Helpem Pikinini Bilong Iu for Garem Strongfala Faith Long Creator

Olketa samting wea Jehovah wakem showimaot glory bilong hem. (Ps 19:1-4; 139:14) Bat world bilong Satan hem mekhae long olketa laea teaching abaotem hao laef hem start. Olketa teaching hia no mekhae long God. (Ro 1:18-25) Wanem nao iu savve duim mekem olketa laea teaching hia no spoelem mind and heart bilong olketa pikinini bilong iu? From taem wea olketa smol, helpem olketa for barava bilivim Jehovah hem stap and hem lovem olketa. (2Co 10:4, 5; Eph 6:16) Story witim olketa abaotem wanem olketa lanem long skul, and faendemaot tingting bilong olketa abaotem olketa samting hia. Then iusim olketa samting wea organization provaedem for kasem heart bilong olketa.—Pr 20:5; Jas 1:19.

LUKIM VIDEO WANEM OLKETA NARA YOUNG WAN TALEM—WASWE, WANFALA GOD HEM STAP? BIHAEN, STORYIM OLKETA KWESTIN HIA:

• Hao nao tingting bilong staka pipol abaotem God?

• Wanem nao olketa teachim long skul bilong iu abaotem diswan?

• Wanem nao mekem iu bilivim Jehovah hem stap?

• Hao nao bae iu helpem samwan for bilivim God nao wakem evri samting?