Waswe, Iu Laek Apply for Skul for Olketa Kingdom Evangelizer?

Waswe, age blo iu between 23 and 65, and iu insaed full-taem service? Waswe iu healthy, and iu fit for muv go lo ples wea olketa brata needim help? Sapos iu ansa yes for olketa kwestin hia, maet iu laek for apply for Skul for Olketa Kingdom Evangelizer. Bihaen first class blo datfala skul, staka thousand hasband and waef, and olketa singol brata and sista olketa apply. Bat mifala needim staka singol brata moa for apply. Askem Jehovah for helpem iu laek duim moa samting for hem and followim example blo Son blo hem. (Sams 40:7, 8; Mt 20:28; Heb 10:7) Then tingim wanem iu savve changem saed lo waka or eni nara samting, mekem iu free for attendim datfala skul.

Bihaen samfala attendim disfala skul, wanem assignment nao olketa kasem? Samfala kasem assignment for go lo ples wea olketa mas lanem nara languis or kasem assignment for duim metropolitan pablik witnessing. Bihaen tu-thri year, samfala kamap substitute circuit overseer, circuit overseer, or field missionary. Sapos iu ting for duim moa samting lo waka blo Jehovah, hem gud for tingim toktok blo profet Isaiah wea sei: “!Mi long hia! !Yu sendem mi!”—Aesaea 6:8.

LUKIM VIDEO OLKETA FIELD MISSIONARY DUIM WAKA FOR HARVEST, THEN ANSAREM OLKETA KWESTIN HIA:

• 

  Hao nao brata or sista savve kamap field missionary?

• 

  Olketa wanem waka nao olketa field missionary duim?

• 

  Wanem nao samfala blessing wea olketa field missionary kasem?