1922 Wan Handred Year Go Finis

“WANFALA SAPRAESING IDEA”

From preaching waka start for kamap big, olketa brata and sista needim staka literature. Olketa brata lo Brooklyn Bethel printim olketa magasin, bat olketa iusim olketa nara printing company for printim olketa buk wea garem hard kava. For staka month wanfala company no savve printim inaf buk for olketa iusim lo preaching waka. So Brata Rutherford askem Brata Robert Martin, wea overseer lo printing factory lo Bethel, sapos olketa bae fit for producem olketa buk tu.

Brother Martin sei: “Datwan hem wanfala sapraesing idea, bikos datwan minim mifala need for startim nara factory for wakem olketa buk.” Olketa brata rentim spes insaed wanfala building lo 18 Concord Street lo Brooklyn and peim olketa machine wea olketa needim.

Samfala no hapi abaotem datfala niu factory. President blo wanfala company wea printim olketa buk for olketa Witness, hem visitim datfala factory. Hem sei: “Iufala garem staka spesol machine for iufala printim olketa buk, bat no eniwan lo iufala savve hao for iusim. Insaed sixfala month nomoa bae iufala spoelem evri machine blo iufala.”

Brata Martin sei: “Nomata mifala no savve hao for iusim olketa machine yet, mifala savve Jehovah bae helpem mifala.” Wanem Brata Martin talem hem tru, bikos no longtaem nomoa olketa start for printim 2,000 buk evriday.

IUSIM RADIO FOR PREACH LO STAKA THOUSAND PIPOL

Lo 1922, nara samting wea olketa Bible Student start for iusim for preachim gud nius lo pipol, hem radio. Lo Sunday, February 26, 1922, hem firstaem for Brata Rutherford story lo radio. Hem givim tok wea garem title, “Staka Million Pipol wea Laef Distaem Bae No Dae,” lo radio station lo KOG lo Los Angeles, California, U.S.A.

Samting olsem 25,000 pipol herem datfala program. Samfala raetem kam leta for talem thankiu for datfala tok. Wanfala wea raet kam, hem Willard Ashford, wea stap lo Santa Ana, California. Hem talem thankiu lo Brata Rutherford for datfala barava interesting tok. Hem sei tu: “Mifala garem thrifala wea sik lo haos, so sapos iu no givim tok lo radio bae hard for mifala herem tok blo iu.”

Lo olketa month bihaen, olketa brata givim staka tok lo radio. The Watch Tower sei, kasem end lo 1922 “samting olsem 300,000 pipol herem gud nius from Bible lo radio.”

From olketa Bible Student kasem encouragement from olketa leta and koment from pipol, olketa disaed for buildim wanfala radio station lo Staten Island, wea klosap nomoa lo Brooklyn Bethel. Lo olketa year bihaen, olketa Bible Student iusim datfala radio station, WBBR, for talemaot gud nius abaotem Kingdom lo staka pipol.

“ADV”

The Watch Tower blo June 15, 1922 announcem wanfala convention bae kamap lo Cedar Point, Ohio, from September 5-13, 1922. Olketa Bible Student barava hapi tumas taem olketa arrive lo Cedar Point.

Lo first tok blo Brata Rutherford, hem sei lo audience: “Mi barava sure Jehovah bae . . . blessim disfala convention and hem bae mek sure staka pipol herem gud nius winim enitaem bifor.” Olketa speaker lo datfala convention gohed for encouragem olketa brata and sista for duim preaching waka.

Then lo Friday, September 8, samting olsem 8,000 pipol fulimap datfala hall, and redi for herem tok blo Brata Rutherford. Olketa luk forward for herem wat nao mining blo “ADV” wea stap lo front page blo invitation blo olketa. Taem olketa sidaon, masbi staka lo olketa lukim bigfala rol canvas wea hange antap lo stage. Arthur Claus, wanfala brata wea kam from Tulsa, Oklahoma, U.S.A., hapi from hem faendem ples for sidaon wea hem savve herem gud Brata Rutherford. Lo datfala taem olketa no garem saond system.

