Faevfala Samting Iu Savve Duim for Garem Bible Study
1. Sapos iu faendem hem hard for garem Bible study, wanem nao iu shud duim and why nao olsem?
1 Waswe, iu faendem hem hard for garem wanfala Bible study? No givap. Jehovah blessim olketa wea gohed duim wanem hem laekem. (Gal. 6:9) Iumi bae storyim faevfala idea wea savve helpem iu for garem study.
2. Wanem nao wanfala samting wea iumi savve duim for garem Bible study?
2 Askem Pipol: Plande pipol savve iumi givimaot olketa Wastaoa and Awake! magasin, bat maet olketa no savve iumi willing for studyim Bible witim pipol. Taem iu preach long haos tu haos, hem gud for askem pipol sapos olketa laek study. Iu savve askem olketa return visit tu. Sapos olketa no acceptim, iu savve gohed for visitim olketa and givim magasin long olketa. For staka year, wanfala brata evritaem givim olketa magasin long wanfala hasband and waef. Wanday, hem go givim niu magasin long tufala. Then taem hem redi for go hem disaed for askem tufala: “Waswe, iutufala laek studyim Bible?” Hem sapraes tufala sei tufala laek for study. Distaem tufala baptaes nao.
3. Why nao iumi mas no tingse samwan study finis witim olketa wea kakam long meeting?
3 Askem Olketa wea Kam Long Meeting: No tingse samwan study finis witim olketa wea kakam long meeting. Wanfala brata sei: “Klosap evriwan wea mi startim study witim olketa hem olketa wea kakam long meeting.” Wanfala sista go story witim wanfala woman wea savve kam long meeting witim olketa dota bilong hem wea baptaes finis. Hem attendim meeting for 15 year finis, bat from hem no woman for story, hem savve kam insaed Kingdom Hall just bifor meeting start and go stretawe taem meeting hem finis. Woman hia agree for study and gogo hem kam insaed truth. Datfala sista sei: “Mi sorre mi weit for 15 year bifor mi askem hem for study!”
4. Wanem nao nara samting wea iumi savve duim for garem Bible study?
4 Askem Narawan Sapos Eniwan Laek Study: Wanfala sista savve go witim olketa narawan long Bible study bilong olketa. Hem askem firstaem sista wea conductim study sapos hem olraet for askem Bible study bilong hem sapos hem savve long eniwan wea laek study. Taem iu offerim Wanem Bible Teachim buk long return visit bilong iu, iu savve askem hem: “Waswe, iu savve long eniwan moa wea bae laekem disfala buk?” Samfala taem olketa pablisa and pioneer no fit for study witim samwan wea olketa meetim long territory. So talem olketa iu laekem wanfala Bible study.
5. Why nao hem gud for iumi askem hasband or waef wea no Witness for studyim Bible?
5 Hasband or Waef wea No Witness: Waswe, hasband or waef bilong samfala pablisa long kongregeson bilong iu no Witness? Samfala wea no biliv no laek for storyim Bible witim marit partner bilong olketa, bat olketa willing for studyim Bible witim narawan wea no insaed famili. Plande taem hem gud for askem firstaem marit partner wea Witness abaotem best samting for duim bifor iumi askem hasband or waef bilong hem for study.
6. Why nao hem important for prea for garem wanfala study?
6 Prea: No tingse prea no garem paoa. (Jas. 5:16) Jehovah promis for herem prea bilong iumi sapos iumi askem samting wea followim tingting bilong hem. (1 John 5:14) Wanfala brata wea busy tumas prea long Jehovah for garem wanfala Bible study. Waef bilong hem wari nogud hem no garem taem for lukaftarem wanfala study, especially sapos datfala study garem staka problem. So hem prea abaotem diswan long Jehovah taem hem askem Jehovah for helpem hasband bilong hem garem wanfala study. Jehovah ansarem prea bilong tufala bikos tufala week bihaen, wanfala pioneer long kongregeson meetim man wea laek study and datfala pioneer askem brata hia for study witim hem. Waef sei: “Long tingting bilong mi, sapos eniwan tingse hem no fit for lukaftarem wanfala Bible study, hem shud story gud long Jehovah and gohed prea abaotem datwan. Mitufala hapi tumas distaem.” Sapos iu no givap, maet iu tu garem wanfala Bible study and enjoyim wei for helpem narawan for ‘faendem datfala road for kasem laef olowe.’—Matt. 7:13, 14.