Followim Example Bilong Profet Zephaniah
1. Olketa wanem samting nao happen long taem wea Zephaniah hem profet, and why nao hem gud example for iumi?
1 Long midol long mek-seven century B.C.E., plande pipol long Judah worshipim Baal. Datfala nogud King Amon, olketa wakaman bilong hem killim hem dae, and King Josiah wea hem young nomoa, hem nao rul. (2 Chron. 33:21–34:1) Long datfala taem, Jehovah markem Zephaniah for talemaot judgment message bilong hem. Nomata maet Zephaniah hem kam from laen bilong olketa king bilong Judah, hem no fraet for talemaot judgment message bilong Jehovah long olketa bigman bilong Judah. (Zeph. 1:1; 3:1-4) Iumi tu laek for followim example bilong Zephaniah for no fraet and no letem olketa relative for spoelem wei wea iumi worshipim Jehovah. (Matt. 10:34-37) Wanem message nao Zephaniah talemaot, and wanem nao pipol duim taem olketa herem datwan?
2. Wanem nao iumi mas duim mekem iumi stap sef long day bilong kros bilong Jehovah?
2 Lukaotem Jehovah: Long day bilong kros bilong Jehovah, hem nomoa savve sevem olketa man. Dastawe Zephaniah talem pipol bilong Judah for no delay for lukaotem Jehovah, lukaotem stretfala wei, and for hambol. (Zeph. 2:2, 3) Iumi tu mas duim olsem distaem. Olsem Zephaniah iumi encouragem pipol for lukaotem Jehovah, bat iumi tu mas disaed strong for no “lusim Jehovah.” (Zeph. 1:6) Iumi lukaotem Jehovah taem iumi studyim Bible and askem hem for helpem iumi for minim datwan. Iumi lukaotem stretfala wei taem iumi duim olketa stret samting. Iumi showimaot iumi hambol taem iumi willing for stap anda long olketa wea Jehovah markem and willing for followim direction wea kam from organization bilong Jehovah.
3. Why nao iumi shud no givap for duim preaching waka?
3 Samfala Bae Lisin: Luk olsem Josiah and samfala narawan long Judah lisin long warning message bilong Zephaniah. Josiah hem lukaotem Jehovah taem hem young boy yet. Gogo hem aotem and finisim evri samting wea join witim wei for worshipim olketa idol. (2 Chron. 34:2-5) Distaem, nomata pipol herem message abaotem Kingdom, samfala seed foldaon long road, long graon wea stap antap long bigfala ston, and long ples wea garem nila grass. Bat samfala seed foldaon long gudfala graon and olketa duim samting followim datfala message. (Matt. 13:18-23) Iumi sure Jehovah bae blessim hard waka bilong iumi taem iumi busy for talemaot message abaotem Kingdom.—Ps. 126:6.
4. Why nao hem gud for iumi ‘weit long Jehovah’?
4 Samfala long Judah tingse Jehovah bae no duim eni samting. Bat Jehovah talem olketa, bigfala day bilong hem klosap nao. (Zeph. 1:12, 14) Olketa wea duim wanem hem laekem nomoa bae stap sef. (Zeph. 3:12, 17) Taem iumi ‘weit long Jehovah,’ iumi laek gohed for hapi and waka tugeta witim olketa narawan wea worshipim God!—Zeph. 3:8, 9.