Waswe, Iu Lukim Olketa Nambawan Wei Bilong God?

Taem iu lukim flaoa wea garem didifren kala, skae wea fulap witim staka star, or watafol wea mekem big noise, iumi lukim olketa naes samting wea Creator bilong iumi wakem. Evri samting long creation showimaot klia olketa wei bilong Jehovah. (Ro 1:20) Sapos iumi spendem lelebet taem for ting raonem olketa samting from creation, iumi bae luksavve God garem paoa, love, wisdom, justice, and tu, hem kaen tumas.—Sams 104:24.

Wanem nao samfala long olketa samting wea Jehovah creatim wea iu lukim evriday? Nomata sapos iumi stap long taon, iumi savve lukim olketa bird or olketa tree. Wei for lukluk long olketa samting wea Jehovah creatim savve help for katem daon wari, and for no tingting tumas abaotem olketa problem. Hem savve strongim faith bilong iumi long Jehovah hao hem bae lukaftarem iumi distaem, and long future tu. (Mt 6:25-32) Sapos iu garem pikinini, helpem olketa for luksavve long olketa nambawan wei bilong Jehovah. Taem iumi mekem grow wei for tinghae long creation, iumi bae fren gud witim Creator bilong iumi.—Sams 8:3, 4.

LUKIM VIDEO CREATION SHOWIMAOT GLORY BILONG GOD—LAET AND KALA, THEN ANSAREM OLKETA KWESTIN HIA:

• Wanem nao mekem iumi for lukim olketa difren kala?

• Wanem nao mekem olketa kala for change taem iumi lukluk long wanfala samting long difren saed bilong hem?

• Why nao iumi savve lukim olketa difren kala long skae?

• Olketa wanem spesol kaen kala from creation nao iu lukim long ples wea iu stap?

• Why nao iumi shud markem taem for lukluk gud long creation bilong Jehovah?