Taon blo Nineveh bifor garem olketa big palace, and staka big statue
Waswe, Iu Savve Finis?
Wanem nao happen lo taon blo Nineveh bihaen lo taem blo Jonah?
LO MEK-SEVEN century B.C.E., Assyria hem world paoa finis and hem rul ovarem staka kantri. Wanfala website blo British Museum sei: “Olketa border blo Assyria hem start from Cyprus lo west go kasem Iran lo east, and for samfala year Assyria rul ovarem Egypt tu.” Nineveh hem kapitol taon blo Assyria, and hem big winim eni nara taon lo world lo datfala taem. Hem garem olketa big statue, staka naes garden, olketa big palace, and olketa big library. Olketa archaeologist faendem pruv wea showimaot King Ashurbanipal savve kolem hemseleva “king blo world,” olsem staka nara king blo Assyria savve duim tu. Lo taem wea datfala king hem rul, luk olsem bae hard for eniwan tekovarem Assyria and Nineveh.
World Paoa blo Assyria hem rul ovarem staka kantri lo datfala taem
Nomata olsem, taem rul blo Assyria barava strong tumas, Zephaniah, wanfala profet blo Jehovah, talem disfala profesi abaotem Assyria: “[Jehovah] bae hemi yusim paoa blong hem agensim kantri long Asiria, an bae hemi mekem biktaon long Nineve fo kamap nogud tumas.” And tu, Nahum, profet blo Jehovah, talem disfala profesi: “Go tekem olketa silva an gol blong olketa! . . . No enisamting hemi stap long hem nao . . . Bae olketa tok olsem, ‘!Nineve hemi kamap barava nogud nao!’” (Sefenaia 2:13; Neiham 2:9, 10; 3:7) Pipol wea herem olketa profesi hia maet tingse hard tumas for eniwan tekovarem Assyria, and datwan no savve happen.
Ples wea Nineveh stap bifor hem olsem desert distaem!
Batawea, samting wea pipol no bilivim nao hem happen! Kasem end blo mek-seven century B.C.E., olketa blo Babylon and Media tekovarem Assyria. Bihaen datwan, no eniwan stap lo Nineveh, and gogo pipol tingse datfala taon no stap bifor! Wanfala buk blo The Metropolitan Museum of Art in New York sei: “Gogo graon kavarem ples wea taon blo Nineveh stap bifor, and story lo Bible abaotem Nineveh nomoa pipol savve.” Biblical Archaeology Society sei lo start blo mek-naentin century, “pipol daotem sapos Nineveh, datfala kapitol taon blo Assyria, hem stap lo bifor.” Bat gogo lo midol lo mek-naentin century, Austen Henry Layard, wanfala archaeologist start for digim ples wea Nineveh stap lo hem bifor. Olketa old samting wea hem faendem pruvim datfala taon blo Nineveh hem stap bifor.
From olketa profesi abaotem Nineveh hem kamap tru, datwan helpem iumi for trustim hao olketa nara profesi lo Bible bae kamap tru, olsem olketa profesi wea storyim hao olketa gavman wea stap distaem bae finis.—Daniel 2:44; Rev. 19:15, 19-21.