Chairman announcem hao taem Brata Rutherford givim tok blo hem, eniwan wea kam leit no savve kam insaed lo hall. Lo 9:30 a.m., Brata Rutherford startim tok witim olketa toktok blo Jesus from King James Bible lo Matthew 4:17 wea sei: “Kingdom bilong God hem kam klosap nao.” Taem hem storyim hao pipol bae lane abaotem datfala Kingdom, hem sei: “Jesus sei lo taem wea hem kamap King hem bae hipimap staka pipol wea faithful lo hem, olsem samwan wea duim wanfala harvest.”

Brata Claus, wea sidaon lo datfala hall sei: “Mifala no laek misstim eni word wea hem talem.” Bat seknomoa, hem feel sik and mas go aot from hall. Hem sorre bikos hem savve bae olketa no letem hem for kam bak insaed for herem end blo datfala tok.

Kwiktaem nomoa hem feel gud bak. Hem sei taem hem aotsaed lo hall, hem herem olketa wea insaed klap big tumas. Datwan mekem hem barava laek herem wat nao gohed! Hem tingim, for hem herem end blo datfala nambawan tok hem bae need for klae antap lo ruf. Brata Claus, hem 23 years lo datfala taem, so hem faendem wei for klae go ap lo saed blo datfala building. Olketa window insaed lo ruf hem open, and taem hem go klosap lo window hem hapi from hem “barava herem gud evri samting.”

Arthur seke for lukim samfala fren blo hem antap lo ruf tu. Wanfala lo olketa, Frank Johnson, ran go lo hem and askem hem, “Hao, iu garem eni sharp poket naef?”

Arthur sei: “Ia, mi garem.”

Frank sei: “Prea blo mifala kasem ansa nao bikos lo iu. Hao, iu lukim disfala big rol canvas? Hem wanfala banner, wea mifala taengem lo olketa nila hia. Lisin for taem Judgea hem sei, ‘and iufala mas advertisem, advertisem, advertisem,’ and then iumi katem fofala rope hia.”

So Arthur holem naef blo hem and olketa narawan weit for herem datfala toktok. Then nomoa Brata Rutherford kasem important part lo tok blo hem. From hem story witim strongfala feeling, hem klosap shout taem hem sei: “Gohed faithful and duim waka blo Lord. Gohed for duim disfala waka go kasem taem Babylon hem distroe. Talemaot disfala message lo evri ples. Evri pipol lo world mas savve Jehovah nao hem God and Jesus Christ nao hem King blo olketa king and Lord blo olketa lord. Distaem hem barava important taem lo history. Iumi savve King hem rul finis! Iumi nao mas talem evriwan abaotem hem. So advertisem, advertisem, advertisem King and Kingdom blo hem!”

Arthur sei lo semtaem, hem and olketa nara brata katem olketa rope and datfala banner rol kam daon. Datfala “ADV” hem stand for datfala word ‘advertisem’ wea stap lo datfala banner wea sei “advertisem King and Kingdom blo hem!”

IMPORTANT WAKA FOR DUIM

Datfala convention lo Cedar Point strongim olketa brata and sista for duim disfala important waka for preach abaotem Kingdom, and olketa wea fit for duim moa samting barava busy lo datfala waka. Wanfala colporteur (wea distaem hem pioneer) from Oklahoma, U.S.A., sei “mifala preach lo wanfala area wea staka pipol waka lo olketa coal mine and olketa poor tumas.” Datfala brata sei staka taem “pipol savve krae” taem olketa readim message wea stap insaed Golden Age magasin. And hem sei, “mifala hapi tumas for comfortim olketa.”

Olketa Bible Student hia luksavve hao toktok wea Jesus talem lo Luke 10:2 hem barava important. Hem sei: “Staka samting nao stap for harvestim, bat no staka wakaman stap for duim datwan.” Evri samting wea happen lo datfala year barava strongim olketa for talemaot gud nius abaotem Kingdom lo staka pipol moa.