Kamap Gud Long Ministry—Trainim Bible Study for Duim Study Seleva

Why Hem Important: Bible study mas studyim olketa deep samting long Bible mekem hem kamap mature long spiritual wei. (Heb. 5:12–6:1) Taem man duim study hem mas waka hard bikos hem bae joinim olketa niu samting wea hem lanem witim wanem hem savve finis and trae for luksavve hao datwan savve helpem hem. (Prov. 2:1-6) Sapos Bible study lanem hao for duim research seleva, datwan bae helpem hem for faendem ansa for olketa kwestin wea hem garem long olketa pablikeson bilong iumi. Taem Bible study waka hard for followim wanem hem lanem, datwan bae helpem hem for stand strong taem hem kasem hard taem.—Luke 6:47, 48.

Wanem for Duim:

Helpem Bible study for luksavve hem barava important for prea long Jehovah for helpem hem bifor hem duim study seleva.—John 14:26; 1 Cor. 2:10.
Nomata long first study, encouragem Bible study for prepare firstaem. Showim hem buk bilong iu wea iu preparem finis, and lanem hem for andalaenem or haelaetim olketa main word or toktok long paragraf.
Encouragem Bible study for ansarem olketa kwestin long toktok bilong hemseleva. Sapos hem readim nomoa ansa long paragraf, datwan bae mekem study hem boring.
Encouragem Bible study for readim Bible evriday. Showim hem Bible reading schedule wea stap long English long jw.org, or long The Watchtower bilong August 1, 2009, page 15-18, wea hem savve followim. Nomata Bible study mas waka hard for readim Bible evriday, hem bae kasem gud samting from datwan.—Ps. 1:2, 3.
Lanem Bible study for savve hao for iusim Watchtower Library, Watchtower ONLINE LIBRARY, or Research Index for faendem ansa for olketa kwestin wea hem garem. Helpem hem for savve long olketa leta wea stand for olketa pablikeson wea iumi savve iusim long olketa meeting. Olsem example, bh hem stand for Wanem Nao Really Samting wea Bible Teachim buk.

Samting for Duim Disfala Month:

Bihaen iutufala studyim olketa paragraf wea stap anda long wanfala subheding or finisim wanfala chapter, askem Bible study for storyim olketa main point. Sapos iu no garem Bible study, readim wanfala chapter long Bible or wanfala paragraf long Wastaoa and trae for tingim olketa main point wea iu lanem. Taem iu duim olsem, datwan bae helpem iu for minim wanem iu readim.