. Jesus sorre tumas taem hem lukim olketa, and hem patient for teachim olketa. (Mark 6:34) Taem iumi ting long pipol olsem Jesus duim, datwan bae encouragem iumi for showimaot iumi barava tingim and kaen long pipol wanwan. Iumi savve showimaot diswan long wei wea iumi story and long feis bilong iumi. Iumi bae ting long preaching waka hem barava important, and iumi bae talem olketa toktok wea fitim need bilong pipol wea iumi story witim.—1 Cor. 9:19-23.
4. Why nao iumi mas tingim and kaen long pipol?
4 Wanfala big crowd bilong pipol from evri kantri willing for lisin bikos iumi talemaot Kingdom message and bikos iumi tingim olketa. Taem iumi gohed for showimaot iumi kaen long pipol, iumi bae mekhae long Jehovah, God wea tingim and kaen long pipol and iumi bae mekem hem hapi.—Col. 3:12.