“Respectim Dadi and Mami Bilong Iufala”

Taem Jesus stap long earth, hem mekhae long datfala komand: “Respectim dadi and mami bilong iufala.” (Ex 20:12; Mt 15:4) Jesus fit for storyim diswan bikos hem “gohed for obeyim” dadi and mami bilong hem taem hem young. (Lu 2:51) Taem hem big, hem mek sure samwan mas lukaftarem mami bilong hem bihaen hem dae.—Joh 19:26, 27.

Distaem tu, taem olketa young wan obeyim and story kaen long dadi and mami datwan showimaot olketa respectim tufala. Nomata taem dadi and mami bilong iumi olo, iumi shud gohed for showimaot respect long tufala long wei for lisin long advaes bilong tufala. (Pr 23:22) Nara samting tu, iumi showimaot iumi respectim olketa parents wea olo taem iumi provaedem need bilong olketa and encouragem olketa. (1Ti 5:8) Nomata iumi young or olo, iumi shud story gud tugeta witim parents bilong iumi bikos datwan hem wanfala important wei for showimaot iumi respectim olketa.

LUKIM DATFALA VIDEO WEA GAREM TITLE HAO NAO MI SAVVE STORY GUD WITIM PARENTS BILONG MI? THEN BIHAEN ANSAREM OLKETA KWESTIN HIA:

• Wanem nao maet mekem hem no isi for iu story witim parents bilong iu?

• Taem iu story witim parents bilong iu, hao nao iu savve showimaot iu respectim tufala?

  

• Why nao hem barava important for story witim parents bilong iu? (Pr 15:22)